ရုရှားက ယူကရိန်းနဲ့ ငြိမ်းချမ်းရေးဆွေးနွေးပွဲတွေ ကျင်းပဖို့ အသင့်ရှိနေတယ်လို့ ရုရှားသမ္မတ ဗလာဒီမာပူတင်က ဇွန် ၂၃ ရက်မှာ ပြောလိုက်ပါတယ်။

ဆွေးနွေးပွဲတွေက ၂၀၂၂ ခုနှစ်က အစ္စတန်ဘူလ် ဆွေးနွေးပွဲမှာ ရခဲ့တဲ့ သဘောတူညီချက်တွေနဲ့ ၂၀၂၅ ခုနှစ်က အန်ကောရေ့ဂျ်မြို့မှာ အမေရိကန်သမ္မတ ဒေါ်နယ်ထရမ့်ပ်နဲ့ တွေ့ချိန်က ရခဲ့တဲ့ သဘောတူညီချက်တွေအပေါ် အခြေခံသင့်တယ်လို့ ပူတင်က ပြောပါတယ်။

ငြိမ်းချမ်းရေးဆွေးနွေးပွဲတွေ ပြန်စရင် “အင်အားရှိတဲ့ အနေအထား” ကနေ ဆွေးနွေးနိုင်ဖို့ ယူကရိန်းက ရုရှားအပေါ် တိုက်ခိုက်နေတယ်လို့လည်း ပူတင်က ထပ်လောင်းပြောခဲ့ပါတယ်။

၂၀၂၆ ခုနှစ် ဇွန် ၁၂ ရက်ကနေ ၂၂ ရက်အထိ ရိုက်ကူးထားတဲ့ ဂြိုဟ်တုပုံရိပ်တွေထဲမှာ ခရိုင်းမီးယားနဲ့ ရုရှားနိုင်ငံ အစိတ်အပိုင်းတချို့က လမ်းတွေ၊ တံတားတွေနဲ့ ရေနံသိုလှောင်ရုံတွေ အပါအဝင် ရုရှား အခြေခံအဆောက်အအုံတွေ ပျက်စီးနေတာကို ပြသထားပါတယ်။

လတ်တလော သီတင်းပတ်တွေအတွင်း ယူကရိန်းက ရှေ့တန်းစစ်မျက်နှာရဲ့ နောက်ကွယ်မှာ ရုရှား စစ်ရေးထောက်ပံ့ပို့ဆောင်ရေးကို ပစ်မှတ်ထား တိုက်ခိုက်တာတွေ တိုးချဲ့လုပ်ဆောင်နေတာပါ။

ရုရှားအစိုးရရဲ့ စစ်ယန္တရားကို ချေမှုန်းပြီး စစ်ပွဲ အားသာချက်ကို ယူကရိန်းအစိုးရဘက်ဆီ လွှဲပေးဖို့ ကြိုးပမ်းနေပါတယ်။

မာရီယူပိုလ် အပါအဝင် ရုရှားသိမ်းပိုက်ထားတဲ့ ဒန်ညက်စ်ဒေသ အရှေ့ပိုင်းက အရေးကြီးတဲ့ လမ်းမတွေပေါ်မှာ လပေါင်းများစွာကြာအောင် တိုက်ခိုက်ပြီးတဲ့နောက် အခုတိုက်ခိုက်မှုတွေက ရုရှားထောက်ပံ့ရေးလိုင်းတွေ ရှေ့တန်းကို မရောက်အောင် အနှောင့်အယှက်ပေးဖို့ စနစ်တကျ ကြိုးပမ်းချက် ဖြစ်ပါတယ်။

ရုရှားအစိုးရရဲ့ ရေနံချက်စက်ရုံ အပါအဝင် အရပ်ဘက် အခြေခံအဆောက်အအုံတွေပေါ် ယူကရိန်းရဲ့ မကြာသေးမီက တိုက်ခိုက်မှုတွေကြောင့် ဓာတ်ဆီနဲ့ ဂျက်လေယာဉ်လောင်စာ တင်ပို့မှုကို ပိတ်ပင်ဖို့ ဖိအားဖြစ်ခဲ့ပါတယ်။

ယူကရိန်းစစ်တပ်က ရုရှားတပ်ဖွဲ့တွေသုံးတဲ့ မဟာဗျူဟာကျတဲ့ စစ်ရေး ထောက်ပံ့ပို့ဆောင်ရေး ဖြတ်ကျော်တံတားအဖြစ် ဖော်ပြထားတဲ့ ခရိုင်းမီးယား မြောက်ပိုင်း တူးမြောင်းပေါ်က ရထားလမ်းပါတဲ့ တံတားတစင်းကို ဇွန် ၂၃ ရက်မှာ ဖျက်ဆီးခဲ့ပါတယ်။

Source: Reuters