နှစ် ၂၀ ချေးငွေနဲ့ တန်ဖိုးနည်း အိမ်ရာဝယ်ခွင့်ပြုအရေးအဆိုကို ရန်ကုန်တိုင်းဒေသကြီး လွှတ်တော်မှာ အဆိုတင်သွင်းရာ ရှုံးနိမ့်သွားပါတယ်။
[caption id="attachment_72971" align="alignright" width="300"]
ဒေါက်တာ ညိုညိုသင်း[/caption]
ရန်ကုန်တိုင်းဒေသကြီး အစိုးရအဖွဲ့က တာဝန်ယူရောင်းချမယ့် တန်ဖိုးနည်းအိမ်ရာတွေဟာ အခြေခံလူတန်းစားတွေ လက်လှမ်းမမီလောက် တဲ့ ဈေးတွေ ဖြစ်နေ လို့ ပြည်တွင်းဘဏ်တွေ ဒါမှမဟုတ် နိုင်ငံတကာဘဏ်တွေနဲ့ ချိတ်ဆက်ပြီး ၀ယ်ယူခွင့်ပြုဖို့ အဆိုကို လွှတ်တော်ကိုယ်စား လှယ် ဒေါက်တာညိုညိုသင်းက တင်သွင်းခဲ့ရာမှာ ရှုံးနိမ့်သွားတာပါ။
သစ်တောနဲ့ စွမ်းအင်ဝန်ကြီး ဦးကျော်စိုးက “အနှစ်ချုပ်အနေအရ အဆိုရှင်တင်သွင်းတဲ့ အဆိုဟာ နိုင်ငံတော်မှ ဆောင်ရွက်လျက်ရှိတဲ့ အစီအမံတရပ်ဖြစ်ပြီး ရန်ကုန်တိုင်းဒေသကြီး အစိုးရအဖွဲ့က စီမံခန့်ခွဲပိုင်ခွင့် မရှိတဲ့ကိစ္စရပ်ဖြစ်တဲ့အတွက် ကျနော်တို့ ရန်ကုန်တိုင်းဒေသကြီး လွှတ်တော်က မှတ်တမ်းတင်ပေးနိုင်ပါရန် လေးစားစွာတင်ပြအပ်ပါသည်” လို့ ပြန်လည်ဖြေကြားခဲ့ပါတယ်။
ဒီအဆိုဟာ၂၀၁၄ ဧပြီလက စတင်တင်သွင်းခဲ့တဲ့အဆိုဖြစ်ပြီး အခုကျင်းပတဲ့ လွှတ်တော်အစည်းအဝေးမှသာ ဆွေးနွေးခွင့်ရတာဖြစ်ပြီး လွှတ်တော်က မှတ်တမ်းတင်ထားရှိမယ်ဆိုတဲ့အတွက် မဲခွဲဆုံးဖြတ်ရာ ကန့်ကွက်သူများတဲ့အတွက် ရှူံးနိမ့်ခဲ့တာပါ။
ဒေါက်တာညိုညိုသင်းက “လုပ်မယ်ဆိုလို့ရှိရင် International Housing Project ဆိုတဲ့ စီမံကိန်းတွေ ရှိတာပေါ့။ စီမံကိန်းတွေရှိတဲ့အခါမှာ အခု ရန်ကုန်မြို့သစ်စီမံကိန်းကို လုပ်ခဲ့ဖို့ ကြိုးစားသလိုပေါ့။ ပြည်ထောင်စုအစိုးရအဖွဲ့ကို ကျနော်တို့ကတော့ ပြည်သူလူထုကို ဒီလိုစီမံကိန်းနဲ့ ချထားပေးချင်ပါတယ်။ ဒါကြောင့်မို့ လုပ်ခွင့်ပြုပါလို့ ပြည်ထောင်စုအစိုးရကို တင်လို့ရတာပဲ။ နိုင်ငံတော်သမ္မတက လုပ်လို့ပြောထားတာပဲ။ မကန့်ကွက်ဘူး။ ဇယား ၂ ကလည်း မတားထားဘူး” လို့ ပြောပါတယ်။
ပြီးခဲ့တဲ့ နိုဝင်ဘာ တတိယပတ်က နေပြည်တော်မှာ ပြုလုပ်တဲ့ အမျိုးသားအဆင့် မြို့ပြနဲ့ အိမ်ရာဖွံ့ဖြိုးရေး မူဝါဒနဲ့ စီမံကိန်းဆိုင်ရာ အလုပ်ရုံဆွေးနွေးပွဲမှာ ဝန်ထမ်းတွေအတွက် ဝန်ထမ်းအိမ်ရာစီမံကိန်းအပြင် ကျန်းမာရေးစောင့်ရှောက်မှုနဲ့ သားသမီးတွေအတွက် အဆင့်မြင့်ပညာသင် ထောက်ပံ့ကြေးပေးနိုင်အောင် အာမခံစနစ်၊ အရစ်ကျစနစ်၊ ချေးငွေစနစ်တွေနဲ့ အကောင်အထည်ဖော်ဖို့ စီစဉ်နေတယ်လို့ နိုင်ငံတော်သမ္မတက ပြောဆိုဖူးပါတယ်။
ဒါ့အပြင် ဆင်းရဲနွမ်းပါသူတွေ၊ မသန်စွမ်းသူတွေ၊ ပင်စင်စားတွေ၊ တိုက်ပွဲကျစစ်သည်တွေ၊ မိသားစုတွေ၊ ဝင်ငွေနည်းတဲ့ သာမန်ပြည်သူတွေအတွက် သက်သာတဲ့ နှုန်းထားနဲ့ ဝယ်ယူနိုင်ဖို့ အရစ်ကျစနစ်၊ ချေးငွေစနစ်အပြင် ပုံမှန်ဝင်ငွေမရှိလို့ ဝယ်ယူဖို့ အခက်အခဲရှိသူတွေ အတွက်လည်း ပြည်သူ့ အငှားအိမ်ရာတွေ အကောင်အထည်ဖော်ကြဖို့ စဉ်းစားဆွေးနွေးစီမံပေးရမယ်လို့ ပြောကြားခဲ့ဖူးပါတယ်။
