အာဖဂန်နစ္စတန်နိုင်ငံ၊ ဟီရတ်ပြည်နယ်မှာ အမျိုးသမီးအခွင့်အရေး ဆန္ဒပြပွဲတခုအပြီး ဇွန် ၉ ရက်က သေနတ်သံတွေ ထွက်ပေါ်လာလို့ လူတွေ လမ်းမပေါ်မှာ ထိတ်လန့်တကြား ထွက်ပြေးခဲ့ကြပါတယ်။
အမျိုးသမီးတွေ အဝတ်အစားဝတ်ဆင်မှု စည်းကမ်းဖောက်ဖျက်တယ်ဆိုတဲ့ စွပ်စွဲချက်နဲ့ တာလီဘန် ကိုယ်ကျင့်တရားထိန်းသိမ်းရေး ရဲတပ်ဖွဲ့က ဖမ်းဆီးခဲ့တာကြောင့် အခုလို အမျိုးသမီးအခွင့်အရေး ဆန္ဒပြပွဲ ဖြစ်ပွားခဲ့တာလို့ ဒေသခံတွေက ပြောပါတယ်။
မျက်မြင်သက်သေတွေရဲ့ ပြောကြားချက်အရ အာဖဂန်လုံခြုံရေးတာဝန်ရှိသူတွေဟာ ဆန္ဒပြပွဲကို အင်အားသုံး လူစုခွဲခဲ့တာကြောင့် လူအများအပြား ဒဏ်ရာရပြီး တယောက် သေဆုံးသွားခဲ့ပါတယ်။
အမျိုးသမီးတွေနဲ့ မိန်းကလေးငယ်တွေ အပါအဝင် လူပေါင်း ဒါဇင်နဲ့ချီပြီး ဖမ်းဆီးခံခဲ့ရတယ်လို့လည်း ဆိုပါတယ်။ တာလီဘန် အာဏာပိုင်တွေကတော့ ထိခိုက်သေဆုံးမှုနဲ့ ဖမ်းဆီးမှုတွေအပေါ် တစုံတရာ မှတ်ချက်ပေးခြင်း မရှိပါဘူး။
တာလီဘန်အဖွဲ့ဟာ ၂၀၂၁ ခုနှစ်မှာ ကဘူးလ်မြို့ကို သိမ်းပိုက်ပြီး အာဏာရလာကတည်းက စစ်ဒဏ်သင့် အာဖဂန်နစ္စတန်နိုင်ငံအတွင်းရှိ အမျိုးသမီးတွေနဲ့ မိန်းကလေးငယ်တွေရဲ့ ပညာသင်ကြားခွင့်၊ အလုပ်အကိုင်နဲ့ အားကစားကဏ္ဍတွေမှာ ပါဝင်ခွင့်တွေကို ပြင်းပြင်းထန်ထန် ကန့်သတ်ပိတ်ပင်ခဲ့လို့ နိုင်ငံတကာရဲ့ ဝေဖန်ရှုတ်ချမှုကို အကြီးအကျယ် ခံနေရပါတယ်။
Source: Reuters
