စစ်ကောင်စီတပ်က နတ်ရေကန်ဗျူဟာဆီကို တပ်ကူပို့ဖို့ ကြိုးစားပေမဲ့ ပဇီနဲ့ ဂုတ်ကြီးရွာတွေကို မကျော်နိုင်ဖြစ်နေပြီး အခု နိုဝင်ဘာလထဲ ဗျူဟာပေါ်က ကမ္ဘာလုံးအဆောက်အအုံပါ ထိခိုက် ပျက်စီးခဲ့တယ်လို့ သတင်းရင်းမြစ်တွေက ပြောပါတယ်။

အာရက္ခတပ်တော် (AA) နဲ့ တော်လှန်ရေးပူးပေါင်းတပ်တွေ ပိတ်ဆို့ဖြတ်တောက်ထားတဲ့ နတ်ရေကန်ဗျူဟာဆီ စစ်တပ်က တပ်ကူပို့ဖို့ ကြိုးစားနေလို့ လမ်းဟောင်းရော၊ လမ်းသစ်ဘက်မှာပါ တိုက်ပွဲတချို့ ဆက်ရှိနေကြောင်း သတင်းရင်းမြစ်တွေက ပြောပါတယ်။

လမ်းဟောင်းဘက်မှာဆိုရင် ပဇီရွာကနေ ရှေ့ဆက်မတက်နိုင် ဖြစ်နေပြီး လမ်းသစ်ဘက်မှာတော့ ဂုတ်ကြီးရွာအနားက ခမောက်တောင်လို့ ခေါ်ကြတဲ့နေရာမှာ ထိတွေ့မှု ဆက်ရှိနေတယ်လို့ ဒေသခံတွေက ပြောပါတယ်။

ရခိုင်နဲ့ မကွေးအစပ်မှာ တိုက်ပွဲဝင်နေတဲ့ တော်လှန်ရေးတပ်တခုရဲ့ ရဲဘော်တယောက်က “ရိက္ခာနဲ့ စစ်ကူပို့တာတော့ ရှိပါတယ်။ နတ်ရေကန်ပေါ်ကို မရောက်ပါဘူး။ နတ်ရေကန်လမ်းဟောင်းဘက် ပဇီရွာအရှေ့ဘက်လောက်ပဲ ရောက်နိုင်တာမျိုးပါ။ နိုဝင်ဘာ ၁၇ ရက်မှာတော့ နတ်ရေကန်ပေါ်က ကမ္ဘာလုံးကို ထိတာ ရှိပါတယ်။ အလုံးစုံ ပြိုကျပျက်စီးတာတော့ မဟုတ်ပါဘူး။ အထဲက ရေဒါကိုလည်း ရွှေ့ထားတယ်လို့ ကြားတယ်။ ဘယ်တုန်းက ဘယ်ကို ရွှေ့တယ် ဆိုတာတော့ သီးခြား အတည်မပြုနိုင်ပါဘူး” လို့ ပြောပါတယ်။

အတည်မပြုနိုင်တဲ့ သတင်းတွေအရ လက်ရှိ နတ်ရေကန်ဗျူဟာပေါ်မှာ အရာရှိနဲ့ တခြားအဆင့် အပါအဝင် အင်အား ၃၀၀ လောက် ပိတ်မိနေတာကြောင့် စစ်တပ်က အခုလို ထိုးစစ်ဆင်ဖို့ ကြိုးစားနေတာလို့ သိရပါတယ်။

စစ်ကောင်စီတပ်ဟာ မစခ-၉၀၅ ကနေတဆင့် တပ်ကူတွေ ပေးပို့နေတာဖြစ်ပြီး လက်နက်ကြီးတွေနဲ့ နေ့တိုင်း ပစ်ခတ်နေသလို လေကြောင်းဗုံးကြဲမှုတွေကိုလည်း ပြုလုပ်နေကြောင်း ဒေသခံက ပြောပါတယ်။

ပဒါန်းဒေသခံ စစ်ရေးရင်းမြစ်တယောက်က “အပေါ်က လူကိုကယ်ရင်းတန်းလန်းနဲ့ ပြန်ပြန်ပြီး ထိုးစစ်ဆင်တာပေါ့နော်။ ထိုးစစ်ဆင်တော့လည်း လန်ကျတာပေါ့။ အလင်းဝင်တာလည်း အများကြီး၊ ထွက်ပြေးတာလည်း များတယ်။ ထွက်ပြေးတဲ့ကောင်တွေက မန်းချောင်းအတိုင်း ထွက်ပြေးကြတော့ အခုမန်းချောင်းတလျှောက်မှာ မစခ ၉၀၅ နဲ့ အမတ ၄၀၉ ကနေပြီးတော့ မန်းချောင်းတလျှောက်ကို စစ်ကြောင်းထိုးသလိုလိုပေါ့၊ စစ်ပြေးတွေ လိုက်ဖမ်းနေတာပေါ့” လို့ ပြောပါတယ်။

ဒါကြောင့် စစ်တပ်က နိုဝင်ဘာ တတိယအပတ်ထဲ ချောင်းဘေးက ကျေးရွာတွေဖြစ်တဲ့ မန်းဇုံရွာ၊ ရှောက်ဝရွာ ဝန်းကျင်အပြင် ပုသိမ်-မုံရွာလမ်း ဝန်းကျင်မှာလည်း စစ်ပြေးတွေကို လိုက်ရှာလေ့ရှိတယ်လို့ သူက ဆက်ပြောပါတယ်။

နတ်ရေကန်ဗျူဟာသာ အလုံးစုံ သိမ်းပိုက်ခံရမယ်ဆိုရင် စစ်ကောင်စီတပ်ရဲ့ ကပစ-၁၄ အပါအဝင် အမ်း-မင်းဘူးနဲ့ ပုသိမ်-မုံရွာလမ်းဆုံရာ ပဒါန်းမြို့အထိ တော်လှန်ရေးတပ်တွေ နယ်မြေ စိုးမိုးလာနိုင်ခြေ ရှိတဲ့အကြောင်း  မြို့ခံတွေက ခန့်မှန်းနေကြပါတယ်။

စိုးသူအောင်