ဗင်နီဇွဲလား အတိုက်အခံခေါင်းဆောင် မာရီယာ ကိုရီနာ မာချာဒိုကို နိုင်ငံထဲပြန်မလာဖို့ သူက တားမြစ်ခဲ့တယ် ဆိုတဲ့ ပြောစကားတွေကို အမေရိကန်သမ္မတ ဒေါ်နယ်ထရမ့်ပ်က ဇူလိုင် ၈ ရက်မှာ သတင်းထောက်တွေရဲ့ မေးခွန်းတွေကို ငြင်းဆိုလိုက်ပါတယ်။

သတင်းထောက်တွေက မာချာဒိုကို ဗင်နီဇွဲလားနိုင်ငံထဲ ပြန်မသွားဖို့ တားခဲ့ပါသလားလို့ မေးမြန်းရာမှာ ထရမ့်ပ်က လုံးဝမတားခဲ့ကြောင်းနဲ့ မာချာဒိုဟာ လူတော်တယောက်ဖြစ်ပြီး သူ့ကို နိုဘယ်လ်ဆုပေးခဲ့သူ ဖြစ်တာမို့ မုန်းစရာအကြောင်းမရှိဘူးလို့ ဖြေကြားခဲ့ပါတယ်။

ဒါ့အပြင် မာချာဒိုက အဲဒီနိုဘယ်လ်ဆုကို ထရမ့်ပ်ပဲ ရသင့်တာလို့ ပြောခဲ့ကြောင်းနဲ့ သူကိုယ်တိုင်ကတော့ မာချာဒိုကို အရင်က မသိခဲ့ကြောင်းလည်း ထည့်သွင်းပြောဆိုခဲ့ပါတယ်။

ပြီးခဲ့တဲ့အပတ်က ဗင်နီဇွဲလားနိုင်ငံမှာ ဆက်တိုက်လှုပ်ခတ်ခဲ့တဲ့ ငလျင်ဒဏ်ကြောင့် ပြန်လည်ထူထောင်ရေး လုပ်ငန်းတွေ လုပ်နေရချိန်မှာ မာချာဒိုက နိုင်ငံထဲပြန်ဝင်ပြီး ကူညီချင်တယ်လို့ ဇူလိုင် ၆ ရက်မှာ ပြောခဲ့ပါတယ်။

သူဟာ လောလောဆယ် ပနားမားနိုင်ငံမှာ ရောက်ရှိနေပြီး ဗင်နီဇွဲလားအစိုးရက သူ့ကို နိုင်ငံထဲ ပြန်မလာနိုင်အောင် ပိတ်ဆို့ထားတယ်လို့ စွပ်စွဲထားပါတယ်။

X လူမှုကွန်ရက်ပေါ်တင်တဲ့ ဗီဒီယိုထဲမှာတော့ အရေးပေါ်အခြေအနေအတွင်း ပြည်သူတွေရဲ့ ကြိုးပမ်းအားထုတ်မှုတွေကို ကူညီညှိနှိုင်းပေးဖို့ ဗင်နီဇွဲလားကို ပြန်လာမှာဖြစ်ကြောင်း သူက ပြောကြားခဲ့ပါတယ်။

မာချာဒိုဟာ အငြင်းပွားဖွယ်ဖြစ်ခဲ့တဲ့ ၂၀၂၄ ရွေးကောက်ပွဲမှာ သူနိုင်ခဲ့တယ်လို့ ကြေညာပြီးကတည်းက ဗင်နီဇွဲလားနိုင်ငံထဲမှာ ပုန်းအောင်းနေခဲ့တာပါ။

ပြီးခဲ့တဲ့ ဒီဇင်ဘာလတုန်းကမှ ငြိမ်းချမ်းရေးနိုဘယ်လ်ဆုကို ကိုယ်တိုင်လက်ခံရယူဖို့ အော်စလိုမြို့ကို စက်လှေနဲ့ တိတ်တဆိတ်ထွက်ခွာခဲ့ပြီး နောက်ပိုင်းမှာ အဲဒီဆုကို ထရမ့်ပ်ဆီ လွှဲပြောင်းပေးအပ်ခဲ့ပါတယ်။

Source: Reuters