မန်နေဂျာ ဂျိုဆေးမော်ရင်ဟိုဟာ ၁၃ နှစ်ကြာပြီးနောက် ရီးရဲလ်မက်ဒရစ်အသင်းထံ နည်းပြသစ်အဖြစ် ပြန်လည်ရောက်ရှိလာဖို့ နောက်ဆုံးအဆင့် ဆွေးနွေးမှုတွေ ပြုလုပ်နေပါတယ်။

ရီးရဲလ်ဥက္ကဋ္ဌ ဖလောရန်တီနိုပီရက်ဇ်ဟာ မီဒီယာတွေ၊ ဒိုင်လူကြီးတွေအပေါ် စစ်ကြေညာရင်း ကလပ်အသင်းရဲ့ အကျပ်အတည်းကို ထိန်းချုပ်ဖို့ စည်းကမ်းတင်းကျပ်တဲ့ မော်ရင်ဟိုကို ပြန်လည်ခေါ်ယူရန် ရွေးချယ်ခဲ့တာပါ။

လက်ရှိရီးရဲလ်အသင်းဟာ ၂ ရာသီဆက် အဓိကဆုဖလား လွဲချော်ထားပြီး ဝတ်လဲခန်းအတွင်း ဘာပေနဲ့ ဗီနီစီးယပ်စ်တို့ကြား ပြဿနာများရှိနေလို့ အသင်းတွင်း စည်းလုံးမှု ပျက်ပြားနေပါတယ်။

မော်ရင်ဟိုဟာ အရင်က အသင်းကြီးတွေမှာ ပြဿနာတွေနဲ့ လမ်းခွဲခဲ့ဖူးပေမဲ့ ပီရက်ဇ်ကတော့ အသင်းရဲ့ အာဏာစက်ကို ပြန်လည်ထိန်းကျောင်းနိုင်ဖို့ 'The Special One' ကို အပြည့်အဝ ယုံကြည်အားကိုးလို့ နေပါတယ်။