COVID-19 ဓာတ်ခွဲအတည်ပြုလူနာ အသစ် ၆ ယောက် ထပ်တွေ့ရပြီး ၁ ယောက်ထပ်ပြီး သေဆုံးသွားတယ်လို့ ကျန်းမာရေးနဲ့ အားကစားဝန်ကြီးဌာနက ဒီမနက်မှာ ထုတ်ပြန်ပါတယ်။
ဧပြီ ၁၇ ရက် မနေ့က တိုင်းနဲ့ပြည်နယ်အသီးသီးက ပေးပို့ထားတဲ့ COVDI-19 စောင့်ကြည့်လူနာ ၁၇၇ ယောက်နဲ့ အသွားအလာကန့်သတ် တားမြစ်ထားသူ ၂၀၁ ယောက်ရဲ့ ဓာတ်ခွဲနမူနာတွေကို စစ်ဆေးခဲ့တာပါ။
အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) ကနေ ညဘက်မှာ ဓာတ်ခွဲစစ်ဆေးအဖြေတွေ ထုတ်ပြန်ချက်အရ ၆ ယောက်မှာ ရောဂါပိုးတွေ့ခဲ့တာ ဖြစ်ပါတယ်။
မနေ့က ပထမအသုတ် စစ်ဆေးခဲ့တဲ့ ၉၃ ယောက်ထဲမှာ ၃ ယောက်မှာ ပိုးတွေ့တာကြောင့် မနေ့က စစ်ဆေးခဲ့တာတွေကနေ ၉ ယောက် အသစ်တိုးလာတာပါ။
ဒါကြောင့် လက်ရှိမှာ COVDI-19 ရောဂါ ဓာတ်ခွဲအတည်ပြုလူနာ ၉၄ ယောက်ရှိခဲ့ပြီ ဖြစ်ပါတယ်။
ဧပြီ ၁၇ ရက်မှာ ဓာတ်ခွဲအတည်ပြုခဲ့တဲ့ အင်းစိန်ဆေးရုံကြီးက ဓာတ်ခွဲအတည်ပြု လူနာတွေထဲက အသက် ၇၈ နှစ်အရွယ် လူနာတယောက်ဟာ ဒီနေ့ မနက်အစောပိုင်း ၂ နာရီကျော်က သေဆုံးခဲ့ပါတယ်။
သူဟာ ဆီးချိုနဲ့သွေးတိုးရောဂါအခံရှိသူဖြစ်ပြီး ဧပြီ ၁၃ ရက်နေ့မှာ ရောဂါလက္ခဏာတွေ ခံစားရတာကြောင့် ဧပြီ ၁၅ ရက်မှာ အင်းစိန်ဆေးရုံကြီးကို တက်ရောက်ခဲ့ရပါတယ်။
သူ့ကို ရောဂါဓာတ်ခွဲအတည်ပြုပြီးနောက် ဧပြီ ၁၇ ရက်နေ့မှာ ဝေဘာဂီဆေးရုံကြီး အထူးကြပ်မတ်ကုသဆောင်ကို လွှဲပြောင်းကုသနေခဲ့တယ်လို့ ကျန်းမာရေးဌာနက ထုတ်ပြန်ထားပါတယ်။
သူ သေဆုံးရတဲ့ အကြောင်းရင်းကတော ပြင်းထန်အဆုတ်ရောင်ရောဂါ(COVID-19)ကြောင့် ရုတ်တရက် အသက်ရှူလမ်းကြောင်း ပျက်စီးတာနဲ့ သွေးတိုးရောဂါအခံနဲ့ ဆီးချိုရောဂါတို့ကြောင့် ဖြစ်တယ်လို့လည်း ဆိုပါတယ်။
ဒါကြောင့် သေဆုံးလူနာ စုစုပေါင်းဟာ ၅ ယောက်ရှိလာပြီ ဖြစ်ပါတယ်။
လက်ရှိမှာတော့ ဝေဘာဂီအထူးကုဆေးရုံကြီးမှာ ကုသပေးနေတဲ့ လူနာ ၃ ယောက်ကို အထူးကြပ်မတ် ကုသဆောင်မှာ ကုသပေးနေပြီး လက်ရှိ အတည်ပြုလူနာတွေနဲ့ ပတ်သက်တဲ့ သတင်းအကျယ်ကို ထပ်ပြီး ထုတ်ပြန်ပေးသွားမယ်လို့ ဆိုပါတယ်။
