ရုရှားရဲ့ တရားလက်လွန် ခြိမ်းခြောက်မှုတွေ ရှိနေပေမဲ့ ယူကရိန်းကို ဆက်လက်ထောက်ပံ့ပြီး ရုရှားအပေါ် ဖိအားဆက်ပေးမယ်လို့ ဗြိတိန်ဝန်ကြီးချုပ် အန်ဒီဘန်နမ်က ဩဂုတ် ၂၄ ရက်က သူ့ရဲ့ ပထမဆုံး ယူကရိန်းခရီးစဉ်မှာ ကတိပေးလိုက်ပါတယ်။

ဘန်နမ်ဟာ ကိယက်ဗ်မြို့မှာ ယူကရိန်းသမ္မတ ဗိုလိုဒီမာ ဇလန်းစကီးနဲ့ တွေ့ဆုံပြီး နိုင်ငံ ၃၄ နိုင်ငံ ပါဝင်တဲ့ “Coalition of the Willing” အစည်းအဝေးကို ဦးဆောင်ခဲ့ပြီး ဒီအစည်းအဝေးမှာ ရုရှားအပေါ် စီးပွားရေးဖိအား ပိုတိုးဖို့ အမေရိကန်ကွန်ဂရက်ကို ဘန်နမ်က တိုက်တွန်းခဲ့ပါတယ်။

ဗြိတိန်က SCALP ဒုံးကျည်မှာ သုံးထားတဲ့ ဗြိတိန်ထုတ်အစိတ်အပိုင်းတွေရဲ့ အသေးစိတ် ထုတ်လုပ်ရေးပုံစံတွေ (Blueprints) ကို ယူကရိန်းဆီ လွှဲပေးမှာဖြစ်ပါတယ်။

ဒီနည်းပညာနဲ့ ယူကရိန်းမှာ Storm Shadow ရဲ့ ပြင်သစ်ဗားရှင်းဖြစ်တဲ့ SCALP တာဝေးပစ် ခရုဇ်ဒုံးကျည်တွေ ကိုယ်တိုင်ထုတ်လုပ်နိုင်မှာ ဖြစ်ပါတယ်။

ဗြိတိန်ဟာ စစ်မီးထဲ လောင်စာထပ်လောင်းပြီး ငြိမ်းချမ်းရေးတိုးတက်မှုကို တားဆီးနေတယ်လို့  ကရင်မလင်ပြောခွင့်ရ ဒမီထရီ ပက်စ်ကော့ဗ်က စွပ်စွဲပါတယ်။

ယူကရိန်းမှာ တည်ဆောက်မဲ့ ဒုံးကျည်ထုတ်လုပ်ရေး နေရာတွေကို ဖော်ထုတ်ဖို့ ရုရှားစစ်တပ်က အချက်အလက်စုနေပြီး အဲဒီနေရာတွေကို ဖျက်ဆီးမယ်လို့ ပက်စ်ကော့ဗ်က ခြိမ်းခြောက်ပါတယ်။

ဒီစွပ်စွဲချက်ကို “မီးကို ဘယ်သူစရှို့ခဲ့တာလဲ” လို့ ဘန်နမ်က ပြန်လှန်မေးခွန်းထုတ်ခဲ့ပါတယ်။ 

ပက်ထရီယော့ ကြားဖြတ်ဒုံးကျည်တွေ အပါအဝင် ယူကရိန်းရဲ့ လေကြောင်းရန်ကာကွယ်ရေးကို အရေးပေါ်အားဖြည့်ဖို့ အစည်းအဝေးမှာ အဓိက ဆွေးနွေးခဲ့ပါတယ်။

ရုရှားရဲ့ စစ်ရန်ပုံငွေကို ကန့်သတ်ဖို့ ပိတ်ဆို့အရေးယူမှုတွေနဲ့ “အရိပ်သင်္ဘောအုပ်စု” ကို ပစ်မှတ်ထားမယ်လို့လည်း အဖွဲ့က ကတိပေးပါတယ်။

“ယူကရိန်းဟာ ဥရောပလုံခြုံရေးအတွက် ဝန်ထုပ်ဝန်ပိုးမဟုတ်ဘဲ ဥရောပကို ကာကွယ်ပေးနေတဲ့ ရှေ့တန်းနိုင်ငံဖြစ်တယ်” လို့ ဘန်နမ်က ပြောပါတယ်။