ထားဝယ်အထူးစီးပွားရေးဇုန်စီမံကိန်းကို ၂၀၁၄ ခုနှစ်၊ မြန်မာအထူးစီးပွားရေးဇုန်ဥပဒေအရ ရင်းနှီး တည်ဆောက်သူနဲ့အတူ တခြားလိုအပ်တဲ့လုပ်ငန်းတွေကို ဆောင်ရွက်နေပြီး စီမံကိန်းကို ပြန်စတင် နေတယ်လို့ စစ်အာဏာရှင်ခန့် စီးပွားရေးနဲ့ကူးသန်းရောင်းဝယ်ရေး ဒုဝန်ကြီး ဦးဝင်းမြင့်ခိုင်က ပြောပါတယ်။
ဇူလိုင် ၃ ရက်က လုပ်တဲ့ အမျိုးသားလွှတ်တော်အစည်းအဝေးမှာ တနင်္သာရီတိုင်းက ကိုယ်စားလှယ် ဦးမောင်စိန်က ထားဝယ်ရေနက်ဆိပ်ကမ်းစီမံကိန်းကို ဆက်လက် အကောင်အထည်ဖော်ဖို့ ရှိ၊ မရှိ မေးတာကို ပြန်ဖြေဆိုတာ ဖြစ်ပါတယ်။
ထားဝယ်အထူးစီးပွားရေးဇုန်ကို ရုရှားနဲ့ ဆောင်ရွက်ဖို့အတွက် ၂၀၂၅ ခုနှစ်၊ ဖေဖော်ဝါရီလမှာ လုပ်ခဲ့တဲ့ ပဉ္စမအကြိမ် မြန်မာ-ရုရှား အစိုးရအချင်းချင်းကုန်သွယ်ရေးနဲ့ စီးပွားရေး ပူးပေါင်း ဆောင်ရွက်ရေးကော်မရှင် အစည်းအဝေးမှာ ထားဝယ်အထူးစီးပွားရေးဇုန်အတွင်းနဲ့ အနီးဝန်းကျင် ရင်းနှီးမြှုပ်နှံမှု ပူးပေါင်းဆောင်ရွက်ရေးဆိုင်ရာ ရည်ရွယ်တဲ့ စာလွှာ (Memorandum of Intent-MOI) ကို နှစ်ဖက်လက်မှတ်ရေးထိုးခဲ့ကြတယ်လို့ သိရပါတယ်။
ရေနက်ဆိပ်ကမ်းနယ်နိမိတ်သတ်မှတ်ဖို့ ဆောင်ရွက်နေတာမှာလည်း အပြီးသတ်အဆင့်ကို ရောက်နေပြီလို့ မြန်မာအထူးစီးပွားရေးဇုန်ဆိုင်ရာ ဗဟိုလုပ်ငန်းအဖွဲ့အတွင်းရေးမှူးလည်း ဖြစ်သူ ဦးဝင်းမြင့်ခိုင် ပြောပါတယ်။
စီမံကိန်းပြန်လည်စတင်နိုင်ဖို့ အရင်ကရေးဆွဲခဲ့တဲ့ အီတာလျံထိုင်းကုမ္ပဏီ(ITD)ရဲ့ Master Plan၊ အိမ်နီးချင်းနိုင်ငံများ စီးပွားရေးဖွံ့ဖြိုးတိုးတက်မှုပူးပေါင်းဆောင်ရွက်ရေးအေဂျင်စီ (NEDA)ရဲ့ Master Plan နဲ့ JICA Study တို့ကိုအခြေခံပြီး လက်ရှိအခြေအနေနဲ့ အသင့်တော်ဆုံးဖြစ်မဲ့ စီမံချက်ကို အဆင့် ၃ ဆင့်ခွဲပြီး အကောင်အထည်ဖော်သွားဖို့ လုပ်နေတယ်လို့လည်း ဆိုပါတယ်။
ထားဝယ်အထူးစီးပွားရေးဇုန်ကို အီတာလျံထိုင်းကုမ္ပဏီနဲ့ ဆောင်ရွက်ဖို့ ၂၀၀၈ ခုနှစ်၊ မေ ၁၉ ရက်မှာ မြန်မာ-ထိုင်း နှစ်နိုင်ငံနိုင်ငံခြားရေးဝန်ကြီးတွေ လက်မှတ်ရေးထိုးခဲ့ပေမဲ့ အီတာလျံထိုင်း ကုမ္ပဏီရဲ့ ပျက်ကွက်မှုတွေကြောင့် ၂၀၂၀ ပြည့်နှစ်၊ ဒီဇင်ဘာ ၃၀ ရက်မှာ စီမံကိန်းကို ရပ်ဆိုင်း ခဲ့တယ်လို့ သိရပါတယ်။
