ဖိလစ်ပိုင်နိုင်ငံကို ရောက်ရှိနေတဲ့ မြန်မာနိုင်ငံသားတွေ နိုင်ငံကူးလက်မှတ် ပတ်စ်ပို့စ် သက်တမ်းတိုးရာမှာ ၅ နှစ်နဲ့အထက် ပြတ်တောက်ရင် မြန်မာပြည်ပြန်ပြီးလုပ်ရမယ်လို့ ဖိလစ်ပိုင်ရှိ စစ်အာဏာရှင်လက်အောက်ခံသံရုံးက နို၀င်ဘာ ၁၀ ရက် ထုတ်ပြန်ပါတယ်။

မြန်မာနိုင်ငံသားတွေအနေနဲ့ ပတ်စ်ပို့စ်သက်တမ်းတိုး လျှောက်ထားရာမှာ သာမန် နိုင်ငံကူးလက်မှတ် (အနီ) သက်တမ်း ၂ နှစ်နဲ့ အထက် ပြတ်တောက်နေရင် သက်တမ်းပြတ်ဒဏ်ကြေးအဖြစ် အမေရိကန် ၁၅ ဒေါ်လာ ပေးဆောင်ရမယ်လို့ ဖော်ပြပါတယ်။

သာမန်မြန်မာနိုင်ငံကူးလက်မှတ် သက်တမ်းမကုန်မီ ၁ နှစ်နဲ့အထက် ကြိုတင်သက်တမ်းတိုးဖို့ လျှောက်ထားရင် ဒဏ်ကြေး ပေးဆောင်ရန် မလိုအပ်ပေမဲ့ သက်တမ်း ၅ နှစ်နဲ့အထက် ပြတ်တောက်ရင် တကြိမ် တခါသုံး ဘယ်သူဘယ်ဝါဖြစ်ကြောင်း သက်သေခံလက်မှတ် (CI) ကို မြန်မာသံရုံးမှာ လျှောက်ထားရမယ်လို့ ဆိုပါတယ်။

CI လျှောက်ထား ရယူပြီး ပတ်စ်ပို့စာအုပ် သက်တမ်းတိုးတာကို မြန်မာပြည် ပြန်ပြီး ဆောင်ရွက်ရမယ်လို့လည်း သတိပေးထားပါတယ်။

PJ အမျိုးအစား ပတ်စ်ပို့စ်လျှောက်ထားသူတွေအနေနဲ့ မြန်မာသံရုံးမှာ သက်တမ်းတိုးရင် ဝင်ငွေခွန် ၂ ရာခိုင်နှုန်းအပြင် တရားဝင်ငွေလွှဲစနစ်နဲ့ ရရှိလစာရဲ့ ၂၅ ရာခိုင်နှုန်းကို မိသားစုလွှဲပို့ငွေအဖြစ် လွှဲထားတဲ့ ၃ လစာငွေစလစ်ကို အထောက်အထားနဲ့ ပူးတွဲတင်ပြရမယ်လို့ မြန်မာသံရုံးရဲ့ ထုတ်ပြန်ချက်မှာ ဖော်ပြပါတယ်။

ဘန်ကောက်၊ စင်ကာပူ၊ ကွာလာလမ်ပူ၊ ဆိုးလ်နဲ့ တိုကျိုမှာ ရှိတဲ့ စစ်အာဏာရှင်လက်အောက်ခံ သံရုံးတွေကလည်း PJ လက်မှတ်ကိုင်ဆောင်ထားတဲ့ မြန်မာနိုင်ငံသားတွေ ပတ်စ်ပို့စ်သက်တမ်းတိုးရာမှာ ဝင်ငွေခွန် ၂ ရာခိုင်နှုန်း ပေးဆောင်ရမဲ့အပြင် မိသားစုထံ ၂၅ ရာခိုင်နှုန်း ၃ လစာ ငွေလွှဲပို့ထားတဲ့ အထောက်အထားတွေကို တင်ပြရမယ်လို့ ထုတ်ပြန်ထားပါတယ်။