စစ်ကိုင်းတိုင်း၊ စစ်ကိုင်းမြို့နယ်၊ တလိုင်းကျွန်းကျေးရွာရှိ စာသင်ကျောင်းကို စစ်အာဏာရှင်တပ်က မနေ့ည သန်းခေါင်ကျော် ဇူလိုင် ၂၇ ရက် မနက်အစောပိုင်း ၁၂ နာရီ ကျော်လောက်မှာ လေယာဉ်နဲ့ ဗုံးကြဲ တိုက်ခိုက်လို့ အရပ်သား ၂ ယောက် သေဆုံးသွားတယ်လို့ ရွာသားတွေထံက သိရပါတယ်။
ဒေသခံ ရွာသားတယောက်က “ည ၁၂ နာရီ ကျော်ကြီးကို လာကြဲချသွားတာ။ အဲဒီအချိန်က အိပ်ကောင်းနေတဲ့ အချိန်ကြီးလေ။ ဘယ်သူမှ ရှောင်ချိန်မရလိုက်ကြဘူးဗျ။ သေတာက အသက် ၄၅ နှစ်အရွယ် ဦးဒေါင်းလင်းနဲ့ အသက် ၄၄ နှစ်အရွယ် ဒေါ်စန်းလွင်ဆိုတဲ့ လင်မယား ၂ ယောက် သေဆုံးခဲ့ရတာ။ နောက်ပြီး နွားတကောင်လည်း ထပ်မံသေဆုံးခဲ့ရသေးတယ်။ ရွာက စာသင်ကျောင်းအဆောင်လည်း အကုန်လုံး ပျက်စီးတယ်” ပြောပါတယ်။
တလိုင်းကျွန်းရွာကို တံတားဦးလေတပ်ကနေ တက်လာတဲ့ တိုက်လေယာဉ်နဲ့ ဗုံးကြဲ တိုက်ခိုက်သွားတာလို့လည်း သိရပါတယ်။
စစ်ကိုင်းပြည်သူ့ကာကွယ်ရေးတပ်ဖွဲ့ ခေါင်းဆောင်တယောက်က “လူ ၂ ဦး သေတာတင် ဘယ်ကမလဲ။ စာသင်ကျောင်းဆောင် ၄ ဆောင်နဲ့ လူနေအိမ် ၃ လုံးလည်း ဗုံးထိမှန် ပျက်စီးခဲ့သေးတယ်”လို့ ပြောပါတယ်။
စစ်ကိုင်းတိုင်းအတွင်းက မြို့နယ်အားလုံးကို စစ်တပ်က လေကြောင်းတိုက်ခိုက်မှုတွေ နေ့စဉ်ပြုလုပ်နေပြီး အရပ်သား သေဆုံးဒဏ်ရာရတာတွေလည်း ရှိနေပါတယ်။
