မွန်ပြည်နယ် သံဖြူဇရပ်မြို့နယ် ရေး-သံဖြူဇရပ်ကားလမ်းမှာ မေလ ၁၄ ရက် မနက် ၈ နာရီခွဲက သတ်ဖြတ်ခံထားရတဲ့ အမျိုးသား ၃ ယောက် အလောင်းကို တွေ့ရှိတာကြောင့် စစ်အာဏာရှင်တပ်နဲ့ရဲတွေက စစ်ဆေးနေတယ်လို့ မြို့ခံတွေက သိရပါတယ်။

ဒီကနေ့ မနက် ၈ နာရီခွဲက ရေး-သံဖြူဇရပ်ကားလမ်း စမ်းကြီးကျေးရွာအပိုင် မရှိခဏဘုရားနဲ့ ဦးခွေး+ဒေါ်ယိမ်းကျေးရွာကြားရှိ ရော်ဘာခြံတခြံရှေ့မှာ သတ်ဖြတ်ခံထားရတဲ့ အမျိုးသားအလောင်း ၃ လောင်း တွေခဲ့တာလို့ ဒေသခံတယောက်က DVB ကို ပြောပါတယ်။

“စမ်းကြီးရွာခံတယောက်က မရှိခဏဘုရားနားမှာ လက်ပြန်ကြိုးတွေတုပ်ပြီး အသတ်ခံရတဲ့ လူ ၃ ယောက်အလောင်းတွေ့လို့ အုပ်ချုပ်ရေးကို အကြောင်းကြားတာ၊ အုပ်ချုပ်ရေးကတဆင့် ရဲနဲ့စစ်တပ်ကို အကြောင်းကြားလိုက်တာ။” 

သေဆုံးသူ ၃ ယောက်မှာ သံဖြူဇရပ်မြို့နယ် အောင်ချမ်းသာရပ်ကွက် ဘူတာအနီးရှိ မွန်အေးရိပ်တည်းခိုခန်းမှာ တည်းခိုနေထိုင်သူတွေဖြစ်ပြီး သေနတ်နဲ့ပစ်သတ်ခံရတာလို့ သံဖြူဇရပ်ရဲစခန်းနဲ့နီးစပ်တဲ့ သတင်းအရင်းအမြစ်က DVB ကို ပြောပါတယ်။

“တည်းခိုခန်းက သူတို့တွေက ပဲခူတိုင်းကနေ သံဖြူဇရပ်မှာ ရေနံချေးလာသုတ်တာလို့ ပြောတယ်။ သေတဲ့ ၃ ယောက်စလုံးရဲ့ အသက်က ၂၆ နဲ့ ၂၇ ကြားလူငယ်တွေ။ ၃ ယောက်စလုံး စစ်သားဆံပင်ပုံစံ ကေတွေနဲ့ဆိုတော့ ပြောရခက်တယ်။ မနေ့ကညက တည်းခိုးခန်းကထွက်သွားပြီး ပြန်မလာဘဲ ဒီကနေ့ မနက်မှာ သေနတ်နဲ့ပစ်သတ်ထားတဲ့ အလောင်းကို လာပစ်သွားတာ။” 

သေဆုံးဆုံး ၃ ယောက်မှာ ပဲခူးတိုင်း ဒိုက်ဦးမြို့နယ် ရွှေအင်ဒုံကျေးရွာမှာ နေထိုင်တဲ့ ကိုဌေးအောင်၊ ပြွန်တန်ဆာမြို့နယ် မြို့မ ၂ ရပ်ကွက် ကျောင်းစုရပ်နေ ကိုအောင်ပြည်စုံ နဲ့ ကိုရဲထက်အောင်တို့ ဖြစ်တယ်လို့ သတင်းအရင်းအမြစ်က ဆက်ပြောပါတယ်။

လတ်တလောမှာ သံဖြူဇရပ်မြို့နယ် ရေး-သံဖြူဇရပ်ကားလမ်းတလျှောက်ကို စစ်တပ်နဲ့ရဲတွေက စစ်ဆေးနေပြီး အောင်ချမ်းသာရပ်ကွက် နဲ့ စမ်းကြီးကျေးရွာနေသူတွေကိုလည်း မေးမြန်းတာတွေရှိတယ်လို့ မြို့ခံတွေဆီက သိရပါတယ်။