တရုတ်နိုင်ငံကို စျေးကွက်အခြေပြု စီးပွားရေးစနစ်ဆီ ဦးတည်ပြောင်းလဲရာမှာ အဓိကပါဝင်ခဲ့တဲ့ ဝန်ကြီးချုပ်ဟောင်း ကျူးရုန်ကျီးဟာ ဩဂုတ် ၁၂ ရက်က ပေကျင်းမှာ ကွယ်လွန်ခဲ့ပါတယ်။
နာမကျန်းဖြစ်ကာ ဆေးကုသမှုခံယူနေစဉ် အသက် ၉၇ နှစ်အရွယ်မှာ ကွယ်လွန်ခဲ့တာ ဖြစ်ပါတယ်။
တရုတ်မီဒီယာတွေကတော့ အာရှထုံးစံအတိုင်း မပြည့်သေးတဲ့အသက်အထိ တွက်တဲ့အတွက် ၉၈ နှစ်လို့ ဖော်ပြကြပါတယ်။
ကျူးရုန်ကျီးဟာ ၁၉၉၁ ခုနှစ်မှာ ဒုတိယဝန်ကြီးချုပ် ဖြစ်လာပြီး ၁၉၉၈ ကနေ ၂၀၀၃ ခုနှစ်အထိ ဝန်ကြီးချုပ်အဖြစ် တာဝန်ယူခဲ့ပါတယ်။
သမ္မတ ကျန်ဇီမင်း လက်ထက်မှာ တာဝန်ယူခဲ့တဲ့ ကျူးရုန်ကျီးဟာ အရှုံးပေါ်နေတဲ့ နိုင်ငံပိုင်လုပ်ငန်း ထောင်နဲ့ချီကို ပြုပြင်ပြောင်းလဲခဲ့ပြီး စီးပွားရေးမှာ စျေးကွက်အင်အားကို ပိုအသုံးချခဲ့ပါတယ်။
ဒီပြုပြင်ပြောင်းလဲမှုကြောင့် အလုပ်သမား သန်းပေါင်းများစွာ အလုပ်လက်မဲ့ဖြစ်ခဲ့ပေမဲ့ တရုတ်စီးပွားရေးရဲ့ ယှဉ်ပြိုင်နိုင်စွမ်း သိသိသာသာ မြင့်တက်လာခဲ့ပါတယ်။
ကျူးရုန်ကျီးဟာ တရုတ်နိုင်ငံ ၂၀၀၁ ခုနှစ်မှာ ကမ္ဘာ့ကုန်သွယ်ရေးအဖွဲ့ (WTO) ဝင်ရောက်နိုင်ရေးကို လည်း ဦးဆောင်ခဲ့သူ ဖြစ်ပါတယ်။
အဲဒီနောက် တရုတ်ပို့ကုန်တွေ အရှိန်အဟုန်နဲ့ တိုးလာပြီး ၂၀၁၀ ပြည့်နှစ်မှာ ကမ္ဘာ့အကြီးဆုံး ကုန်ထုတ်လုပ်ရေးနိုင်ငံ ဖြစ်လာခဲ့ပါတယ်။
ဒါပေမဲ့ သူ့ရဲ့ အခွန်နဲ့ ဒေသန္တရ ဘဏ္ဍာရေးပြုပြင်မှုတွေဟာ နောက်ပိုင်း တရုတ်နိုင်ငံရဲ့ ဒေသန္တရ ကြွေးမြီပြဿနာ ကြီးထွားလာဖို့ အခြေခံတချို့ ဖြစ်ခဲ့တယ်လို့လည်း သုံးသပ်ကြပါတယ်။
ကျူးရုန်ကျီးကို တရုတ်နိုင်ငံရဲ့ ခေတ်သစ်စီးပွားရေးတိုးတက်မှုကို ပုံဖော်ခဲ့တဲ့ အထင်ကရ ပြုပြင်ပြောင်းလဲရေး ခေါင်းဆောင်တယောက်အဖြစ် မှတ်ယူကြပါတယ်။
Source:Reuters
