အမေရိကန်သမ္မတ ဒေါ်နယ်ထရမ့်ပ်က ဥရောပရဲ့ လူဝင်မှုကြီးကြပ်ရေး မူဝါဒတွေကို ပြင်းပြင်းထန်ထန် ဝေဖန်ခဲ့ပြီး၊ ဒီမူဝါဒတွေဟာ ဥရောပတိုက်တဝန်းမှာ ပြည်သူ့ဒေါသနဲ့ လူမှုရေး တင်းမာမှုတွေကို ဖြစ်ပေါ်စေခဲ့တယ်လို့ အောက်တိုဘာ ၂၅ ရက်မှာ ပြောပါတယ်။
Fox သတင်းဌာနရဲ့ တနင်္ဂနွေမနက် အနာဂတ်များအစီအစဉ်မှာ တင်ဆက်သူ လယ်ရီကဒ်လိုနဲ့ ဖုန်းအင်တာဗျူးအတွင်း ကြားဖြတ်ရွေးကောက်ပွဲ မတိုင်မီ ရီပတ်ဘလစ်ကန် မဲဆန္ဒရှင်တွေ စိတ်ဝင်စားနိုင်မဲ့ အကြောင်းအရာတွေကို ထည့်ပြောခဲ့တာပါ။
ပြောခဲ့တဲ့ အကြောင်းအရာတွေထဲမှာ လူဝင်မှုကြီးကြပ်ရေး၊ အီရန်နိုင်ငံအရေး၊ ကုန်ထုတ်လုပ်မှုဆိုင်ရာ ရင်းနှီးမြှုပ်နှံမှုနဲ့ ကျန်းမာရေးစောင့်ရှောက်မှု ကဏ္ဍတို့ ပါဝင်ပါတယ်။
ထရမ့်ပ်က ပြင်သစ်သမ္မတ အီမန်နျူရယ်မက်ခွန်းရဲ့ သမ္မတသက်တမ်း အစောပိုင်းကာလ ကတည်းက ပြင်သစ်နိုင်ငံနဲ့ ပြင်သစ် ယဉ်ကျေးမှုကိုမုန်းတဲ့ ရွှေ့ပြောင်းနေထိုင်သူတွေကို ဝင်ရောက်ခွင့်ပြုတာဟာ ပြင်သစ်နိုင်ငံအတွက် ထိခိုက်နစ်နာစေနိုင်တယ်လို့ သူက သတိပေးခဲ့ဖူးတယ်လို့ ထရမ့်ပ်က ပြောပါတယ်။
ဒါ့အပြင် အီရန်နိုင်ငံနဲ့ သဘောတူညီချက်တခု ရဖို့ ကြိုးပမ်းသင့်သလား ဒါမှမဟုတ် ပိုတင်းကျပ်တဲ့ ချဉ်းကပ်မှုမျိုး လုပ်သင့်သလားဆိုတာကို စဉ်းစားသုံးသပ်နေတယ်လို့ ထရမ့်ပ်က ပြောခဲ့ပြီး၊ ကမ္ဘာလုံးဆိုင်ရာ ရေနံသယ်ယူပို့ဆောင်ရေး လမ်းကြောင်း အဓိကကျတဲ့ ဟော်မုဇ်ရေလက်ကြားမှာ အမေရိကန်ရဲ့ လွှမ်းမိုးနိုင်စွမ်းကိုလည်း ထည့်ပြောခဲ့ပါတယ်။
လက်ရှိမှာ ထရမ့်ပ်အစိုးရအဖွဲ့အနေနဲ့ အဲဒီဒေသမှာ ကြီးမားတဲ့ ဩဇာလွှမ်းမိုးနိုင်စွမ်း ဒါမှမဟုတ် ညှိနှိုင်းရာမှာ အားသာချက် ရှိနေတယ်လို့ ထရမ့်ပ်က ပြောခဲ့ပြီး၊ ရွေးချယ်စရာလမ်းကြောင်းတွေက အီရန်အစိုးရနဲ့ သဘောတူညီချက် ရဖို့ ဒါမှမဟုတ် သူတို့ကို အပြီးတိုင် အနိုင်ယူချေမှုန်းဖို့ ဖြစ်တယ်လို့လည်း ပြောခဲ့ပါတယ်။
ဒါ့အပြင် ထရမ့်ပ်က အမေရိကန် ကျန်းမာရေးစောင့်ရှောက်မှုစနစ်ကို ကာကွယ်ပြောဆိုခဲ့ပြီး ကနေဒါနိုင်ငံရဲ့ အစိုးရထောက်ပံ့တဲ့ ကျန်းမာရေးစနစ်ကို ဆိုရှယ်လစ်စနစ် ကျင့်သုံးတဲ့ ဆေးကုသရေးစနစ်လို့ ပြောဆိုဝေဖန်ခဲ့ ပါတယ်။
ဒီစနစ်မှာ လူနာတချို့ဟာ ကုသမှုခံယူဖို့ အချိန်အကြာကြီး စောင့်ရတယ်လို့လည်း ထရမ့်ပ်က ပြောပါတယ်။
Source: Reuters
