စစ်ကိုင်းတိုင်း၊ ဝက်လက်မြို့နယ်ထဲမှာ ပြီးခဲ့တဲ့ရက်ပိုင်းကဗုံးကြဲခံရလို့ ပြည်သူ ၅ ယောက် သေဆုံးခဲ့တဲ့နေရာကို စစ်ကောင်စီတပ်က ဒီဇင်ဘာ ၁၉ ရက် မွန်းလွဲ ၁ နာရီခွဲဝန်းကျင်မှာ ထပ်ပြီးဗုံးကြဲခဲ့တာကြောင့် ပြည်သူ ၃ ယောက် ဒဏ်ရာရပြီး လူနေအိမ်တွေလည်း မီးလောင် ပျက်စီးခဲ့ရတယ်လို့ ဒေသခံတွေဆီကနေ သိရပါတယ်။
ဒေသခံတယောက်က “ပြီးခဲ့တဲ့ ၁၃ ရက်နေ့ကမှ ဗုံးကြဲခံရလို့ လူ ၅ ယောက် သေဆုံးသွားခဲ့တဲ့ ထုံးဘိုရွာနားက သန်းကုန်းတောတိုက်ထဲကိုပဲ ထပ်ကြဲခံရတာဗျ။ လောလောဆယ်တော့ သေဆုံးတာ မရှိပေမဲ့ ဒဏ်ရာရတဲ့ပြည်သူ ၃ ယောက်ရှိတယ်။ စိုးရိမ်ရတဲ့သူ ၁ ယောက်ပါတယ်ဗျ” လို့ ပြောပါတယ်။
အခု ဒုတိယအကြိမ် လေကြောင်းတိုက်ခိုက်ခံရတာကြောင့် အသက် ၃၀ အရွယ် ကိုစောထွန်း၊ အသက် ၃၄ နှစ်အရွယ် ကိုမျိုးအောင်၊ အသက် ၅၀ အရွယ် ဒေါ်နီ တို့ ထိခိုက်ဒဏ်ရာရရှိခဲ့ကြတယ်လို့ ဆိုပါတယ်။
Wetlet Informational Network ရဲ့ တာဝန်ခံ ကိုနဂါးလေး က “အခု ဒုတိယအကြိမ် ထပ်ကြဲသွားတဲ့ ဂျက်ဖိုက်တာက တံတားဦးက တက်လာတာဖြစ်ပြီး ပေါင် ၂၅၀ ဗုံးသီး ၂ လုံး ထပ်ကြဲသွားတာပါ။ အဲဒီနေရာမှာ တိုက်ပွဲဖြစ်နေတာလည်း မရှိသလို PDF စခန်းလည်းမရှိပါဘူး” လို့ DVB ကို ပြောပါတယ်။
အာဏာသိမ်းစစ်တပ်က ရွေးကောက်ပွဲမလုပ်ဖြစ်တဲ့ ဝက်လက်မြို့နယ်ထဲကို လေကြောင်းတိုက်ခိုက်မှုတွေ ဆက်တိုက်လုပ်နေသလို အင်အားအလုံးအရင်းနဲ့လည်း မြေပြင်စစ်ကြောင်းထိုးနေလို့ ပြည်သူတွေအနေနဲ့လည်း သတိနဲ့သွားလာနေထိုင်ကြဖို့လည်း သူက ဆက်ပြောပါတယ်။
ပြီးခဲ့တဲ့ ဒီဇင်ဘာ ၁၃ ရက်နေ့ ည ၉ နာရီခွဲဝန်းကျင်က ဝက်လက်မြို့နယ် အရှေ့မြောက်ဘက်ခြမ်း ၁၅ မိုင်လောက်ဝေးတဲ့ ထုံးဘိုကျေးရွာအနီးက သန်းကုန်းတောတိုက်ထဲကို တံတားဦး လေတပ်ကနေတက်လာတဲ့ ဂျက်ဖိုက်တာ ၂ စင်းနဲ့ ဗုံးကြဲတိုက်ခိုက်လို့ ၄ နှစ်အရွယ် မအေးမြတ်သူဇာ အပါအဝင် အသက် ၇၀ အရွယ် ဦးခင်မောင်လွင်၊ အသက် ၃၅ နှစ်အရွယ် မသူဇာနွယ်၊ အသက် ၂၆ နှစ်အရွယ် ကိုတွတ်ပီ နဲ့ အသက် ၄၀ အရွယ် ဒေါ်နှင်းမြ တို့ သေဆုံးခဲ့ကြရပါသေးတယ်။
