ထိုင်း- ကမ္ဘောဒီးယား နယ်စပ်ပဋိပက္ခ တကျော့ပြန်စစ်ပွဲဟာ သီတင်းတပတ်ကျော်လာသည်ထိ မရပ်စဲနိုင်သေးတဲ့အပြင် မူလ ၄ ခရိုင်နယ်စပ်မှာသာ တိုက်ပွဲရှိခဲ့ပေမဲ့ လက်ရှိ ထိုင်းဘက်မှာ ၇ ခရိုင်ထိ ကျယ်ပြန့်လာပြီး အဲဒီထဲက ၅ မြို့နယ်ကို စစ်အုပ်ချုပ်ရေးနဲ့ ညမထွက်ရ ကာဖျူးအမိန့် ထုတ်ပြန်ကြေညာထားတယ်လို့ ထိုင်းသတင်းတွေမှာ ဖော်ပြပါတယ်။
ဒီဇင်ဘာ ၈ ရက်နေ့က စတင်ခဲ့တဲ့ တိုက်ပွဲမှာ ဆီစကစ်၊ ဘူရီရမ်၊ ဥဘွန်းရာ့ချ်ဌာနီ၊ စူရင်း စတဲ့ ၄ ခရိုင်နယ်စပ်မှာသာ ဖြစ်ခဲ့ပေမဲ့ ၂၀၂၅ ဒီဇင်ဘာ ၁၄ ရက်မှာ နောက်ထပ် ဆာကယောက်၊ ကျန်ထပူရီ နဲ့ တရတ်ခရိုင်တွေထိ ပျံ့နှံ့လာခဲ့ပါတယ်။
တရတ်ခရိုင်မှာ ဆိုရင် ဒီဇင်ဘာ ၁၃ ရက် ည ၉ နာရီလောက်က တရတ်ခရိုင် ဝိထယိုး ထင်းစစ်ဌာနချုပ်ဟာ M 79 လက်နက်ကြီးနဲ့ ၃ ကြိမ်ထက်မနည်း အထုခံရတယ်၊ လက်နက် ကျည်တွေဟာ ကွင်းပြင်မှာ ကျတဲ့အတွက် ထိခိုက်ဒဏ်ရာရသူ မရှိခဲ့ပေမဲ့ အဆိုပါလက်နက်ကြီးဟာ ထိုင်းနိုင်ငံထဲကနေပြီးတော့ ပစ်တယ်လို့ ယူဆရတာကြောင့် အများပြည်သူ အသက်အိုးအိမ် စည်းစိမ်ကာကွယ်ဖို့အတွက် ကျန်ထပူရီ-တရတ် ပြည်သူ့ကာကွယ်ရေးပူးပေါင်း တပ်က တရတ်ခရိုင်ရှိ မြို့နယ် ၅ မြို့နယ်ကို စစ်အုပ်ချုပ်ရေးနဲ့ ညမထွက်ရ ကာဖျူး အမိန့်ထုတ်ပြန်လိုက်တယ်လို့ ဆိုပါတယ်။
ဒီဇင်ဘာ ၁၄ ရက်နေ့စွဲနဲ့ စစ်အုပ်ချုပ်ရေး ထုတ်ပြန်လိုက်တဲ့ ၅ မြို့နယ်မှာ တရတ်၊ ခလောင်းယိုင်၊ ဝေါ်လိုက်၊ လျမ်ငွပ်၊ ခေါဝ်ဆမင် စတဲ့မြို့နယ်တွေဖြစ်ပြီး ည ၇ နာရီမှ မနက် ၅ နာရီအထိ အပြင်မထွက်ရ။ အရေးကြီးကိစ္စနဲ့ ထွက်ခွာလိုက သက်ဆိုင်ရာ ရပ်/ကျေးအုပ်ချုပ်ရေးမှူးနဲ့ လုံခြုံရေးတပ်ဖွဲ့ဝင်တွေထံ ခွင့်ပြုချက်တောင်းရမယ်လို့ ဆိုပါတယ်။
ဒါ့အပြင် လုံခြုံရေးတပ်ဖွဲ့ဝင်တွေအနေနဲ့ မသင်္ကာသူတွေကို ခေါ်ယူစစ်ဆေးမေးမြန်းခွင့် ရှိတယ်လို့ ဆိုပါတယ်။
ကမ္ဘောဒီးယားစစ်တပ်ဟာ နိုင်ငံခြားကြေးစားစစ်သည်တွေ ငှားရမ်းပြီး ထိုင်းဘက် လျှို့ဝှက်စေလွှတ်ထားကြောင်း သတင်းတွေလည်း ထွက်ပေါ်နေတာကြောင့် ထိုင်း ကြည်း၊ ရေ၊ လေ တပ်ဖွဲ့နဲ့ လဝက က နိုင်ငံခြားသားအဝင်အထွက်တွေလည်း တင်းကျပ်စွာ စစ်ဆေးနေပါတယ်။
ဒီဇင်ဘာ ၁၅ ရက် ဒီကနေ့မနက်က ဆီစကစ်ခရိုင် ကန်ထရာရတ်မြို့နယ် ဖူးမခေတောင်က တိုက်ပွဲမှာ ထိုင်းဆေးတပ်သားတစ်ယောက် BM-21 လက်နက်ကြီး ကျည်သင့်ပြီး ကျဆုံးခဲ့တယ်လို့ အမှတ် ၂ တိုင်းဒေသ ထိုင်းစစ်တပ်က ထုတ်ပြန်ပါတယ်။
ဒီနေ့မနက်မှာပဲ အဆိုပါ ကန်ထရာရတ်မြို့နယ် ဆောဝ်ထုန်းချိုင်းအုပ်စုထဲမှာလည်း ကမ္ဘောဒီးယားဘက်က ပစ်လာတဲ့ လက်နက်ကြီးကျည်ဟာ ရွာထဲထိ ရောက်လာတာကြောင့် အိမ်ခြေပျက်စီးသလို ပြည်သူတယောက် ထိမှန်သေဆုံးခဲ့ရတယ်လို့ ဆိုပါတယ်။
ဒီဇင်ဘာ ၈ ရက်မှ စတင်တဲ့ တိုက်ပွဲတွေအတွင်း ထိုင်းစစ်တပ်ဘက်မှာ စစ်သည် ၁၅ ယောက် ကျဆုံးပြီး ဒဏ်ရာရသူ ၃၂၇ ယောက်ရှိတယ်လို့ ထိုင်း-ကမ္ဘောဒီးယားပဋိပက္ခနဲ့ ပတ်သက်တဲ့ သတင်းစာရှင်းပွဲမှာ ထုတ်ပြန်ပါတယ်။
ဒီဇင်ဘာ ၈ မှ ၁၃ ထိ ၆ ရက်တာကာလအတွင်း ကမ္ဘောဒီးယားစစ်တပ်ဘက်က ကျဆုံးသူ ၁၈၁ ယောက်ရှိပြီး ထိုင်းစစ်တပ်မှ ကမ္ဘောဒီးယားရဲ့ တင့်ကား ၁၀ စီး၊ ဒရုန်း ၆၄ စင်း၊ BM 21 ဒုံးကျည်တင်ကား ၁ စီး၊ ကုန်တင်ကား ၆ စီး၊ လက်နက်ကြီးကျည် ၁ ခု၊ ကျည်ကပ် ၆ ခု သိမ်းဆည်းခဲ့ကာ ဒရုန်းဖျက်တိုင် ၄ တိုင်၊ ဒရုန်းထိန်းသိမ်းရေးလက်နက် ၁ ခု ဖျက်ဆီးနိုင်ခဲ့တယ်လို့ ထိုင်းစစ်တပ်ဘက်က ထုတ်ပြန်ထားပါတယ်။
အဆိုပါတိုက်ပွဲကြောင့် ထိုင်း-ကမ္ဘောဒီး နှစ်ဘက်နိုင်ငံမှ အရပ်သားပြည်သူ စုစုပေါင်း ၇ သိန်းကျော် အိုးအိမ်စွန့်ခွာ စစ်ဘေးတိမ်းရှောင်နေရတယ်လို့ ထိုင်းသတင်းတွေမှာ ဖော်ပြပါတယ်။
Source: Thai PBS / Amarin TV / The 2nd Army Area Operations Center
