ကျန်းမာရေးနဲ့အားကစားဝန်ကြီးဌာနရဲ့ ဧပြီ ၁၆ရက် မနက်ပိုင်းထုတ်ပြန်တဲ့ COVID-19 ရောဂါ ဓာတ်ခွဲအတည်ပြုလူနာ ၁၁ ယောက်စာရင်းမှာ ပါဝင်လာကြောင်း အဆိုတော် နီတာက ဒီဗွီဘီကိုပြောပါတယ်။
မတ်လ ၂၉ ရက်က ၈ မိုင်နားက ဘုရားကျောင်းတခု Live အစီအစဉ်မှာ ပိုးတွေ့လူနာနဲ့ ထိတွေ့ခဲ့တဲ့ အဆိုတော်နီတာဟာ သူ့ရဲ့ဓာတ်ခွဲနမူနာကို ပေးပို့စစ်ဆေးခဲ့ရာမှာ COVID-19 ရောဂါ ပိုးတွေ့ရှိခဲ့တာပါ။
Live အစီအစဉ်မှာ အနုပညာရှင်တချို့ပါပါပြီး ၊ လတ်တလောတွင် သရုပ်ဆောင်တစ်ဦးဖြစ်တဲ့ သီရိရှင်းသန့်ကလည်း စစ်ဆေးမှုခံယူထားပြီး ဒီကနေ့ဓာတ်ခွဲအဖြေမှာ Negative ဖြစ်ခဲ့တယ်လို့ သူရဲ့ လူမှုကွန်ရက်စာမျက်နှာမှာ ဖော်ပြပါတယ်။
အဆိုတော်နီတာဟာ ဧပြီ ၁ ရက်ကနေ ၈ ရက်နေ့အထိဖျားခဲ့ကြောင်း၊ နေအိမ်မှာ နေနေရာက နေကျန်းမာရေးဝန်ကြီးဌာနကို အကြောင်းကြားပြီးနောက် ဧပြီ ၁၄ရက်နေ့ကစပြီး အင်းစိန်ဆေးရုံမှာ စောင့်ကြည့်လူနာအဖြစ်တက်ခဲ့ကြောင်း၊ အခုလက်ရှိမှာတော့ ဝေဘာဂီဆေးရုံကို လွှဲပြောင်းပြီး ဆေးကုသမှုခံယူနေကြောင်းနဲ့ လက်ရှိမှာ ကျန်းမာရေးအခြေအနေ ကောင်းမွန်နေတယ်လို့ ဆိုပါတယ်။
မြန်မာတနိုင်ငံလုံးမှာ ဒီနေ့မနက်အထိ COVID-19 ရောဂါ ဓာတ်ခွဲအတည်ပြုလူနာ စုစုပေါင်း ၈၅ ဦးရှိပြီဖြစ်ပြီး ဓာတ်ခွဲအတည်ပြုလူနာသစ် (၁၁) ဦးကို သက်ဆိုင်ရာဆေးရုံတွေကို လွှဲပို့ကုသမှုပေးသွားမယ်လို့ ကျန်းမာရေးနဲ့အားကစားဝန်ကြီးဌာနကထုတ်ပြန်ထားပါတယ်။
