ကမ္ဘာကျော် Star Trek နဲ့ X-Men ရုပ်ရှင်တွေမှာ ပါဝင်သရုပ်ဆောင်ခဲ့တဲ့ ဗြိတိန်မင်းသားကြီး ပက်ထရစ် စတူးအာ့တ်ဟာ အောက်တိုဘာ ၂၈ ရက်၊  အသက် ၈၆ နှစ်အရွယ်မှာ  ကွယ်လွန် သွားပါတယ်။ 

အမေရိကန်နိုင်ငံ၊ လော့စ်အိန်ဂျလိစ်မြို့က နေအိမ်မှာ ကွယ်လွန်ခဲ့တာဖြစ်ပြီး အယ်လ်ဇိုင်းမားနဲ့ လူးဝီးဘော်ဒီ ဒီမင်းရှားလို့ခေါ်တဲ့ ဦးနှောက်ဆိုင်ရာရောဂါတွေခံစားနေခဲ့ရတာဖြစ်ပါတယ်။

စတူးအာ့တ် ကွယ်လွန်ချိန်မှာ ဇနီးဖြစ်သူနဲ့ မိသားစုဝင်တွေ အနားမှာရှိနေခဲ့ကြတယ်လို့ ဆိုပါတယ်။

စတူးအာ့တ်ဟာ Star Trek: The Next Generation ဇာတ်လမ်းတွဲမှာ အာကာသယာဉ်မှူးကြီး ကပ္ပတိန် ဂျင်းလုခ်ပီကာ့ဒ်အဖြစ် သရုပ်ဆောင်ခဲ့ပြီး ကမ္ဘာကျော်လာခဲ့သူ ဖြစ်ပါတယ်။ 

ဒါ့အပြင် X-Men ရုပ်ရှင်တွေမှာလည်း ပါမောက္ခ ချားလ်စ်ဇေးဗီးယားအဖြစ် သရုပ်ဆောင်ခဲ့ပြီး ပရိသတ်တွေရဲ့ အားပေးမှုကို ရရှိခဲ့ပါတယ်။ 

သူဟာ ရုပ်ရှင်တွေသာမက ရှိတ်စပီးယားရဲ့ ပြဇာတ်တွေမှာလည်း ဆယ်စုနှစ်ပေါင်းများစွာ သရုပ်ဆောင်ခဲ့တဲ့ ဝါရင့်ပြဇာတ်မင်းသားကြီးတယောက်ပါ။

သရုပ်ဆောင်သက်တမ်းတလျှောက် လောရန့်စ် အိုလီဗီယာဆု ၂ ဆုနဲ့ ဂရမ်မီဆုတဆုလည်း ရရှိခဲ့ပါတယ်။

X-Men တွဲဖက်သရုပ်ဆောင် အီယန် မက်ကယ်လန်အပါအဝင် ဟောလိဝုဒ်သရုပ်ဆောင်တွေက ဝမ်းနည်းကြောင်း ဖော်ပြခဲ့ကြပါတယ်။ 

မင်းသား ဟျူးဂျက်မန်းကလည်း “ဒီနေ့ ကျနော်တို့ဟာ ပြဇာတ်နဲ့ ရုပ်ရှင်လောကရဲ့ အကြီးကျယ်ဆုံး သရုပ်ဆောင်တယောက်ကို ဆုံးရှုံးလိုက်ရပါပြီ” လို့ ဝမ်းနည်းစကား ပြောပါတယ်။ 

စတူးအာ့တ်ရဲ့ နောက်ဆုံးရုပ်ရှင်တွေထဲက တကားဖြစ်တဲ့ Avengers: Doomsday ကိုတော့ လာမဲ့ ဒီဇင်ဘာလမှာ ရုံတင်ပြသဖို့ စီစဉ်ထားပါတယ်။

Source: Reuters