မန္တလေးတိုင်း၊ တောင်သာမြို့နယ်ထဲက ပန်းပေါင်းကျေးရွာကို ဧပြီ  ၅ ရက် ညနေ ၃ နာရီဝန်းကျင်မှာ စစ်တပ်က စက်တပ်လေထီးနဲ့ ဗုံးကြဲခဲ့တာကြောင့် ကိုယ်ဝန်ဆောင်အမျိုးသမီးတယောက် အပါအဝင် ၃ ယောက် သေဆုံးခဲ့တယ်လို့ ဒေသခံတွေဆီကနေ သိရပါတယ်။

တောင်သာမြို့နယ် လူထုလှုပ်ရှားမှုကော်မတီရဲ့ ပြန်ကြားရေးတာဝန်ခံက “မိတ္တီလာလေတပ်က တက်လာတဲ့ စက်တပ်လေထီး ပန်းပေါင်းရွာထဲကို ဗုံး ၂ လုံး ထပ်ကြဲသွားလို့ ရွာထဲက ပြည်သူပိုင်အိမ် ၄ လုံး ပျက်စီးပြီးတော့ အသက် ၆၀ ဝန်းကျင်လောက်ရှိတဲ့ လင်မယား ၂ ယောက် နေရာမှာတင် ဆုံးပါတယ်။ ကိုယ်ဝန် ၈ ​လလောက်ရှိတဲ့ ၃၂ နှစ်လောက် အမျိုးသမီးတယောက်ကတော့ ဆေးကုသနေရင်း နောက်မှ သေဆုံးသွားတာပါ” လို့ ပြောပါတယ်။

ဧပြီ ၅ ရက် မနက် ၈ နာရီဝန်းကျင်ကလည်း အောင်သာကျေးရွာကနေ အင်အား ၈၀ နီးပါးလောက်ပါတဲ့ စစ်ကောင်စီတပ်ရဲ့ မြေပြင်စစ်ကြောင်းကနေ ရွှေ‌စမ်းချောင်းကျေးရွာထဲကို ဒရုန်းနဲ့ ဗုံးကြဲချခဲ့တာကြောင့် အသက် ၅၈ နှစ်နဲ့ ၆၀ အရွယ် ရွာခံအမျိုးသမီး ၂ ယောက် သေဆုံးခဲ့ပြီး လူနေအိမ်အိမ်တချို့လည်း ထိခိုက်ပျက်စီးခဲ့သလို နွား ၂ ကောင်လည်း သေဆုံးသွားခဲ့တယ်လို့ ဆက်ပြောပါတယ်။

ဒေသခံပြည်သူတွေအနေနဲ့ အခုရက်ပိုင်းမှာ တောင်သာ-ရုံးစည်ကြီးလမ်းပိုင်းကို လုံးဝအသုံးမပြုကြဖို့ တော်လှန်ရေးတပ်ဖွဲ့တွေဘက်က တိုက်တွန်းထားပါတယ်။

တောင်သာမြို့နယ် လူသားစာနာတာဝန်ခံက  “တောင်သာမြို့ပေါ်ကနေ အောင်သာရွာကတဆင့် ထွက်လာတဲ့ စစ်ကြောင်းက တောင်သာ-ရုံးစည်ကြီး ကားလမ်းပိုင်းပေါ်မှာ ကင်းပုန်းတွေလည်း ချထားတယ်။ ပန်းပေါင်းရွာဆိုတာက တောင်သာ-ရုံးစည်ကြီး ကားလမ်း အနောက်ဘက်မှာရှိတာ။ ၅ ရက်နေ့ ညနေပိုင်းမှာ ပါရာမော်တာနဲ့ ဗုံးကြဲခံရလို့ ​ကိုယ်ဝန်ဆောင်အမျိုးသမီး အပါအဝင် ၃ ယောက် သေဆုံးခဲ့တဲ့ အဲဒီ ပန်းပေါင်းရွာထဲကို ၆ ရက်နေ့မှာ စစ်ကြောင်းဝင် တပ်စွဲနေပြီးတော့ အိမ်တွေကို မီးရှို့နေတယ်။ ဓားစာခံဖမ်းဆီးခံထားရတဲ့ ရွာခံတွေ ရှိနေတယ်လို့ သိရပေမဲ့ စစ်ကြောင်းရှိနေသေးတော့ အတိအကျ မသိရသေးပါဘူး” လို့ DVB ကို ပြောပါတယ်။

အဆိုပါ စစ်တပ်စစ်ကြောင်းကြောင့် ပန်းပေါင်း၊ ရွှေစမ်းချောင်း၊ အောင်သာ၊ သံဘိုကျေးရွာတွေ အပါအဝင် အနီးအနားကျေးရွာတွေက ဒေသခံပြည်သူတွေ ထွက်ပြေး​တိမ်းရှောင်နေရပါတယ်။

အဆိုပါကျေးရွာတွေကို ဝင်ရောက်စီးနင်းပြီး ပြည်သူပိုင်ပစ္စည်းတွေ လုယူကာ လူနေအိမ်တွေကို မီးရှို့ဖျက်ဆီးနေတဲ့ စစ်တပ်စစ်ကြောင်းကို တော်လှန်ရေးတပ်ဖွဲ့တွေက ကြားဖြတ်တိုက်ခိုက်ခဲ့လို့  တိုက်ပွဲငယ်တွေ ဖြစ်ပွားခဲ့ပါတယ်။