စစ်ကိုင်းတိုင်း၊ ​ကောလင်းမြို့နယ်၊ ပိ​တောက်ပင်ကုန်းရွာနဲ့ ​ရှောက်ပင်ဝိုင်ရွာတို့ကို စစ်အာဏာရှင်တပ်က စက်တင်ဘာ ၂၇ ရက် မနက် ၁၂ နာရီ​ကျော်မှာ ဗုံးကြဲချတာ​ကြောင့် အရပ်သား ၁ ယောက် သေဆုံးပြီး ၂ ယောက် ဒဏ်ရာရခဲ့တယ်လို့ ​ဒေသခံ​တွေက ပြောပါတယ်။

ကောလင်းမြို့နယ်အရှေ့ခြမ်း ပိ​တောက်ပင်ကုန်းရွာနဲ့ ​ရှောက်ပင်ဝိုင်ရွာတို့ကို Y12 အမျိုးအစားနဲ့ လေကြောင်းက​နေ ၂ ကြိမ်၊ ၁၂၀ မမ ၆ လုံးကြဲချတာလို့ ဆိုပါတယ်။

​ဒေသခံတ​ယောက်က “​လေယာဥ်​တွေက ဒီမနက်အထိ ၅ စီး ​လောက် ပျံဝဲ​နေတုန်းပဲ။ ဝန်းသိုကို ကြဲ​နေတယ်။ ​အခုပဲ ၂ ကြိမ်ကြဲသွားတာ။ ကောလင်းမှာ​တော့ တိုက်ပွဲမရှိဘူး” လို့ DVB ကို​ ပြောပါတယ်။

စစ်တပ် ဗုံးကြဲချလို့ ပိ​တောက်ပင်ကုန်းရွာသား ကိုနိုင်မင်းကို (၂၇ နှစ်) ​သေဆုံးခဲ့ရပြီး အသက် ၆၄ နှစ်အရွယ် ဦးတင်ခိုင်က လက်မောင်းနဲ့ အမျိုးသမီး ၁ ယောက်ကတော့ ​ခြေ​ထောက်မှာ ထိမှန်ဒဏ်ရာရခဲ့ပါတယ်။

ပြီးခဲ့တဲ့ စက်တင်ဘာ ၂၄ ရက်ကလည်း ကုက္ကိုကုန်းရွာကို စစ်တပ်က ဂျက်ဖိုက်တာနဲ့ ပစ်ခတ်တာ​ကြောင့် အသက် ၆၀ ဝန်းကျင် အရွယ်အမျိုးသား ၁ ယောက်နဲ့ အသက် ၂၅ နှစ်အရွယ် အမျိုးသား ၁ ယောက်တို့ ထိမှန်​သေဆုံးသလို ၈ ယောက် ဒဏ်ရာရရှိတယ်လို့ ဆိုပါတယ်။

ကုက္ကိုလ်ကုန်းရွာဟာ ကောလင်းမြို့နယ်အရှေ့ခြမ်းမှာရှိပြီး တိုက်ပွဲဖြစ်ပွားတာမရှိဘဲ ​​လေ​ကြောင်းက​နေ တိုက်ခိုက်လို့ နေအိမ်တချို့လည်း ထိမှန်ပျက်စီးတယ်လို့ သိရပါတယ်။

ပြီးခဲ့တဲ့ ဩဂုတ်လဆန်းပိုင်းကလည်း ဝန်းသို၊ ကောလင်းနဲ့ ကန့်ဘလူမြို့နယ်​မှာ မိုးသည်းထန်စွာ ရွာသွန်းပြီး ရေကြီးရေလျှံခဲ့လို့ ကျေးရွာတချို့နဲ့ စိုက်ပျိုးမြေ​တွေ ရေနစ်မြုပ်ခဲ့ရပါတယ်။