မန္တလေးမြို့ ပြည်ကြီးတံခွန်မြို့နယ်တရားရုံး ဆိုင်းဘုတ်ကို ဖိနပ်နဲ့ ပစ်ပေါက်ခဲ့တဲ့ ရှေ့နေဦးဇော်ဝင်းကို ပြည်ကြီးတံခွန်မြို့နယ်တရားရုံးက ဒီကနေ့ အလုပ်ကြမ်းနဲ့ထောင်ဒဏ် ၂ နှစ် အမိန့်ချမှတ်လိုက်ပါတယ်။
ရှေ့နေဦးဇော်ဝင်းက “ဒီတရားစီရင်ရေးဟာ တရားမျှတမှုကို ရှေ့မရှုဘူး အများပြည်သူအတွက်ရှေ့မရှုတဲ့အတွက် ကျနော်က ဘာမှပြော စရာမရှိဘူး။ ဒီချတဲ့အမိန့် စွဲချက်အမိန့်တွေကိုခရိုင်ပြင်ဆင်ချက်မတက်ဘူး။ ခု ဒီအမိန့်ကိုလည်း ကျနော်တို့အယူခံမတက်ဘူး။ ဒီအောက်ခြေမှာတောင်မှ ဥပဒေနဲ့အညီခုခံလို့ မရဘူး။ သက်သေခံ ပစ္စည်းကို လဲထားသေးတယ်။ အခုကျနော်ကို ထောင် ၂ နှစ်ချလိုက်တာဟာ အမြင့်ဆုံးပြစ်ဒဏ်ဖြစ်တယ်” ပြောပါတယ်။
ဦးဇော်ဝင်းကို ပြည်ကြီးတံခွန်မြို့နယ် ဒုတိယအထွေထွေအုပ်ချုပ်ရေးမှူး ဦးကျော်စိုး က တရားလိုပြုလုပ်ပြီး နိုင်ငံတော်အကြည်အညိုပျက်စေမှု ပုဒ်မ၅၀၅(ခ)နဲ့တရားရုံးဦးတိုက် လျှောက်ခဲ့တဲ့အမှုကို ဒီကနေ့ အပြီးသတ် အမိန့်ချမှတ်ခဲ့တာ ဖြစ်ပါတယ်။
ဦးဇော်ဝင်းကို စွဲဆိုထားတဲ့အမှု အားလုံးပေါင်း ၃ မူရှိပြီး ၂ မှု ကျန်ရှိပါသေးတယ်။ ဒီအထဲက တမှုကတော့ တရားရုံးကိုစော်ကားလို့ဆိုပြီး ဒုမြို့နယ်တရားသူကြီးက ရာဇသတ်ကြီးပုဒ်မ ၂၉၄၊ ၃၅၃၊ ၂၂၈၊ ၅၀၆ အရတရားစွဲထားတာပါ။
ဒုတိယ အမှုကတော့ ဒုရဲမှူး ခင်မောင်ဇော်ကနေ ဦးဇော်ဝင်းကို ရာဇသတ်ကြီး ပုဒ်မ ၂၉၄၊ ၃၅၃ နဲ့တရားစွဲဆိုထားဖြစ်ပြီး ဒီနှစ်မှုကို တရားလိုပြသက်သေတွေကို စစ်ဆေးဆဲပဲလို့ ပြည်ကြီးတံခွန်မြို့နယ် တရားသူကြီးဦးအောင်ကျော်ဦး က ပြောပါတယ်။
ပြည်ကြီးတံခွန်မြို့နယ် တွဲဘက်တရားသူကြီးဒေါ်စုသက်ငုံကလည်း ဦးဇော်ဝင်းကို ရာဇသတ်ကြီးဥပဒေပုဒ်မ ၂၉၄/၃၅၃/၂၂၈/၅၀၆/ တို့နဲ့အတူ ဒုရဲမှူး ခင်မောင်ဇော်က ပုဒ်မ ၂၉၄ /၃၅၃တို့နဲ့ တရားစွဲဆိုထားတာတွေကိုလည်း ဒီဇင်ဘာ ၄ ရက်နေ့မှာ ဆက်လက်စစ်ဆေးဖို့ ရှိပါတယ်။
ရှေ့နေဦးဇော်ဝင်းဟာ မန္တလေးမြို့ ပြည်ကြီးတံခွန်မြို့နယ် တရားရုံးမှာ ၂၀၁၈ ခုနှစ် မတ်လ ၁၅ ရက်နေ့က တရားရုံးမထေမဲ့မြင်မှုကို ပြန်လည်ချေပခွင့်မပေးပဲ ထောင်ဒဏ် လေးလ ချမှတ်လိုက်တာကြောင့် တရားခွင်စစ်ဆေးပြီးချိန်မှာ တရားခွင်ရှေ့က ဆိုင်းဘုတ်ကို ဖိနပ်နဲ့ ပစ်ပေါက်ခဲ့တာကြောင့် တရားစွဲခံရတာ ဖြစ်ပါတယ်။
