စစ်ကိုင်းတိုင်း၊ ခင်ဦးမြို့နယ်၊ ရွှေဘို-မြစ်ကြီးနား ဗျူဟာလမ်းပိုင်းမှာ ပိတ်မိနေတဲ့ကားတွေ ရှိရာကို ဒီဇင်ဘာ ၂၇ ရက်မှာ စစ်တပ်က ဗုံးကြဲခဲ့လို့ ဒေသခံနဲ့ ခရီးသွား ၉ ယောက် သေဆုံးပြီး ၂၀ ကျော် ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ခင်ဦးမြို့ရဲ့အရှေ့ဘက် မြေနီလျှိုရွာနားက ပြည်သူတွေ၊ ဈေးဆိုင်ခန်းတွေ၊ ပိတ်မိနေတဲ့ကားတွေ ရှိရာကို နေ့လယ် ၁၂ နာရီခွဲကျော်မှာ ဂျက်ဖိုက်တာတစင်း၊ Mi 35 တစင်းတို့နဲ့ ဗုံးကြဲပစ်ခတ် တိုက်ခိုက်တာလို့ ဆိုပါတယ်။

ခင်ဦးမြို့နယ် သတင်းမှန်ပြန်ကြားရေး တာဝန်ရှိသူတယောက်က “သေတာက ဒေသခံအမျိုးသမီး ၂ ယောက်၊ အမျိုးသားတယောက်၊ ကျန်တာက ကားဆရာနဲ့ ခရီးသွားပြည်သူတွေ။ ဒီနေ့မနက် ဆေးရုံရောက် ပြည်သူ ၅ ဦး စိုးရိမ်ရပြီး ဒဏ်ရာရတာက အားလုံး ၂၀ ကျော်ပါ” လို့ ပြောပါတယ်။

စစ်တပ်က တိုက်ခိုက်လို့ Star link ဆိုင်၊ ထမင်းဆိုင်တွေ၊ ခရီးသွားကား၊ ကုန်ကားနဲ့ ဆီသယ်ကားတွေ ထိခိုက်ခဲ့ပြီး ကား ၉ စီး မီးလောင်ပျက်စီးခဲ့တယ်လို့ ဆိုပါတယ်။

ခင်ဦးမြို့နယ်ပြည်သူ့အုပ်ချုပ်ရေးအဖွဲ့ရဲ့ ပြန်ကြားရေးတာဝန်ရှိသူတယောက်က “အခုဗုံးကြဲခံရတဲ့ မြေနီလျှိုလမ်းဆုံကို ဒီဇင်ဘာလထဲမှာတင် ၂ ကြိမ် ဗုံးကြဲခံရတာပါ။ အခုဗုံးကြဲခံရတဲ့ ဒုတိယအကြိမ်မှာ အရင်ဦးစွာ ဂျက်ဖိုက်တာနဲ့ဗုံး ၂ လုံး ကြဲသွားတယ်။ မိနစ်ပိုင်းလေးပဲခြားပြီး ရှေ့ဆင့်နောက်ဆင့်ဆိုသလို Mi 35 တိုက်ခိုက်‌ရေးလေယာဉ်က Rocket တွေနဲ့လည်းထုသလို စက်လက်နဲ့ပါပစ်သွားတာပါ။ ရွှေဘို-မြစ်ကြီးနားဗျူဟာလမ်းကို စစ်တပ်ဘက်က ဒီဇင်ဘာ ၁၀ ရက်ကတည်းကပိတ်ထားတော့ အခုဗုံးကြဲခံရတဲ့ မြေနီလျှိုလမ်းဆုံမှာအထက်ဘက်ကိုတက်မဲ့ ကားတွေပိတ်မိနေပြီး ရပ်နေကြရတယ်။ အဲဒီလမ်းဆုံမှာ ထမင်းဆိုင်တွေနဲ့ Star Link ဆိုင်တွေဖွင့်ထားတော့ လူစည်ကားတဲ့နေရာပါ။ တိုက်ပွဲဖြစ်နေတာလည်းမရှိဘဲနဲ့ အဲဒီ လူစုလူဝေးတွေများတဲ့နေရာကိုပစ်မှတ်ထားပြီး ဗုံးကြဲသွားတာဖြစ်လို့ အရပ်သား အပြစ်မဲ့ပြည်သူ ၉ ယောက်လောက် သေဆုံးပြီးတော့ ၁၀ ယောက်ထက်မနည်း ဒဏ်ရာတွေရခဲ့ကြပါတယ်။ ဒဏ်ရာရတဲ့သူတွေထဲမှာလည်း အသက်အန္တရာယ်စိုးရိမ်ရသူတွေရှိနေတယ်လို့ သိရတယ်။ အခုဗုံးကြဲခံရမှုဖြစ်စဉ်မှာ ဆီဘောက်ဆာကားတွေနဲ့ ကုန်ကားတွေ ၉ စီးလောက်လည်း မီးလောင်ပျက်စီးပါသေးတယ်” လို့ DVB ကို ပြောပါတယ်။

ဒီဇင်ဘာ ၁၈ ရက်ကလည်း အဲဒီနေရာဝန်းကျင်ကို ဂျက်ဖိုက်တာ ၄ စင်း၊ ဂျိုင်ရိုကော်ပတာ ၃ စင်းတို့နဲ့ တိုက်ခိုက်ခဲ့တာကြောင့် ပြည်သူ ၇ ယောက် သေဆုံးခဲ့ပါသေးတယ်။

ခ‌င်ဦး-ကန့်ဘလူနယ်စပ် ကျီကျင်းဘက်ကနေ ဗျူဟာလမ်းမကြီးအထက်ကိုတက်မဲ့ ကားတွေကို စစ်တပ်က တလကျော်ကြာ ပိတ်ထားတာဖြစ်ပြီး ကန့်ဘလူ၊ ကျီကျင်းကနေ ရွှေဘိုမြို့အထိ ကားအစီးရေ ၅၀၀ ကျော် ပိတ်မိနေတာပါ။

လမ်းပိတ်လို့ ရွှေဘိုမြို့ဘက်ကို ပြန်သွားတဲ့ကားနဲ့ ပြည်သူတွေကိုလည်း ရွှေဘိုမှာရှိတဲ့ လေ့ကျင့်ရေး ၈ တပ်ကနေ ပေါ်တာဆွဲ ငွေညှစ်နေတယ်လို့ ဒေသခံတွေက ပြောပြီး ရွေးကောက်ပွဲအလွန်မှ ကားတွေ ဖြတ်သန်းခွင့်ပေးမယ်လို့ ကြားသိရကြောင်း ခရီးသွားတွေက ပြောပါတယ်။