မြန်မာပြည်ဖွား ချင်းတိုင်းရင်းသားဖိုက်တာ UFC ချန်ပီယံသစ် ဂျိုရှုဗန်ရဲ့ ပထမဆုံး ချန်ပီယံကာကွယ်ပွဲက ဂျပန်ဖိုက်တာ တက်ဆူရိုနဲ့ ဖြစ်လာနိုင်တယ်လို MMA သုံးသပ်သူတွေက ခန့်မှန်းထားပါတယ်။
ဗန်ဟာ မနေ့ကထိုးသတ်ခဲ့တဲ့ပွဲမှာ ပြိုင်ဘက် ပန်တိုဂျာက ပုခုံးအဆစ်လွဲတဲ့ဒဏ်ရာ ရသွားတာကြောင့် ပထမအချိန် ၂၆ စက္ကန့်မှာ အနိုင်ရပြီး UFC ဖလိုင်းဝိတ် ကမ္ဘာ့ချန်ပီယံ ဖြစ်လာတာပါ။
ပန်တိုဂျာနဲ့ မကျေပွဲ သေချာပေါက် ထိုးသတ်သွားဦးမှာဖြစ်ပေမဲ့ ဘယ်အချိန်မှာ ဒဏ်ရာကနေ ပြန်လည်ကောင်းမွန်လာမလဲ မသိသေးတာကြောင့် ဗန်ဟာ ဒီကြားထဲမှာ တခြား ပြိုင်ဘက်တယောက်နဲ့ ချန်ပီယံကာကွယ်ပွဲ ထိုးသတ်ဖို့ ရှိနိုင်တာပါ။
ဗန်ရဲ့ နောက်ထပ်ပြိုင်ဘက်ဖြစ်လာနိုင်သူက UFC 323 ပွဲမှာပဲ ဖလိုင်းဝိတ်တန်းရဲ့ နံပါတ် ၂ ဘရန်ဒန်မိုရီနိုကို အနိုင်ယူခဲ့တဲ့ ဂျပန်ဖိုက်တာ တက်ဆူရိုတာရီယာပါ။
တက်ဆူရိုနဲ့ ဗန်တို့ဟာ ၂၀၂၄ ခုနှစ်က UFC 302 မှာ ထိုးသတ်ဖို စီစဉ်ခဲ့ပေမဲ့ ပျက်ပြယ်သွားခဲ့တာပါ။
တက်ဆူရိုက MMA ၁၉ ပွဲမှာ ၁ ပွဲသာ ရှုံးနိမ့်ထားပြီး ၁၈ ပွဲ အနိုင်ရထားပါတယ်။ ဗန်ထက် တနှစ်ကြီးပြီး အရပ် ၂ လက်မပိုမြင့်တဲ့ တက်ဆူရို ကိုယ်တိုင်ကလည်း ဗန်ရဲ့ ချန်ပီယံကာကွယ်ပွဲ အတွက် ပထမဆုံးပြိုင်ဘက်က သူဖြစ်လာမယ်လို့ မိုရီနိုကို အနိုင်ရတဲ့ပွဲအပြီးမှာ ပြောပါတယ်။
UFC ဥက္ကဋ္ဌ ဒေနာဝှိုက်ကတော့ ဂျပန်နိုင်ငံမှာ UFC ပွဲ ပြန်လည်ကျင်းပဖို့ စိတ်ကူးရှိကြောင်း တရားဝင် ပြောထားပြီး ဗန်နဲ့ တက်ဆူရိုတို့ရဲ့ ချန်ပီယံလုပွဲ ဖြစ်လာမယ်ဆိုရင် ဂျပန်နိုင်ငံမှာ ကျင်းပသွားဖို့ ရှိပါတယ်။
