လက်ပံတန်းမှာ ပိတ်မိနေတဲ့ ဒီမိုကရေစီပညာရေး ပင်မသပိတ်စစ်ကြောင်းကို ဒီနေ့မနက်ပိုင်းမှာ လုံခြုံရေး ရဲတပ်ဖွဲ့ဝင်တွေဟာ သံဆူးကြိုးအကာအရံတွေကို ပိတ်ဆို့ခံထားရတဲ့ သပိတ်စစ်ကြောင်းနဲ့ ပေ ၅၀ အကျော်မှာ အထပ်ထပ်ကာရံတားဆီးမှုတွေ ပြုလုပ်ခဲ့ပါတယ်။
ဒီနေ့ မနက် ၈ နာရီ ၃၀ မိနစ်ထိကတော့ နှစ်ဖက်စလုံး ထိပ်တိုက်ဆိုင်ထားဆဲ ရှိနေပါတယ်။
အမျိုးသားပညာရေး ဥပဒေကို ဆန့်ကျင် ကန့်ကွက်သပိတ်မှောက်တဲ့အနေနဲ့ မန္တလေးကနေ ရန်ကုန်မြို့အရောက် ခရီးရှည် ချီတက်နေကြတဲ့ ဒီမိုကရေစီပညာရေး ပင်မသပိတ်စစ်ကြောင်းဟာ မိုင်လေးရာနီးပါး ချီတက်လာခဲ့ပြီးနောက် လက်ပတန်းမြို့မှာ ရာပေါင်းများစွာရှိတဲ့ လုံခြုံရေး ရဲတပ်ဖွဲ့ဝင်တွေရဲ့ ပိတ်ဆို့ဟန့်တားတာကို ၃ ရက်ကြာခံထားရပါတယ်။
ကျောင်းသားတွေ တောင်းဆိုထားတဲ့ အချက် ၁၁ ချက်ကို လွှတ်တော်က ဆောင်ရွက်ပေးတာ စောင့်ကြည့်ဖို့နဲ့ အခြေခံပညာကျောင်းသားတွေရဲ့ စာမေးပွဲတွေ အနှောက်အယှက် မဖြစ်ဖို့ အတွက် ချီတက်နေတဲ့ သပိတ်စစ်ကြောင်းကို ၁၁ ရက်ကြာ ရပ်နားထားခဲ့ပြီး လွှတ်တော်ရဲ့ ဆောင်ရွက်ချက်တွေ တိုးတက်မှု မရှိတာကြောင့် မတ်လ ၂ ရက်နေ့မှာ ရန်ကုန်မြို့က်ို ဆက်လက်ချီတက်ဖို့ တည်းခိုရာနေရာမှ သာယာဝတီမြို့ကို ဆက်လက် ထွက်ခွာဖို့ စတင်ခဲ့ပါတယ်။
ဒါပေမယ့် လုံခြုံရေး ရဲတပ်တပ်ရင်းတွေက ပိတ်ဆို့ခဲ့တာကြောင့် ထွက်ခွာခွင့် မရခဲ့ပါဘူး။ အခုလို ပိတ်ဆို့ထားတာကို ဖွင့်ပေးဖို့ အတွက် ပဲခူးတိုင်း ဒေသကြီးနယ်လုံဝန်ကြီးနဲ့ ပင်မ သပိတ်စစ်ကြောင်း ကိုယ်စားလှယ်တွေ ဆွေးနွေးခဲ့ကြပေမယ့်လည်း ပြေလည်မှု မရခဲ့ပါဘူး။
ဒါ့ကြောင့် သပိတ်မှောက် ကျောင်းသားတွေဟာ မတ်လ ၃ ရက်နေ့မှာ သာယာဝတီမြို့ကို မဖြစ်ဖြစ်တဲ့နည်းနဲ့ သွားရောက်ဖို့ ချီတက်ထွက်ခွာခဲ့ရာမှာ တည်းခိုရာ အောင်မြေဗိမာန် ကျောင်းတိုက်နဲ့ ပေ ၃၀၀ ခန့်အကွာမှာ အဓိကရုဏ်းနှိမ်နင်းရေး လက်နက် ကိရိယာတွေ ကိုင်ဆောင်ထားတဲ့ ရာပေါင်းများစွာရှိတဲ့ လုံခြုံရေး ရဲတပ်ရင်းတွေက ပိတ်ဆို့ ဟန့်တားခဲ့ကြတာကြောင့် ကျောင်းသားတွေနဲ့ စောင့်ရှောက်လိုက်ပါလာခဲ့ကြတဲ့ သံဃာတော်တွေဟာ ထိုင်သပိတ်ကို ဆင်နွှဲခဲ့ကြပါတယ်။
ဒီလို ဆင်နွှဲပြီး ၂ ရက်မြောက်နေ့မှာတော့ သပိတ်မှောက် ကျောင်းသားတွေကို တွေ့ဆုံ အားပေးဖို့ လာရောက်ကြတဲ့ လက်ပတန်း ဒေသခံပြည်သူတွေနဲ့ သာယာဝတီခရိုင် ပြည်သူတွေကို ကျောင်းသားတွေနဲ့ တွေ့ဆုံခွင့်မရနိုင်အောင် ရဲတပ်ဖွဲ့က ကားတွေကို အတန်းလိုက်စီတန်းပြီး ပိတ်ဆို့ခဲ့သလို ရဲတပ်ဖွဲ့ဝင်တွေကိုလဲ အင်အားတိုး ပိတ်ဆို့ခဲ့ကြတာလည်း ဖြစ်ပါတယ်။
ဓာတ်ပုံ - ဉာဏ်ကြီး၊ လွင်မှိုင်း
