မဲဆွယ်စည်းရုံးရာမှာ ‘တော်လှန်ရေး’ ဆိုတဲ့ စကားလုံးကို သုံးနှုန်းခဲ့တဲ့ ပြည်သူ့ပါတီက သင်္ဃန်းကျွန်းမြို့နယ် ပြည်သူ့လွှတ်တော်ကိုယ်စားလှယ်လောင်း ဦးလွင်မြင့်ကို ဒီဇင်ဘာ ၁၈ ရက်မှာ မြို့နယ်ရဲစခန်းက ပုဒ်မ ၅၈(ဂ) နဲ့ အမှုဖွင့်လိုက်တယ်လို့ ပါတီနဲ့ နီးစပ်သူတွေဆီက သိရပါတယ်။
ပြည်သူ့လွှတ်တော်ကိုယ်စားလှယ်လောင်း ဦးလွင်မြင့်ကို ဒီဇင်ဘာ ၁၇ ရက် မနက် ၉ နာရီမှာ စစ်ကောင်စီက နေအိမ်မှာ လာရောက်ဖမ်းဆီးပြီး ညပိုင်းမှာ လွှတ်တော်ကိုယ်စားလှယ်လောင်း ၂ ယောက်က အာမခံနဲ့ ပြန်လည်ထုတ်ခဲ့ရတယ်လို့ ပါတီဝင်တယောက်က DVB ကို ပြောပါတယ်။
“ရဲစခန်းမှာ စစ်တာအတော်ကြာတယ်၊ ည ၁ နာရီမှ ပြန်လွတ်တာ။ ဒါတောင် ကိုယ်စားလှယ်လောင်း ၂ ယောက်က အာမခံနဲ့ပြန်ထုတ်လို့။ ဖုန်းကိုတော့ CID က သိမ်းသွားတယ်။ ၁၈ ရက်နေ့ကျတော့ ပုဒ်မ ၅၈ (ဂ) နဲ့ အမှုဖွင့်လိုက်ရော။”
ဦးလွင်မြင့် ဖမ်းဆီးခံရတာဟာ စစ်တပ်ထောက်ခံသူ သတင်းထောက် နောင်တော်လေး အပါအဝင် ၆ ယောက်က ရွေးကောက်ပွဲကော်မရှင်ကို တိုင်ကြားတာကြောင့် အခုလိုစစ်ဆေးတာလို့ မြို့နယ်ရွေးကောက်ပွဲရှင်နဲ့ နီးစပ်သူတယောက်က DVB ကို ပြောပါတယ်။
“ပထမတကြိမ်က တော်လှန်ရေး ဆိုတဲ့ စကားလုံး သုံးတယ်၊ စရဖက ခေါ်စစ်ပြီး ပြန်လွှတ်လိုက်တယ်။ အဲဒီနောက် ဦးလွင်မြင့်က သူရဲ့ဖေ့စ်ဘွတ်ခ် ပရိုဖိုင်မှာ NUG ပုံတင်တယ်ဆိုပြီး နောင်တော်လေး အပါအဝင် ကြံ့ခိုင်ရေးသတင်းထောက် ၆ ယောက်က UEC ကို ထပ်တိုင်လို့ ဖမ်းပြီးစစ်တာ။ ဘာလို့လဲဆိုတော့ သင်္ဃန်းကျွန်းမှာ ကြံ့ခိုင်ရေးက ဒေါ်သန်းသန်းအေး ပြိုင်မှာဆိုတော့ ဦးလွင်မြင့် နိုင်သွားမှာ ကြောက်နေတယ်။ ဒါကြောင့် အခုလို လုပ်တာ။”
UEC က အမှုဖွင့်ထားတဲ့ ရွေးကောက်ပွဲဥပဒေပုဒ်မ ၅၈(ဂ) မှာ နည်းဥပဒေများပါ မဲဆွယ်စည်းရုံးခြင်းဆိုင်ရာ စည်းကမ်းချက် တရပ်ရပ်ကို ဖောက်ဖျက် ကျူးလွန်ခြင်း ဖြစ်ပါတယ်။
တော်လှန်ရေးဆိုတဲ့ စကားလုံးကို သုံးပြီး မဲဆွယ်စည်းရုံးတာကို အရေးယူမှု ရှိ၊ မရှိ နိုဝင်ဘာ ၁၅ ရက်က စစ်အုပ်စုနဲ့ ပြည်တွင်းသတင်းမီဒီယာတွေနဲ့ အုပ်စုဖွဲ့တည်ထောင်ထားတဲ့ Viber Group မှာ Myanmar Nations Post သတင်းဌာနမှ နောင်တော်လေးက မေးမြန်းခဲ့တာဖြစ်ပါတယ်။
ဒီလိုမေးမြန်းခဲ့တဲ့အတွက် နိုဝင်ဘာ ၂၁ ရက်မှာ ဦးလွင်မြင့်က ကြံ့ခိုင်ရေးသတင်းထောက် နောင်တော်လေးကို လုပ်ထုံးလုပ်နည်းနဲ့အညီ အရေးယူပေးဖို့ စာနယ်ဇင်းကောင်စီကို ပြန်လည်တိုင်ကြားခဲ့ပါတယ်။
စစ်ကောင်စီက ဖွဲ့စည်းပေးထားတဲ့ စာနယ်ဇင်းကောင်စီက နှစ်ဖက်စလုံးကို ခေါ်ယူပြီး ညှိနှိုင်းခဲ့ရာ ပြေလည်သွားခဲ့ပြီးနောက် ဒီဇင်ဘာ ၇ ရက်မှာ ကြံ့ခိုင်ရေးသတင်းထောက် နောင်တော်လေး အပါအဝင် ၆ ယောက်က ဦးလွင့်မြင်အား UEC ကို ထပ်မံတိုင်ကြားခဲ့တာပါ။
စစ်အုပ်စုရဲ့ ဝါဒဖြန့် သတင်းထောက်တွေရဲ့ လုပ်ရပ်ကြောင့် ပီသုံးလုံးပါတီ ဥက္ကဋ္ဌ ဒေါ်သက်သက်ခိုင်၊ ရခိုင်သားရေးရာဝန်ကြီးကိုယ်စားလှယ်လောင်း ဦးတင်ထူးအောင် နဲ့ လေဘာပါတီက အမျိုးသားလွှတ်တော်ကိုယ်စားလှယ်လောင်း ဦးကျော်သူရတို့ကို UEC က ကိုယ်စားလှယ်အဖြစ် ရပ်နားခဲ့ပါတယ်။
