ရခိုင်ပြည်နယ်နဲ့ မကွေးတိုင်းအစပ်နားမှာ ဖေဖော်ဝါရီ ၃ ရက် ညပိုင်းက အင်အားအသင့် အတင့်ရှိတဲ့ မြေငလျင် ၂ ကြိမ်လှုပ်ခတ်ခဲ့ပြီး မန္တလေးနဲ့ ပဲခူးတိုင်းထဲမှာလည်း ငလျင်တွေ လှုပ်ခတ်ခဲ့ပါတယ်။
အမျိုးသားညီညွတ်ရေးအစိုးရရဲ့ လူမှုရေးရာ၊ အလုပ်သမားနဲ့ လူသားချင်းစာနာထောက်ထားရေး ဝန်ကြီးဌာနရဲ့ ထုတ်ပြန်အရ ဖေဖော်ဝါရီ ၃ ရက် ည ၁၀ နာရီ ၄ မိနစ်အချိန်မှာ မကွေးတိုင်း၊ ရေနံချောင်းမြို့ရဲ့ အနောက်ဘက် ၉၅ ကီလိုမီတာအကွာ၊ ရခိုင်ပြည်နယ်နဲ့ မကွေးတိုင်းအစပ်၊ မြေအောက်အနက် ၆၁ ဒသမ ၇ ကီလိုမီတာလောက်ကိုဗဟိုပြုပြီး ရစ်ချ်တာစကေး ၅ ဒသမ ၉ အဆင့် အင်အားအတော်အသင့်ရှိတဲ့ မြေငလျင်တခု လှုပ်ခတ်ခဲ့ပါတယ်။
အဲဒီနောက် ည ၁၀ နာရီ ၂၁ မိနစ်မှာလည်း မကွေးတိုင်း၊ ရေနံချောင်းမြို့ရဲ့ အနောက်ဘက် ၈၉ ကီလိုမီတာအကွာ၊ စေတုတ္တရာမြို့နားမှာ မြေအောက်အနက် ၆၈ ကီလိုမီတာလောက်ကိုဗဟိုပြုပြီး ရစ်ချ်တာစကေး ၅ ဒသမ ၂ အဆင့် အင်အားအတော်အသင့်ရှိတဲ့ မြေငလျင်တခု ထပ်လှုပ်တယ်လို့ ဆိုပါတယ်။
ထိုင်းနိုင်ငံ မိုးလေဝသဌာနရဲ့ ငလျင်စောင့်ကြည့်ရေးဌာနကတော့ မကွေးတိုင်း၊ စေတုတ္တရာမြို့နဲ့ ရခိုင်ပြည်နယ်၊ မင်းပြားမြို့ကြား ရခိုင်ရိုးမပေါ်မှာ ရစ်ချ်တာစကေး ၅ ဒသမ ၈၊ ရခိုင်ပြည်နယ်၊ မင်းပြားမြို့နယ်ထဲမှာ ရစ်ချ်တာစကေး ၅ ဒသမ ၄ နဲ့ လှုပ်ခတ်ခဲ့တယ်လို့ ဆိုပါတယ်။
စစ်ကောင်စီဩဇာခံ မိုးလေဝသဌာနကတော့ စေတုတ္တရာမြို့ရဲ့ အနောက်-အနောက်မြောက်ဘက် မိုင် ၂၀ လောက်အကွာမှာ အနက် ၅၈ ကီလိုမီတာကို ဗဟိုပြုပြီး အင်အား ရစ်ချ်တာစကေး ၆၊ စေတုတ္တရာမြို့ရဲ့ အနောက်-အနောက်မြောက်ဘက် ၂၆ မိုင်လောက်အကွာမှာ အနက် ၄၄ ကီလိုမီတာကို ဗဟိုပြုပြီး အင်အား ရစ်ချ်တာစကေး ၅ ဒသမ ၂ နဲ့ လှုပ်ခတ်ခဲ့တယ်လို့ ထုတ်ပြန်ထားပါတယ်။
ဇန်နဝါရီ ၃ ရက် နေ့လယ် ၁၂ နာရီ ၄၂ မိနစ်ကလည်း ပုသိမ်ကြီးမြို့နယ်ရဲ့ အနောက်မြောက်ဘက် ၃ မိုင်လောက်အကွာမှာ အင်အား ၃ ဒသမ ၉ ရစ်ချ်တာစကေးနဲ့ ငလျင်တခု လှုပ်ခဲ့တယ်လို့ အင်အားပြင်း စစ်ကိုင်းငလျင်ကြီးရဲ့ နောက်ဆက်တွဲ မြေငလျင်သတင်းအမှတ်စဉ် ၂၇၃ အဖြစ် ထုတ်ပြန်ထားပါတယ်။
ထိုင်းမိုးလေဝသဌာနကတော့ ဒီမနက်ပိုင်းက ပဲခူးတိုင်း၊ ဘုရားကြီးနဲ့ ရန်ကုန်တိုင်း ဥက္ကံမြို့နယ်ကြားမှာ ရစ်ချ်တာစကေး ၂ ဒသမ ၈၊ ဆွာမြို့နားမှာ ရစ်ချ်တာစကေး ၂ ဒသမ ၂ နဲ့ ငလျင်တွေလှုပ်ခတ်ခဲ့တယ်လို့ ဖော်ပြထားပါတယ်။
ဒါ့အပြင် ဖေဖော်ဝါရီ ၂ ရက်နေ့ကလည်း မြန်မာနိုင်ငံမှာ ငလျင်အသေး ၃ ကြိမ်၊ ၁ ရက်နေ့က ၄ ကြိမ်လှုပ်ခတ်ခဲ့တယ်လို့ ဖော်ပြထားပါတယ်။
