ကချင်ပြည်နယ်၊ ဖားကန့်​ဒေသမှာ တန်ဆောင်တိုင်ပွဲတော်ကာလအတွင်း ပြည်သူတွေ လွတ်လွတ်လပ်လပ်သွားလာပြီး စိတ်အေးချမ်းသာစွာ ကုသိုလ်ပြုနိုင်ဖို့ ဖားကန့်ခရိုင်၊ တပ်မဟာ ၉ လက်အောက်က တပ်ရင်းနဲ့ တပ်ဖွဲ့အားလုံးကို လူသစ်မစုဆောင်းဖို့ ကချင်လွတ်လပ်​ရေးတပ်မ​​တော် (KIA) က ညွှန်ကြားထားတယ်လို့ ​​ဒေသခံ​တွေဆီက သိရပါတယ်။

အဲဒီညွှန်ကြားချက်အရ နိုဝင်ဘာ ၁၄ ရက်က​နေ တန်ဆောင်မုန်းလပြည့်ကျော် ၁ ရက်ဖြစ်တဲ့ နိုဝင်ဘာ ၂၅ ရက်အထိ လူသစ်စုဆောင်းတာကို ယာယီရပ်ဆိုင်းထားမယ်လို့ ဆိုပါတယ်။

​ဒေသခံတ​ယောက်က “တပ်မဟာမှူးအမိန့်နဲ့​ပေါ့​နော်။ တပ်မဟာ ၉ လက်​အောက်က တပ်ရင်း၊ တပ်ဖွဲ့​တွေ​ပေါ့။ ဒီ​​နေ့ကစလို့ လူသစ်မစုဖို့ နှုတ်မိန့်နဲ့ ညွန်ကြားထားတယ်။ တကယ်လို့ တပ်ရင်း၊ တပ်ဖွဲ့​ကလူ​တွေ လူသစ်စု​ဆောင်းရင် နီးစပ်ရာ တပ်ရင်း၊ တပ်ဖွဲ့​တွေဆီတိုင်ကြားလို့ရတယ်လို့ ​ပြောပါတယ်” လို့ DVB ကို​ပြောပါတယ်။

ဒါ့အပြင် ပြည်သူ​တွေအနေနဲ့ သတ်မှတ်ကာလအတွင်း အရေးကြီးကိစ္စမရှိဘဲ ညအချိန်မတော် သွားလာတာနဲ့ မူးယစ်ရမ်းကားတာ​တွေ မပြုလုပ်ဖို့၊ သက်ဆိုင်ရာနယ်မြေအလိုက် ချမှတ်ထားတဲ့ လုံခြုံရေးစည်းကမ်း​တွေကိုလည်း လေးစားလိုက်နာကြဖို့ တိုက်တွန်းထားပါတယ်။

နိုဝင်ဘာ ၁၀ ရက်ကလည်း ဖားကန့်ခရိုင် တပ်မဟာ ၉ အောက်က KIA/KPDF ရဲဘော်​တွေအားလုံး ပြည်သူလူထုနဲ့ ထိတွေ့ဆက်ဆံရာမှာ လိုက်နာရမဲ့ ဆောင်ရန်၊ ရှောင်ရန်​တွေကို KIA က ထုတ်ပြန် ခဲ့ပါတယ်။

တော်လှန်ရေးတပ်ဖွဲ့ဝင် ရဲဘော်​တွေအနေနဲ့ ပြည်သူလူထုအပေါ် အနိုင်ကျင့်ဗိုလ်ကျတာ၊ အတင်းအဓမ္မ ဥပဒေမဲ့ အကျပ်ကိုင်တာ၊ တပ်ဖွဲ့ရဲ့ မူဝါဒနဲ့ဆန့်ကျင်ဘက် ပြုမူတာတွေ မလုပ်ကြဖို့၊ အဆင့်ဆင့်ချမှတ်ထားတဲ့ မူဝါဒအတိုင်း လိုက်နာဆောင်ရွက်ကြဖို့လည်း သတိပေးထားတာပါ။

အဲဒီအပြင် မြို့၊ ရွာ​တွေက ယဉ်ကျေးမှုနဲ့ဆက်စပ်တဲ့ ဘုရားစေတီ​တွေ၊ ဘုန်းကြီးကျောင်း​တွေ၊ ဘုရားကျောင်း​တွေ စတဲ့နေရာတွေ၊ အများပြည်သူနဲ့သက်ဆိုင်တဲ့ ပန်းခြံ၊ ဆေးရုံ ဆေးခန်း၊ နာရေးကိစ္စ စတဲ့​နေရာ​တွေမှာ လက်နက်ကိုင်ဆောင်ဝင်ရောက်တာ မလုပ်ကြဖို့လည်း တားမြစ်ထား တာပါ။