ရှမ်းပြည်နယ်မြောက်ပိုင်း၊ မူဆယ်နယ်စပ်မှာ မတ် ၂၁ ရက်လောက်ကစလို့ မြန်မာကျပ်ငွေနဲ့ လဲလှယ်တဲ့  တရုတ်ယွမ်ငွေဈေး ထိုးတက်လာတယ်လို့ ဒေသခံတွေဆီက သိရပါတယ်။

ဒေသခံ အမျိုးသမီးတယောက်က "ဒီရက်ပိုင်း တရုတ်ငွေဈေး တရိပ်ရိပ်နဲ့ တက်လာနေတာ။ ငွေဈေးကြောင့် ပစ္စည်းတွေလည်း ဈေးတက်ကုန်ပြီ" လို့ ပြောပါတယ်။

မနေ့ညနေ ၃ နာရီဝန်းကျင်မှာတော့ Kpay မှာ ယူမယ်ဆိုရင် တရုတ်ငွေ ၁၀၀ ယွမ်ကို ၆,၁၈၀၀ ရှိနေပြီး ငွေသားယူရင် အနည်းငယ် ဈေးလျော့ကာ ငွေလဲဆိုင် တဆိုင်နဲ့ တဆိုင် ဈေး အနည်းငယ်ကွာတာတွေ့ရပြီး ယွမ် ၁၀၀ ကို ကျပ် ၆၁,၃၀၀ ကနေ ၆၁,၈၀၀ ထိဈေးပေါက် နေတာတွေ့ရတယ်လို့ မြို့ခံ အမျိုးသမီးက ပြောပါတယ်။

မတ် ၂၁ ရက်ညနေပိုင်းက တရုတ်ငွေ ယွမ် ၁၀၀ ကို မြန်မာငွေ ၆၁,၆၀၀ ထိ ဈေးပေါက်ခဲ့ပြီး မနေ့ကတော့ ကျပ်  ၆၁,၀၀၀ နဲ့ ၆၁,၂၀၀ ထိ ရှိခဲ့ပါယ်။

ဈေးသည်တယောက်က "တရုတ်ငွေနဲ့ တွက်ပြီး ပစ္စည်းဝယ်ရတော့ တရုတ်ငွေတက်ရင် ပစ္စည်း ဈေးတက်တယ်လေ" လို့ ပြောပါတယ်။

တရုတ်ငွေဈေးကို အဓိကထား ရောင်းချရတာကြောင့် ငွေဈေး မငြိမ်ရင် အရှုံးပေါ်တာတွေ ကြုံရတယ်လို့ ဆိုပါတယ်။

အခုမတ်လလယ်ရဲ့ အရှေ့ပိုင်းမှာတော့ တရုတ်ငွေဈေးက ၅၆,၀၀၀ ကနေ ၅၈,၀၀၀ ကြားသာ ရှိနေခဲ့တာဖြစ်ပါတယ်။

မြန်မာနိုင်ငံရင်းနှီးမြှုပ်နှံမှုကော်မရှင် (MIC) က မတ် ၁၇ ရက်က တရုတ်ငွေကြေးယွမ်ကို အသုံးပြုပြီး ရင်းနှီးမြှုပ်နှံမှု လုပ်ဆောင်နိုင်ကြောင်း ထုတ်ပြန်ကြေညာထားပါတယ်။

စစ်ကောင်စီအာဘော် သတင်းစာတွေကနေလည်း နိုင်ငံတကာရင်းနှီးမြှုပ်နှံသူတွေအနေနဲ့ မြန်မာနိုင်ငံအတွင်း ရင်းနှီးမြှုပ်နှံမှု ပိုမိုလွယ်ကူ အဆင်ပြေစေဖို့ အမေရိကန်ဒေါ်လာအပြင် တရုတ်ငွေကြေး ယွမ်နဲ့လည်း လက်ခံဆောင်ရွက်ပေးသွားမယ်လို့ မတ် ၂၁ ရက် က သတင်း ထုတ်ထားပါတယ်။

Photo: DVB