ဗိုလ်နဂါးရဲ့ တပ်မှူး​တွေ ထွက်​ပြေးလွတ်မြောက်သွားပြီးနောက် စစ်ကိုင်းတိုင်း၊ ပင်လည်ဘူးမြို့နယ်ရှိ ကင်းပန်းဆေးရုံကို သြဂုတ် ၁၆ ရက် ည​နေပိုင်းမှာ စစ်တပ်က ဗုံးကြဲတိုက်ခိုက်ခဲ့တာ​ကြောင့် ထိခိုက်သူများတယ်လို့ ​​မြေပြင် တော်လှန်​ရေးရဲ​ဘော်​တွေဆီက သိရပါတယ်။

စစ်အာဏာရှင်တပ်နဲ့ ပူးပေါင်းသွားတဲ့ ဗိုလ်နဂါးလက်အောက်ခံ တကိုယ်​တော် သုဘရာဇာနဲ့ ဒေါင်းညိုတို့ဟာ သြဂုတ် ၁၅ ရက်မှာ ​သူတို့ဆေးကုသမှုခံယူ​နေတဲ့ ကင်းပန်းရွာဆေးရုံက​နေ ထွက်ပြေးလွတ်မြောက်သွားပြီး​နောက် သြဂုတ် ၁၆ ရက် ည​နေပိုင်းမှာ စစ်တပ်က အဲဒီ​ဆေးရုံကို ဗုံးကြဲ ၃ ကြိမ် ကြဲချ တိုက်ခိုက်တာပါ။

​​တော်လှန်​ရေးရဲ​ဘော်တ​ယောက်က "သူတို့ ၂ ယောက်က ထွက်ပြေးပြီး သတင်းပေးတာ။ ဂျက်ဖိုက်တာနဲ့ ဗုံးလာကြဲလို့ ကင်းပန်းစာသင်​ကျောင်းနဲ့ ​ဆေးရုံပျက်စီးသွားတယ်။ ထိခိုက်သူ များတယ်ဗျ။ ​နေအိမ် ၁၅ လုံး​ကျော် ပျက်စီးသွားတယ်။ ဗုံး ၁၀ လုံးကြဲသွားတာ။ ထိခိုက်တဲ့အထဲ က​လေး​တွေလည်းပါတယ်" လို့ DVB ကို​ ပြောပါတယ်။

သုဘရာဇာ (ခေါ်) အောင်ထိုက်နဲ့ ဒေါင်းညိုတို့ဟာ ကင်းပန်းဆေးရုံမှာ ဆေးကုသမှုခံယူနေချိန် လူနာစောင့်ကို အဆိပ်ခပ်ပြီး ထွက်ပြေးလွတ်​မြောက်သွားတာလို့ သိရပါတယ်။

ဒါ​ကြောင့် သူတို့ ၂ ယောက်ကိုတွေ့ရင် ဖမ်းဆီးပေးဖို့ ​တော်လှန်​ရေးတပ်​တွေက ​တောင်းဆိုထား​ပါတယ်။

ဒေသခံတ​ယောက်က “ဒဏ်ရာရတာက ၁၅ ယောက် ၀န်းကျင်၊ သေဆုံးတာက ၃ ယောက်ဝန်းကျင် ထပ်တိုးနိုင်သေးတယ်။ အတိအကျ မသိရ‌သေးတာ။ အိမ်သာထဲမှာ သေနေတာတွေရော၊ အိမ်တွေ ပျက်စီးသွားတယ်။ သေတာကပြည်သူတွေ။ PDF တယောက်မှမပါဘူး။ ဘာအစည်းဝေးမှလည်း မလုပ်ဘူး။ ဆေးရုံနားကအိမ်တွေ၊ စာသင်ကျောင်းအနောက်ဘက်၊ စာသင်ကျောင်းမှာက လူနာတွေလည်း ထားတယ်။ စာသင်ကျောင်းနောက်ခြမ်း နည်းနည်းပဲ ပါသွားတယ်။ ခြေပြတ်လက်ပြတ်တွေ များတယ်” လို့ ​ပြောပါတယ်။

၂၀၂၆ ခုနှစ် ဖေဖော်ဝါရီလမှာ ဗမာအမျိုးသားတော်လှန်ရေးတပ်မတော် (BNRA)​ ခေါင်း​ဆောင် ဗိုလ်နဂါးဟာ စစ်တပ်နဲ့ ပူး​ပေါင်းသွားပြီး​နောက် တပ်ရင်းမှူး​တွေဖြစ်ကြတဲ့ ​ဒေါင်းညိုနဲ့ သုဘရာဇာတို့ဟာ ​တော်လှန်​ရေးတပ်​တွေဆီမှာ ထိန်းသိမ်းခံခဲ့ရတာ ဖြစ်ပါတယ်။

Photo: မြေပြင်ရဲ​ဘော်တဦး