မေလ ၈ ရက်ညနေပိုင်းက မြန်မာနိုင်ငံရှိ မြို့ကြီးအချို့မှာ မိုးသက်လေပြင်းကျရောက်ခဲ့ပြီး သစ်ပင်သစ်ကိုင်းကျိုးကျမှုတွေ ဖြစ်ပေါ်ခဲ့ပေမယ့် လူထိခိုက်သေဆုံးမှုတော့ မရှိခဲ့ပါဘူး။

ရှမ်းပြည်နယ်၊ မိုင်းဆတ်၊ စစ်ကိုင်းတိုင်း၊ စစ်ကိုင်းမြို့၊ မန္တလေးတိုင်း၊ မန္တလေးမြို့နဲ့ ပြင်ဦးလွင်မြို့နဲ့ မြစ်ငယ်တို့မှာ မေ ၈ ရက်နေ့ ညနေပိုင်းနဲ့ညပိုင်းတို့မှာ မိုးသက်လေပြင်းကျပြီး ထစ်ချုန်းမိုးတွေ ရွာသွန်းခဲ့ပါတယ်။

မန္တလေး၊ စစ်ကိုင်းလမ်းတလျှောက် သစ်ပင်ကြီးများ ပြိုလဲခဲ့ပြီး တောင်သမန်အင်းစောင်းမှာ တည်ရှိတဲ့ လောကရံသီပုထိုးတော်ကြီး ဘုရားရဲ့ထီးတော်သုံးဆင့်ခန့်နဲ့ စိန်ဖူးတော် မြေခခဲ့ပါတယ်။

မိုးသက်လေပြင်းကျစဉ် လေတိုက်နှုန်း ၁ နာရီမိုင် ၃၀ နဲ့ မိုင် ၄၀ လောက် တိုက်ခတ်ခဲ့ပြီး လေတိုက်ခတ်မှုကြောင့် သစ်ပင်သစ်ကိုင်းတွေ ကျိုးကျတာ၊ သစ်ပင်များလဲပြိုကျတာ၊ အိမ်အမိုးတွေလန်ထွက်တဲ့အပြင် လျှပ်စစ်မီးပြတ်တောက်တာတွေလည်း ဖြစ်ပွားခဲ့တယ်လို့ မြန်မာနိုင်ငံမိုးလေ၀သဌာနက သတင်းထုတ်ပြန်ပါတယ်။

မေ ၇ ရက်ညပိုင်းမှာလည်း ကချင်ပြည်နယ်၊ မိုင်ဂျာယန်မြို့နယ်ထဲ အလားတူ မိုးသက်လေပြင်းကျရောက်ပြီး အင်ခေါင်းပါ ဒုက္ခသည်စခန်းရှိ အိမ် ၅၉ လုံး ပျက်စီးသွားတယ်လို့ ကေအိုင်အို ဗဟိုစစ်ဘေးဒုက္ခသည် ကူညီစောင့်ရှောက်ရေးကော်မတီ အတွင်းရေးမှူး ဦးဇော်ရော်က ပြောပါတယ်။

“မေ ၇ ရက်ည ၇ နာရီလောက်မှာ မုန်တိုင်းကျပြီး အိမ်အမိုးအကာတွေ လွင့်ပါပျက်စီးကုန်ကြတယ်။ အိမ် ၅၉ လုံး၊ လူဦးရေ ၃၀၀ လောက် ဒုကရောက်နေကြတယ်။”

အင်ခေါင်းပါဒုက္ခသည်စခန်းမှာ လူဦးရေ ၂၀၀၀ လောက် ခိုလှုံနေထိုင်နေကြပြီး အကူအညီလိုအပ်နေတယ်လို့လည်း ပြောပါတယ်။

အခုရက်ပိုင်းအတွင်း မြန်မာပြည်အနှံ့အပြားမှာဖြစ်ပေါ်နေတဲ့ မိုးတိမ်တောင်တွေကြောင့် မိုးသက်လေပြင်းကျရောက်မှာတွေ ဖြစ်ပွားနိုင်တယ်လို့ မိုးလေ၀သဌာနက သတိပေးချက် ထုတ်ပြန်ထားပါတယ်။

ဓာတ်ပုံ - မျိုးနိုင်

[gallery ids="92204,92205,92206,92207,92208"]