ပြည်ပခရီးစဉ်အတွက် ငွေယူထားပြီး ပို့မပေးလို့ နစ်နာသူ​တွေက လူမှုကွန်ရက်မှာ ဝေဖန် ပြောဆိုတာ များလာပြီးနောက် ငွေပြန်အမ်းမယ်လို့ Pack & Go Easy Travel ကုမ္ပဏီက ဧပြီ ၂၄ ရက်မှာ ထုတ်ပြန်လာပါတယ်။

အဲဒီကုမ္ပဏီဟာ ပြည်ပခရီးစဉ် ပို့ပေးမယ်ဆိုပြီး ခရီးသွားမဲ့သူတချိုဆီကနေ ငွေကြေးရယူခဲ့ပြီး ခရီးစဉ်ကို တကယ်မပို့ပေးခဲ့ဘူးလို့ နစ်နာသူ​တွေရဲ့​ပြောပြချက်အရ သိရပါတယ်။

ဒါ့အပြင် ​လေယာဥ်လက်မှတ်ကိုတောင် အတုတွေပေးတယ်လို့ သိရပါတယ်။

နစ်နာခဲ့သူတယောက်က “ကျမတို့ ဖုန်းဆက်တာ လုံးဝမကိုင်ဘူး။ ရုံးလိုက်သွား​တော့လည်း တံခါးပိတ် ထားတယ်။ ပိုက်ဆံ​တွေလိမ်ပြီး​ ပြေးသွားတာ​နေမှာ​ပေါ့။ သင်္ကြန်မှာ မိသားစု လိုက်သွား လည်ဖို့ လုပ်ထားတာ။ ပိုက်ဆံကျ​တော့ယူပြီး ဘာမှအ​ကြောင်းပြန်မလာဘူး။ ​ကြေညာ​ တော့ နာမည်ကြီးမင်းသားလင်မယား။ ​အကွက်ကျကျလိမ်စားသွားတာ” လို့ ပြောပါတယ်။

အဲဒီလို့ အလိမ်ခံရသူတွေထဲမှာ ဆယ်လီတချို့လည်းပါတယ်လို့ သိရပါတယ်။

ပြည်ပခရီးစဥ်ပို့ဆောင်ရာမှာ အသွားတကြောင်းအတွက်ပဲ လက်မှတ်ဖြတ် ပို့ဆောင်ခဲ့ပြီး အပြန် လက်မှတ်၊ ဟိုတယ် စီစဥ်မပေးတာကြောင့် ခရီးသွားတွေအနေနဲ့  ကိုယ့်အစီအစဥ်၊ ကိုယ့်စရိတ်နဲ့ ကိုယ် လည်ပတ်ခဲ့ပြီး ပြန်လာရတာမျိုးတွေလည်း ရှိနေတယ်လို့ ကိုယ်တိုင်ကြုံရသူတွေက လူမှုကွန်ရက်မှာ ​ရေးသားလာကြပါတယ်။

ဒါကြောင့် နစ်နာသူ​တွေက ​ငွေပြန်အမ်းပေးဖို့နဲ့ Pack & Go Easy Travel ကုမ္ပဏီကို တရားစွဲဆို သွားမယ်လို့ သိရပါတယ်။

Pack & Go Easy Travel ကုမ္ပဏီကတော့ လက်ရှိဖြစ်ပွားနေတဲ့ကိစ္စအပေါ်  ကုမ္ပဏီအနေနဲ့  စိတ်မကောင်းဖြစ်ရကြောင်း၊  Travel Package ဝယ်ယူထားတဲ့ Customer တွေအနေနဲ့ နစ်နာဆုံးရှုံးမှု မရှိစေရေးအတွက် ဖြေရှင်းပေးမှာဖြစ်သလို ပြန်အမ်းငွေကိုလည်း အပြည့်အဝ ပြန်လည်ပေးအပ်မယ်လို ဧပြီ ၂၄ ရက်မှာ အသိ​ပေးစာထုတ်ထားပါတယ်။

Pack & Go Easy Travel ကုမ္ပဏီရဲ့ ခရီးစဥ်ကို စိန်ဖြိုးနဲ့ ရီရီပွင့်ဖြူတိုက ​ကြော်ငြာပေးခဲ့တာ ဖြစ်ပြီး ရုံးကတော့ ရန်ကုန်နဲ့ ဘန်ကောက်မှာရှိတယ်လို့ သိရပါတယ်။