ငွေစက္ကူ ၁၈ တန်တင်ဆောင်လာတဲ့ ဘိုလီးဗီးယားလေတပ်က ကုန်တင်လေယာဉ်တစင်း ဖေဖော်ဝါရီ ၂၇ ရက်မှာ လူဦးရေထူထပ်တဲ့ အယ်လ်အော်တိုမြို့မှာ ပျက်ကျခဲ့တာမှာ  ကလေး ၄ ယောက် အပါအဝင် လူ ၂၂ ယောက် သေဆုံးပြီး အယောက် ၃၀ ဒဏ်ရာရခဲ့တယ်လို့ အာဏာပိုင်တွေက ပြောပါတယ်။

ဟာကျူလီလေယာဉ်ဟာ ငွေစက္ကူဟောင်းတွေကို အစားထိုးဖို့ ရည်ရွယ်ထားတဲ့ ငွေစက္ကူတွေကို သယ်လာချိန် အယ်လ်အော်တို အပြည်ပြည်ဆိုင်ရာလေဆိပ်နားမှာ ပျက်ကျခဲ့ပြီး ပထမ လေယာဉ်မှူးကတော့   ဖေဖော်ဝါရီ ၂၈ ရက်အထိ အထူးကြပ်မတ်ကုသဆောင်ထဲမှာ ရှိနေပါတယ်။

ပြည်ထဲရေးဝန်ကြီးဌာန ဒုတိယဝန်ကြီး ဟာနန်ပါရီဒက်စ်က လေယာဉ်ဟာ အရေးပေါ် အလှည့်အပြောင်း လုပ်ပြီးတဲ့နောက် လူနေအိမ် ၄၀ လောက်ကို မတိုက်မိအောင် အနီးကပ် ရှောင်ရှားနိုင်ခဲ့ပြီး  ပိုကြီးတဲ့ဘေးအန္တရာယ်ကို ကာကွယ်နိုင်ခဲ့တယ်လို့ ပြောပါတယ်။

လေယာဉ်ပျက်ကျပြီး မကြာမီ လူထောင်ချီက မြေပြင်မှာ ပြန့်ကျဲနေတဲ့ ငွေစက္ကူတွေကို ကောက်ယူဖို့ ကြိုးစားခဲ့ကြလို့ လုံခြုံရေးတပ်ဖွဲ့တွေက မျက်ရည်ယိုဗုံးတွေ အသုံးပြုပြီး လူ ၄၉ ယောက်ကို ဖမ်းဆီးခဲ့တယ်လို့ ပါရီဒက်စ်က ပြောပါတယ်။

အာဏာပိုင်တွေက ပြန့်ကြဲ ငွေစက္ကူတွေကို မီးရှို့ဖျက်ဆီးခဲ့ပြီး ဒီငွေစက္ကူတွေမှာ တရားဝင်တန်ဖိုးမရှိလို့ လက်ဝယ်ထားရှိတာက ရာဇဝတ်မှုတခုဖြစ်တယ်လို့ ပြောခဲ့ပါတယ်။

အာမခံဌာနက ဗဟိုဘဏ်ကို ပြန်ပေးဆပ်မှာဖြစ်ပြီး နစ်နာသူတွေရဲ့ မိသားစုတွေကို လျော်ကြေးပေးမယ်လို့ အတည်ပြုခဲ့ပါတယ်။ ဒီဖြစ်ရပ်ကြောင့် အယ်လ်အော်တို ဒေသခံတွေကြားမှာ ဒေါသတွေ ထွက်ခဲ့ပါတယ်။ 

Source: Reuters