အမေရိကန် အမျိုးသမီးဘောလုံးပြိုင်ပွဲလိဂ်က အသင်းတသင်းဖြစ်တဲ့ Seattle Reign အသင်းရဲ့ နည်းပြချုပ် လော်ရာဟာဗေးက လက်ရှိရာသီ NWSL ပွဲစဉ်တွေအတွက် နည်းစနစ်ပိုင်းကို ပြင်ဆင်ရာမှာ ChatGPT ကို အသုံးပြုခဲ့တယ်လို့ ဝန်ခံခဲ့ကြောင်း Sky Sport က ဖော်ပြပါတယ်။

Soccerish Podcast မှာ ပြောကြားခဲ့ရာမှာ သူ့အနေနဲ့ အားလပ်ရက်တရက်မှာ Chat GPT ကို ဘောလုံးနည်းစနစ်နဲ့ ပတ်သက်လို့ မေးမြန်းခဲ့ပြီး Chat GPT က အကြံပေးတဲ့အတိုင်း ကစားခဲ့တယ်လို့ သူကဆိုပါတယ်။

သူက NWSL ရဲ့ ပြိုင်ဘက်အသင်းတိုင်းကို ရင်ဆိုင်ဖို့ နည်းစနစ်ကို မေးမြန်းခဲ့တာဖြစ်ပြီး အဲဒီအထဲက ၂ သင်းကို နောက်ခံလူ ၅ ယောက်နဲ့ ကစားဖို့ Chat GPT က အကြံပေးခဲ့တယ်လို့ ဆိုပါတယ်။

ဘောလုံးပွဲသုံးသပ်သူ ကင်မ်မက်ကော်လေရဲ့ အဆိုအရ Seattle Reign အသင်းဟာ ပြီးခဲ့တဲ့ ဧပြီလတုန်းက အော်လန်ဒို ပရိုက်ဒ်နဲ့ပွဲမှာ နောက်တန်း ၅ ယောက်နဲ့ ပထမဆုံးအကြိမ် ကစားခဲ့ပြီး ၁-၀ နဲ့ ရှုံးနိမ့်ခဲ့တယ်လို့ သိရပါတယ်။

Seattle Reign အသင်းဟာ ၂၅ ပွဲကစားပြီးချိန်မှာ ၃၈ မှတ်နဲ့ NWSL မှာ စတုတ္ထနေရာမှာ ရပ်တည်နေပြီး နောက်ပွဲစဉ်မှာ အော်လန်ဒို ပရိုက်ဒ်နဲ့ ရင်ဆိုင်ရမှာဖြစ်ပါတယ်။