စစ်ကိုင်းတိုင်း၊ ယင်းမာပင်ခရိုင် ယင်းမာပင်မြို့မစျေးကြီး ဟောင်းနွမ်းနေတဲ့အတွက် စျေးသူစျေးသားတွေရဲ့ ထည့်ဝင်ငွေနဲ့ ကိုယ်ထူကိုယ်ထ အသစ်ပြန်လည်တည်ဆောက်မယ်လို့ သိရပါတယ်။
မြို့မစျေးကြီးဟာ ဟောင်းနွမ်းပျက်စီးနေတာကြောင့် စျေးသူစျေးသားဟာ ရာသီဥတုဒဏ် နှစ်စဉ်ခံစားနေကြရတာဖြစ်ပါတယ်။
ပြန်လည်ပြုပြင်တည်ဆောက်ဖို့ ယခင်နှစ်တွေကတည်းက ကြိုးပမ်းဆောင်ရွက်ခဲ့ကြပေမယ့် အောင်မြင်မှုမရရှိခဲ့ဘဲ ဒီနှစ်မှာတော့ စျေးသူစျေးသားတွေရဲ့ စည်းလုံးမှုအားနဲ့ ကိုယ်ထူကိုယ်ထ တည်ဆောက်ကြတာလို့ ယင်းမာပင်မြို့နယ် ရွာထောင်ကျေးရွာနေ စျေးသည် ဒေါ်မြင့်ရီက ပြောပါတယ်။
"အရင်က စျေးရောင်းရတာ ဆိုင်ခန်းကလည်း ပျက်စီးယိုယွင်းနေတာကြပါပြီရှင့်။ မိုးရွာတဲ့ အခါမှာလည်း အမိုးကလေးတွေ ထီးကလေးတွေနဲ့မိုးပြီး ဆောင်းရပါတယ်။ ကျမတို့ ဒီစျေးကြီးကို အသစ်ပြန်လည်တည်ဆောက်စေချင်တာလည်းကြာပါပြီ။ ခဏခဏလည်း စည်းဝေးရပါတယ်။ ၂ နှစ်၊ ၃ နှစ်ရှိပြီ၊ မအောင်မြင်ခဲ့ပါဘူး။ အခုမှ အောင်အောင်မြင်မြင်နဲ့ ကိုယ်ထူကိုယ်ထစနစ် ဆောက်နိုင်ခဲ့တာ။"
ယင်းမာပင်မြို့ (ဃ) ရပ်ကွက်နေ စျေးကော်မတီဝင် ဦးကြည်အေးက "စျေးကို ၂ လအတွင်း ပြီးနိုင်အောင် တည်ဆောက်မယ်လို့ ကြိုးစားထားပါတယ်။ ယင်းမာပင်က ခရိုင်မြို့ဖြစ်တော့ ခရိုင်မြို့နဲ့တင့်တယ်မယ့် စျေးသစ်ကြီးပေါ်ပေါက်လာမှာကိုတော့ အတိုင်းမသိ ဝမ်းသာမိပါတယ်" လို့ ပြောပါတယ်။
ဆိုင်ခန်းသစ်တည်ဆောက်ရေးအပိုင်းမှာ ကော်မတီ ၅ ခုဖွဲ့စည်းကာ ကော်မတီ ၁ ခုကို စည်ပင်ကော်မတီက ၂ ယောက်၊ စျေးကော်မတီက ၂ ယောက်၊ ဆိုင်ခန်းပိုင်ရှင် ၅ ယောက် စုစုပေါင်း ၉ ဦးစီနဲ့ ဖွဲ့စည်းထားပါတယ်။
ယင်းမာပင်မြို့မစျေးထဲမှာ (က,ခ,ဂ,ဃ) ဆိုပြီး ရုံပေါင်း ၄ ရုံ၊ ဆိုင်ခန်းပေါင်း ၆၄ ခန်းရှိကာ အခန်းပေါင်း ၆၀ စတင်တည်ဆောက်မှာဖြစ်ပါတယ်။
စျေးဆိုင်ခန်း ၁ ခန်းကို ၂၅ သိန်း သတ်မှတ်ထားပြီး ပထမအကြိမ် ၁၀ သိန်း၊ ဒုတိယအကြိမ် ၁၀ သိန်းနှင့် တတိယအကြိမ် ၅ သိန်းဆိုပြီး အရစ်ကျပေးသွင်းရမှာဖြစ်ပါတယ်။
ဆိုင်ခန်းတွေကို သက်ဆိုင်တဲ့ ကော်မတီကနေ မဲစနစ်နဲ့ ချထားပေးမှာဖြစ်ပြီး စာရင်းရှင်းတမ်းများပေးကာ သွင်းထားငွေ ပိုခဲ့ရင် ပြန်ပေးမှာဖြစ်သလို လိုအပ်ရင်လည်း ပြန်လည်တောင်းယူမယ်လို့ ယင်းမာပင်မြို့နယ် စည်ပင်သာယာရေးကော်မတီဥက္ကဋ္ဌ ဦးအောင်ဘိုမြင့်က ပြောပါတယ်။
အခုတည်ဆောက်မယ့် စျေးဆိုင်ခန်းသစ်အကျယ်ဝန်းဟာ ၁.၁၅ ဧက ကျယ်ဝန်းပြီး စျေးခန်း ၁ ခန်းအကျယ်အဝန်းကတော့ ၉ ပေပတ်လည်ဖြစ်ကာ ၂ လအတွင်း အပြီးတည်ဆောက်မယ်လို့ သိရပါတယ်။
