စစ်ကိုင်းတိုင်းဒေသကြီး၊ ယင်းမာပင်မြို့နယ်၊ ဇီးတောကျေးရွာမှာ အစိုးရကပေးတဲ့ တတိယအကြိမ် ကိုဗစ်-၁၉ ထောက်ပံ့ငွေနဲ့ပတ်သက်ပြီး နိုင်ငံတော်ကသတ်မှတ်ပေးထားတဲ့အတိုင်း အပြည့်အဝမရကြလို့ ဒေသခံပြည်သူတွေ သက်ဆိုင်ရာအဆင့်ဆင့်ကို တိုင်ကြားထားပါတယ်။
ထောက်ပံ့ကြေးရသူတွေအထဲမှာ တိုက်ပိုင် ကားပိုင်ရှိတဲ့သူတွေပါသလို တကယ်မရှိတဲ့ ဆင်းရဲသားတွေကျန်နေပြီး ထောက်ပံ့ကြေးဟာလည်း နိုင်ငံတော်ကပေးတဲ့ ကျပ် ၂၀,၀၀၀ နှုန်း အပြည့်မရဘဲ ကျပ် ၁၅,၀၀၀ နှုန်းသာ ပေးတယ်လို့ ဒေသခံတွေက ပြောပါတယ်။
ဇီးတောကျေးရွာနေ ဒေါ်တူးက "မကျေနပ်ကျတာတော့ အမှန်ပဲ။ ၂၀,၀၀၀ ပေးမယ်ပြောပြီးတော့ ၁၅,၀၀၀ ပဲပေးတယ်လေ။ ကျမလည်း မကျေနပ်ဘူး။ တကယ်မရှိဆင်းရဲတာမှ ဘယ်မှကိုမ သွားနိုင်ဘူး"လို့ ပြောပါတယ်။
ဒေသခံ ဒေါ်စိုးတင်ကလည်း"ဆန် ဆီ ဆား ပေးတုန်းက ကျမတို့ မရဘူး။ မရလို့သွားပြောမှ ၁၅,၀၀၀ ကျမှ ပေးပါတယ်။ အဲဒါပေးပြီးနောက် ၂၀,၀၀၀ ဆိုတာကလည်း ၁၅,၀၀၀ ပဲပေးပါတယ်။ ပိုက်ဆံ ၁၅,၀၀၀ ကို လက်မှတ်ထိုးယူခဲ့ရတာ။ ၂၀,၀၀၀ လိုချင်ရင် ယင်းမာပင်သွားထုတ်လို့ ခိုင်းပါတယ်" ပြောပါတယ်။
ထောက်ပံ့ကြေးမရတဲ့ လက်လုပ်လက်စား ဦးအောင်စိုးလင်းကလည်း "တိုက်ပိုင် ကားပိုင် တောင်သူတွေပဲပေးသွားတာ။ သူတို့တွေပဲရပြီး လက်လုပ်လက်စားတွေ မရဘူးဆိုမှတော့ စဉ်းစားကြည့်အုံးလေ။ အဆင့်အတန်းဘယ်လိုခွဲခြားသလဲဆိုရင်။ တကယ်တမ်းကျ မရှိဆင်းရဲသား ထောက်ပံ့ပေးတဲ့ဟာကို။မိသားစုအတွက် နိုင်ငံတော်ကထောက်ပံ့ကြေးဆိုတာတော့ လိုချင်တာပေါ့။ အထက်ကမှန်တာလုပ်ပေမဲ့ အောက်ကမှ မမှန်တာကို"လို့ ပြောပါတယ်
ထောက်ပံ့ကြေးပေးတာ အပြည့်အဝမရရှိတာနဲ့ပတ်သက်ပြီး ယင်းမာပင်မြို့နယ် အထွေထွေအုပ်ချုပ်ရေးဦးစီးဌာနအပါအဝင် သက်ဆိုင်ရာအဆင့်ဆင့်ကို ဒေသခံပြည်သူတွေက တိုင်ကြားထားပါတယ်။
ဒီကိစ္စနဲ့ပတ်သက်ပြီး ဇီးတောကျေးရွာအုပ်စု အုပ်ချုပ်ရေးမှူး ဦးအောင်မြင့်အေးက "အဲဒါက ဒီလိုပါ။ ရွာလယ်ကနေ ရေဆိုးထုတ်မြောင်းဖောက်တာရှိတယ်။ လွှတ်တော်က သိန်း ၂၀ ချပေးထားတယ်။ ကျေးရွာက သိန်း ၂၀ စိုက်ရမှာပေါ့။ ဒီနှစ်က ပွဲမဖြစ်တာရော သီးနှံစျေးမကောင်းတာရော ရွာထဲကမထည့်ဝင်နိုင်တာနဲ့ ထောက်ပံ့ကြေးကို ကျပ် ၅,၀၀၀ ဆီလှူမယ်ဆိုပြီး အကုန်လှူကြတာပေါ့။ ၅,၀၀၀ ဆီလှူတဲ့အတွက် ၁၅,၀၀၀ ဆီဖြစ်သွားတာပါ"လို့ ပြောပါတယ်။
အခြေခံလူတန်းစားတွေအတွက် အစိုးရကပေးတဲ့ ထောက်ပံ့ကြေးကို ရပ်ကျေးအာဏာပိုင်တွေက အပြည့်အဝမပေးတာဟာ အဂတိလိုက်စားမှုပုံစံမျိုးဖြစ်နေတဲ့အတွက် နောက်နောင်မလုပ်ရဲအောင် ထိုက်သင့်တဲ့ အပြစ်ဒဏ်ပေးပြီး အရေးယူစေချင်တယ်လို့ ဒေသခံ ဦးမြင့်လွင်က ပြောပါတယ်။
ဌေးလှိုင်
