ပဋိပက္ခ ကြာရှည်နေလို့ ရုရှားနိုင်ငံရဲ့ စားသုံးသူဈေးကွက်ဟာ ဖိအားတွေအောက်မှာ ကျဆင်းနေပြီး စားသောက်ဆိုင်တွေမှာ ဈေးနှုန်းတွေ မြင့်တက်နေပါတယ်။

ရသုံးမှန်းခြေ ငွေစာရင်းမှာ ကျပ်တည်းနေလို့ မိသားစုတွေဟာ အပြင်ထွက်စားသောက်မှု နည်းပါးလာပြီး ကုန်စုံပစ္စည်းတွေအတွက် ပိုသတိထားသုံးစွဲဖို့ ဖိအားပေးခံနေရပါတယ်။

ရုရှားနိုင်ငံက စားသောက်ဆိုင်အများအပြားဟာ လုပ်ငန်းလည်ပတ်စရိတ်တွေ မြင့်လာလို့ ရုန်းကန် နေရတာပါ။

အခွန်၊ ထောက်ပံ့ရေးပစ္စည်းတွေနဲ့ အသုံးစရိတ်တွေ မြင့်လာလို့ ပိုင်ရှင်တွေဟာ ရှင်သန်ရပ်တည်နိုင်ဖို့ စားစရာစာရင်းထဲက ဈေးနှုန်းတွေကို မြှင့်တင်ဖို့ ဖိအားပေးခံခဲ့ရပါတယ်။

မော်စကိုမြို့တော်က ဧည့်ဝတ်ပြုမှုကဏ္ဍမှာ စားသောက်ဆိုင်နဲ့ ဘားတွေ အများအပြားကို ပိတ်ဖို့ အတင်းအကျပ် ဖိအားပေးသလို ဖြစ်ခဲ့ရပါတယ်။

“ဈေးနှုန်းတွေကို သုံးလတကြိမ် ပြောင်းလို့မရပါဘူး။ အခုအခြေအနေက ကျနော်တို့အတွက် အရမ်းခက်ခဲ နေပါတယ်” လို့ လီမာ စားသောက်ဆိုင်ရဲ့ မန်နေဂျာ မိုင်လန် မဲန်ဒက်ဇ်က ပြောပါတယ်။

ဖောက်သည်တွေ ကျဆင်းလာခြင်း၊ ပေးသွင်းသူကုန်ကျစရိတ်တွေ မြင့်တက်လာခြင်းနဲ့ အခွန်တွေ မြင့်မားလာခြင်းတို့ကြောင့် အမြတ်အစွန်းနည်းနေပြီး အပြင်ထွက်စားသောက်တဲ့ ဇိမ်ခံအလေ့အထ ကို အိမ်ထောင်စု အတော်များများ လျှော့ချနေကြရပါတယ်။

တချိန်တည်းမှာ နိုင်ငံတဝန်းက စူပါမားကက်တွေက ကုန်ပစ္စည်းတွေကို ကောင်းကောင်း သိုလှောင် ထားနိုင်ဆဲဖြစ်ပေမဲ့ လက်လီရောင်းသူတွေက အခြေခံ၊ ဈေးသက်သာတဲ့ ပစ္စည်းတွေဘက် ၀ယ်လို အားပြောင်းလာလို့ ထုတ်ကုန်အမျိုးအစားတွေကို တိတ်တိတ်လျှော့ချလာတာနဲ့အမျှ စင်ပေါ်မှာ သိသိသာသာ ရွေးချယ်စရာ နည်းလာပါတယ်။

စက်မှုလုပ်ငန်းကိန်းဂဏန်းတွေအရ အစားအစာအမျိုးအစား အများစုမှာ ရွေးစရာတွေ လျော့သွားတာကို ပြနေပြီး ဒါက အမှန်တကယ် ဝယ်ယူနိုင်စွမ်း နည်းလာတာကို ထင်ဟပ်နေပါတယ်။

အိမ်ထောင်စုတွေနဲ့ စီးပွားရေးလုပ်ငန်းရှင်တွေအတွက် ပြင်းထန်တဲ့ လက်တွေ့အခြေအနေကို နေ့စဉ် စစ်ဆေးမှုဟာ ဖြစ်နေကျ အခြေအနေကို ပြန်ရေးနေရသလို ဖြစ်နေပြီး ရှေ့လျှောက် စီးပွားရေး တင်းမာမှုတွေကို အတိုင်းသား မြင်ရစေနိုင်ပါတယ်။

Source: Reuters