တပ်မတော်အနေနဲ့ နောက်တက်လာမယ့်အစိုးရနဲ့ ငြိမ်းချမ်းရေးရအောင် ပူးပေါင်း လုပ်ဆောင်သွားမယ်လို့ ကာကွယ်ရေးဦးစီးချုပ်ဗိုလ်ချုပ်မှူးကြီး မင်းအောင်လှိုင်က ပြောလိုက်ပါတယ်။
တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နဲ့ ကမ္ဘာ့ခေါင်းဆောင်များအဖွဲ့ ကလပ်ဒီမက်ဒရစ်အဖွဲ့ဝင်၊ ချီလီနိုင်ငံ သမ္မတဟောင်းတို့ နေပြည်တော်မှာ ဇန်န၀ါရီ ၂၂ ရက်က တွေ့ဆုံဆွေးနွေးခဲ့ရာမှာ သူက ခုလို ပြောဆိုလိုက်တာဖြစ်ပါတယ်။
တပ်မတော် ကာကွယ်ရေးဦးစီးချုပ်က ငြိမ်းချမ်းရေးဟာ တိုင်းပြည်ရဲ့ သေရေးရှင်ရေး ကိစ္စဖြစ်တယ်၊ တပ်မတော် အနေနဲ့လည်း အဖြစ်နိုင်ဆုံးလိုက်လျောပြီး ငြိမ်းချမ်းရေးရရှိအောင် ကြိုးစားနေတယ်။ တိုင်းရင်းသား လက်နက်ကိုင်အဖွဲ့များအပေါ် အကောင်းဆုံးဖြစ်အောင် အလေးထားဆောင်ရွက်နေသကဲ့သို့ နောင်တက်လာမည့် အစိုးရနှင့်လည်း ငြိမ်းချမ်းရေး ကိစ္စရပ်များ အောင်မြင်အောင် ဆက်လက်ပူးပေါင်း ဆောင်ရွက်သွားမယ်လို့ ပြောခဲ့တာ ဖြစ်ပါတယ်။
ဧည့်သည် ချီလီသမ္မတဟောင်းက မြန်မာနိုင်ငံအနေဖြင့် တိုင်းနှင့်ပြည်နယ်များဖြင့် စုစည်း ထားခြင်း ဖြစ်၍ အစိုးရ၊ အရပ်ဘက်အဖွဲ့စည်းများ၊ တပ်မတော်နှင့်ပြည်သူတို့ အနေဖြင့် အခြေအနေကို သိရှိနားလည်ပြီး အကောင်းဆုံး ဆောင်ရွက်ရန် လိုအပ်တယ်လို့ ပြန်လည် ဆွေးနွေးသွားခဲ့တယ်လို့ ဗိုလ်ချုပ်မှူးကြီးမင်းအောင်လှိုင်ရဲ့ အင်တာနက်စာမျက်နှာမှာ ဖော်ပြထား ပါတယ်။
