ရှမ်းပြည်မြောက်ပိုင်း မူဆယ်၊ နမ့်ခမ်း၊ တန့်ယန်း၊ ကွတ်ခိုင် ၊ လားရှိုး နှင့် သိန္နီမြို့နယ်တွေမှာ ဇန်န၀ါရီလ ၈ ရက်နဲ့ ၉ ရက်နေ့တွေက အချိန်အခါမဟုတ် မိုးသည်းထန်ပြီး မိုးသီးတွေပါ ကြွေကျခဲ့လို့ လူနေအိမ်ခေါင်မိုးတွေနဲ့ သီးနှံစိုက်ခင်းတွေပျက်စီးမှု ရှိခဲ့တယ်လို့ ဒေသခံတွေက ပြောပါတယ်။
နမ့်ခမ်းမြို့နယ်ထဲမှာ မန့်ဟောင်း၊ နောင်မ၊ နောင်ကောင့် ၊ နောင်တောဝ်းစတဲ့ရွာမှာ ဆေးရွက်ကြီး စိုက်ခင်းတွေ ဧက အတော်များများ ပျက်စီးသွားတယ်လို့ နောင်ကောင့်ရွာသား စိုင်း အိုက်စံမြတ်က ဒီဗွီဘီကို ပြောပါတယ်။
“မနေ့ညက မိုးတအားရွာတယ် ၊ မိုးသီးတွေလည်းကျတယ်၊ ည ၉ နာရီလောက်ပေါ့။ မနက်မိုးလင်းတော့ စိုက်ခင်းထဲသွားကြည့်တာ ဟင်းသီးဟင်းရွက်ပင်တွေ၊ မုန်လာပန်းတွေ၊ မုံညင်းတွေ အကုန်ကျေကုန်တယ်။ အဆိုးဆုံးက ကျနော်တို့စီးပွားဖြစ်စိုက်ထားတဲ့ ဆေးရွက်ကြီးပင်တွေပါ ။ ကျနော်ဆို ၂ ဧကလုံး ၊ အရွက်တွေ ကျေကုန်တယ်။ အမှန်က ဒီအရွက်တွေက နောက်ထပ် ၁၀ရက် ၁၅ ရက်ဆို ခူးရောင်းလို့ရနေပြီ။ ရှုံးပြီပေါ့ဗျာ။”
အိမ်ခြေ ၂၃၀ ကျော်ရှိတဲ့ နောင်ကောင့်ရွာမှာ အများစုဟာ ဆေးရွက်ကြီးကို ၀မ်းစာဝင်ငွေအဖြစ် စိုက်စား ကြတာဖြစ်ပြီး တချို့မှာ ၄- ၅ ဧက ထိ ဆုံးရှုံးတယ်လို့ သိရပါတယ်။
[caption id="attachment_76454" align="alignright" width="323"]
ဓာတ်ပုံ - Zaai HomMain[/caption]
နမ့်ခမ်းမြို့နယ် အခြေစိုက် ရပ်မိရပ်ဖတဦးဖြစ်သူ စိုင်းထွန်းလှိုင်က လည်း နောင်ကောင့်ရွာနဲ့ ဆက်နေတဲ့ မန့်ဟောင်း၊ နောင် မ၊ နောင်တောဝ်းတွေ ဘက်မှာလည်း ဆေး ရွက်ကြီး စိုက်ခင်း ပျက်စီးဆုံးရှုံးမှုတွေ ရှိနေပြီး မြို့နယ်အုပ်ချုပ်ရေးကို တင်ပြနိုင်ဖို့ စာရင်းတွေ ကောက် ယူစုဆောင်းနေ တယ်လို့ ပြော ပါတယ်။
‘ဆုံးရှုံးမှုစာရင်း အတိ အကျတော့ မသိရသေးပါဘူးခင်ဗျ ၊ တော်တော်များ မယ်လို့တော့ ထင်ပါတယ်။ ကျနော်တို့ မန့်ဟောင်းရွာဆိုရင် ၅ ဧက၊ နောင်မရွာဘက်က ဧက ၅၀ ၊ နောင်ကောင့် တစ်ရွာထဲတင် ဆုံးရှုံးမှုတန်ဖိုးက ကျပ်သိန်း ၃ ထောင်ဖိုးလို့လည်း ပြောနေကြပါတယ်။”
တရုတ်နယ်စပ် မူဆယ်မြို့နယ်ထဲမှာလည်း ဒီကနေ့ ဇန်န၀ါရီလ ၁၀ ရက် မနက် ၈ နာရီလောက်က မိုးသီးတွေကြွေကျတာ မော်တော်ကားလမ်းမပေါ် ပြည့်လျှံသွားပြီး ယာဉ်ကြောတွေ ပိတ်ဆို့ကုန်တယ်လို့ ဟိုမွန်ရပ်ကွက်နေ ပြည်သူတဦးက ပြောပါတယ်။
"မိုးသီးတွေက အကြီးကြီးဗျ ၊ လက်၂ ဆစ်စာလောက်လည်းရှိတယ်။ ကျနော်တို့ ရှိနေတဲ့ ကလေးကစားကွင်းမှာရော၊ မော်တော်ကားလမ်းပေါ်မှာရော ဖြူဖွေးသွားတာပဲ။”
တန့်ယန်းမြို့နယ်ထဲမှာတော့ မနေ့ညက ကွမ်းသီးလုံးလောက်ရှိတဲ့ မိုးသီးတွေ ကြွေကျ တာကြောင့် အိမ်ခြေတော်တော်များများ ခေါင်မိုးတွေ ပေါက်ကုန်တယ်လို့ ရပ်ကွက် ၄ မှာ နေထိုင်သူ စိုင်းအွန်က ပြောပါတယ်။
[caption id="attachment_76455" align="aligncenter" width="538"]
ဓာတ်ပုံ - Aung Myo Htun[/caption]
"မိုးသီးက အကြီးကြီးဗျ ၊ တချို့ဆို ကွမ်းသီးလုံးလောက်ရှိမယ်။ ကျနော်တို့အိမ်က သွပ်ပြားတွေ ၆ ချပ်လောက် ပေါက်ကုန်တယ်။ မိုးယိုတော့ ဇလုံတွေနဲ့ လိုက်ခံထားရတာ။ အခုလည်း မိုးရွာနေ တယ်။ ခေါင်မိုးမပြင်နိုင်သေးလို့ အိမ်ထဲမှာ မိုးရေခံနေရတုန်းပဲ။”
ခုရက်ပိုင်းအတွင်း အချိန်အခါမဲ့ မိုးရွာသွန်းရာမှာ ဇန်န၀ါရီလ ၈ ရက် မနက်တိုင်းထွာချက်တွေအရ ကယားပြည်နယ် လွိုင်ကော်မြို့မှာ ၁.၉၃ လက်မ နဲ့ အများဆုံးဖြစ်ပြီး ရှမ်းပြည်နယ် နမ့်စန်မြို့က မိုးရေချိန် (၁.၆၉)လက်မဟာ နှစ်ပေါင်း (၂၁)နှစ်အတွင်း အဲဒီမြို့ရဲ့ အများဆုံးရွာသွန်းခဲ့တဲ့ စံချိန်တင်သွားခဲ့တယ်လို့ မိုးဇလဌာနက ထုတ်ပြန်ထားပါတယ်။
လာမယ့် ၁ ရက်၊ ၂ ရက်အတွင်း မြန်မာနိုင်ငံအရှေ့ ပိုင်းဒေသတွေမှာ မိုးဆက်လက်ထစ်ချုန်း ရွာနိုင်တယ်လို့လည်း မိုးဇလက ခန့်မှန်းထားပါတယ်။
