ရှမ်းပြည်နယ်မြောက်ပိုင်း၊ မိုးမိတ်မြို့နားက စစ်အာဏာရှင်တပ်ရဲ့ ဗျူဟာကုန်းကို ကချင်လွတ်လပ်ရေးတပ်မတော် (KIA) ပူးပေါင်းတပ်ဖွဲ့​တွေက တိုက်ခိုက်​နေပြီး လက်နက်ခဲယမ်း​တွေ သိမ်းဆည်းရရှိခဲ့တယ်လို့ ​တော်လှန်​ရေးတပ်ဘက်က သိရပါတယ်။

​​စက်တင်ဘာ ၂၈ ရက် မနေ့မနက်ပိုင်းက​နေ ည​နေပိုင်းအထိ ရွှေမြင်တင် ဗျူဟာကုန်းကို KIA၊ KPDF ပူးပေါင်းတပ်​တွေက တိုက်ခိုက်တာဖြစ်ပြီး ဒီ​နေ့မနက်ပိုင်းမှာ​တော့ စစ်တပ်ဘက်က Y 12 ​လေယာဥ်နဲ့ ဗုံးလာကြဲ​နေတယ်လို့ သိရပါတယ်။

​​မြေပြင်တော်လှန်​ရေးရဲ​ဘော်တယောက်က “ခုကို လေယာဥ်ကြဲနေတာပါပဲ Y-12 နဲ့။ မိုးမိတ်နဲ့ မြစ်ဆုံ ကြားပဲ အခုကြဲ​​နေတာ။ မိုးမိတ်-မိုးကုတ်လမ်းကို​တော့ ပိတ်ထားတယ်” လို့ DVB ကို ​ပြောပါတယ်။

စစ်တပ်ဟာ မ​နေ့ကလည်း ဂျက်တိုက်လေယာဉ်နဲ့ မိုးမိတ်မြို့နယ်၊ ညောင်နီကျေးရွာအနီးကို ဗုံးကြဲ တိုက်ခိုက်ခဲ့ပါတယ်။

မိုးမိတ်မြို့ဟာ ရှမ်းပြည်နယ်မြောက်ပိုင်းနဲ့ ကချင်ပြည်နယ်၊ စစ်ကိုင်းတိုင်းတို့ နယ်နိမိတ်ချင်း ထိစပ်နေတဲ့ လမ်းဆုံ​ဒေသမှာ တည်ရှိတာကြောင့် စစ်ရေးအရ လမ်းကြောင်းထိန်းချုပ်ဖို့ အလွန်အရေးပါတဲ့မြို့​ ဖြစ်နေတာပါ။

မိုးမိတ်မြို့ပေါ်မှာ ၂၀၂၄ ခုနှစ်၊ ဇန်နဝါရီလအတွင်းကလည်း KIA၊ TNLA နဲ့ ပူးပေါင်းတပ်ဖွဲ့တွေက မြို့သိမ်းတိုက်ပွဲ ဆင်နွှဲခဲ့ဖူးပြီး မြို့တွင်းနေရာအများစုကို ရက်ပိုင်းအတော်ကြာ ထိန်းချုပ်နိုင်ခဲ့​ပေမဲ့ စစ်တပ်ရဲ့ လေကြောင်းပစ်ကူနဲ့ အင်အားသုံး ပြန်လည်ထိုးစစ်ဆင်မှုကြောင့် တော်လှန်ရေးတပ်ဖွဲ့တွေ ပြန်လည်ဆုတ်ခွာခဲ့ရတာ ဖြစ်ပါတယ်။

Photo : SL