အဂတိလိုက်စားမှုဥပဒေနဲ့ တရားစွဲခံရတဲ့ တနင်္သာရီတိုင်း၀န်ကြီးချုပ် ဒေါက်တာလဲ့လဲ့မော်နဲ့ GGS ကုမ္ပဏီမှ တာ၀န်ရှိသူ ၃ ဦးအမှု ဒီဇင်ဘာလ ၁၆ ရက်နေ့ရုံးချိန်းမှာ တရားလိုပြသက်သေ ၂ ဦး စစ်ဆေးပြီးနောက် စွဲချက်တင်သင့်၊ မသင့် ကြားနာမယ်လို့ တနင်္သာရီတိုင်းဒေသကြီးတရားလွှတ်တော်၊ တရားရေးဦးစီးမှူး ဒေါ်အေးအေးသန်းက ပြောပါတယ်။
အဆိုပါရုံးချိန်းမှာ ရာဇ၀တ်ကြီးအမှုအမှတ်(၂/၂၀၁၉) တရားလိုပြသက်သေများဖြစ်ကြတဲ့ အထွေထွေအုပ်ချုပ်ရေဦးစီးဌာန၊ ဒုတိယညွှန်ချုပ်(အငြိမ်းစား) ဦးကောင်းစံဦးနဲ့ ထား၀ယ်လေဆိပ်တာ၀န်ခံ ဦးစီးအရာရှိ ဦးမြင့်လှိုင်တို့ကို စစ်ဆေးဖို့ ချိန်းဆိုထားတယ်လို့ ဆိုပါတယ်။
“အမှု ၄ မှုစလုံးက တရားလိုပြသက်သေတွေကို စစ်ဆေးပြီးရင်တော့ စွဲချက်တင်သင့်၊ မသင့် လျှောက်လဲချက် ကြားနာမှာ ဖြစ်ပါတယ်” လို့ ဒေါ်အေးအေးသန်းက ပြောပါတယ်။
ဒီဇင်ဘာ ၂ ရက်နေ့အထိ စစ်ဆေးပြီး တရားလိုပြသက်သေဦးရေ ၉၄ ဦးထဲမှာ ၃ ဦးတို့ကို ပယ်ပြီး အမှုမှ အထက်ပါတရားလိုပြသက်သေ ၂ ဦးကို စစ်ဆေးဖို့ ကျန်တော့တယ်လို့ သိရပါတယ်။
ဒီဇင်ဘာ ၂ ရက်နေ့ ရုံးချိန်းမှာတော့ တရားလိုပြသက်သေ အမှုစစ် အဂတိလိုက်စားမှုတိုက်ဖျက်ရေးကော်မရှင် ညွှန်ကြားရေးမှူး ဦးသန်းဇော်၀င်းကို စစ်ဆေးခဲ့ပါတယ်။
တနင်္သာရီတိုင်း ဝန်ကြီးချုပ်ဟောင်း ဒေါ်လဲ့လဲ့မော် အပါအဝင် GGS ကုမ္ပဏီမှ တာ၀န်ရှိသူ ၃ ဦးဖြစ်တဲ့ ဦးသိန်းထွေး၊ ဦးအောင်မြတ်နဲ့ ဦးသူရအုံတို့ကို အဂတိလိုက်စားမှုတိုက်ဖျက်ရေးဥပဒေ ပုဒ်မ ၅၅၊ ပုဒ်မ ၅၅/၆၆ တို့နဲ့ တရားစွဲထားတာလည်း ဖြစ်ပါတယ်။
ထား၀ယ်လေယာဉ်ကွင်းအတွင်း ချုံနွယ်ရှင်းလင်းတဲ့ လုပ်ငန်းကို ခွင့်ပြုငွေကျပ်သိန်း ၄၀၀၀ သုံးစွဲတဲ့ကိစ္စ။ ပြည်ထောင်စုအစိုးရအဖွဲ့ ညွှန်ကြားချက်မရှိဘဲ လမ်းဦးစီးဌာနကို တလုံးတခဲတည်း ငွေကျပ် ၁ ဒသမ ၉ ဘီလီယံခန့် ထုတ်ယူရန် အခွင့်အရေးပေးတာနဲ့ ဦးမြင့်ဟိုအမည်နဲ့ ၀ယ်ယူထားတဲ့ ထား၀ယ်မြို့၊ ဆေးရုံလမ်းနဲ့ ဂေါ်သဇင်လမ်းထောင့် ရှိအိမ်အမှတ် (၁၀၆၈) နဲ့ (၁၀၇၀) မြေ ကွက်နှစ်ကွက်ကို အုတ်ခြံစည်းရိုးကာရံခိုင်းတဲ့ ကိစ္စ။ ၀န်ကြီးချုပ် မိသားစုပိုင် သရက်ချောင်းက အိမ်အမှတ်-၆၊ နှစ်ထပ်နေအိမ်နဲ့ မြေကို ကာလတန်ဖိုးကျပ် ၃၂၀ သိန်း ကျော်ခန့်သာ တန်ဖိုးရှိပေမယ့် ကျပ်သိန်း ၂၀၀၀ နဲ့ GGS ကုမ္ပဏီကို ရောင်းချခဲ့တာနဲ့ လုပ်ပိုင်ခွင့်တွေပေးတဲ့ကိစ္စ၊ သဘာ၀ဓာတ်ငွေ့ဖိုး ကျပ်သန်း ၈၀၀၀ ကျော်ကို GGS ကုမ္ပဏီဘက်က ပေးချေဖို့ ပျက်ကွက်တဲ့ကိစ္စ စတဲ့ အမှုတွဲ ၄ မှုနဲ့ တရားစွဲဆိုထားတာပါ။
တင့်လွင်
