မလေးရှားနိုင်ငံမှာ ရောက်ရှိနေတဲ့ UFC ဖလိုင်းဝိတ်တန်းချန်ပီယံ ချင်းဖိုက်တာ ဂျော့ရှုဝါဗန်နဲ့ အဆိုတော် ဖြူဖြူကျော်သိန်းတို့ ပရိသတ်တွေနဲ့ တွေ့ဆုံပွဲ ပြုလုပ်ခဲ့ပါတယ်။
ပူဒူးမြို့ ICC ဟောခန်းမမှာ မေ ၂၅ ရက် ည ၇ နာရီက ပြုလုပ်တဲ့ အဲဒီတွေ့ဆုံပွဲမှာ မြန်မာနိုင်ငံသား အယောက် ၂,၀၀၀ ကျော်လောက် တက်ရောက်ခဲ့တယ်လို့ ပွဲစီစဉ်သူတွေက ပြောပါတယ်။
မေ ၂၇ ရက်နေ့မှာတော့ ချင်းဒုက္ခသည်ကွန်မြူနတီ (Chin Refugee Community Malaysia) အဖွဲ့ တည်ထောင်ခြင်း ၂၅ နှစ်ပြည့် ငွေရတုအထိမ်းအမှတ်အခမ်းအနားကို အထူးဧည့်အနေနဲ့ တက်ရောက်ဖို့ရှိပြီး မလေးရှားစံတော်ချိန် မနက် ၉ နာရီကနေ မွန်းလွဲ ၃ နာရီအထိ တကြိမ်နဲ့ ညနေ ၅ နာရီကနေ ည ၁၁ နာရီအထိ တွေ့ဆုံဖျော်ဖြေပွဲ ၂ ကြိမ် ပြုလုပ်မယ်လို့ သိရပါတယ်။
ဗန်ဟာဟာ အမေရိကန်နိုင်ငံမှာ ပြောင်းရွှေ့အခြေချမနေထိုင်ခင် မလေးရှားနိုင်ငံမှာ ဒုက္ခသည်အဖြစ်နဲ့ နေထိုင်ခဲ့ဖူးပြီး အခုတကြိမ်ဟာ ပထမဆုံးအကြိမ် မလေးရှားကို ပြန်ရောက်လာတာ ဖြစ်ပါတယ်။
ဗန်ဟာ မလေးရှားနိုင်ငံကနေတဆင့် ထိုင်းနိုင်ငံနဲ့ အိန္ဒိယနိုင်ငံ မီဇိုရမ်ပြည်နယ်ကို သွားရောက်ဖို့ ရှိနေတယ်လို့လည်း The Voice of Chinland ရဲ့ ဖော်ပြချက်အရ သိရပါတယ်။
