အမေရိကန်နိုင်ငံ တင်နက်ဆီပြည်နယ်မှာ ပြီးခဲ့တဲ့အပတ်က သေဒဏ်ဆေး နှစ်ကြိမ် အထိုးခံရပေမဲ့ မသေဆုံးခဲ့တဲ့ အသက် ၅၀ အရွယ် ခရစ္စတာ ပိုက်ခ်ဟာ ဆေးရုံခုတင်ပေါ်မှာ လက်ထိပ်တန်းလန်းနဲ့ နိုးလာပြီးတော့ “ဒေါသထွက်၊ စိတ်ရှုပ်ထွေးနေတယ်” လို့ သူ့ရှေ့နေက အောက်တိုဘာ ၇ ရက်မှာ ပြောပါတယ်။
သူနိုးလာချိန်မှာ ပထမဆုံးပြောခဲ့တဲ့ စကားတွေက “ငါ ဘယ်ရောက်နေတာလဲ” နဲ့ “ရှင်ဘယ်သူလဲ” ဆိုတဲ့ မေးခွန်းတွေဖြစ်ကြောင်း သူ့ရှေ့နေ ရန်းဒီ စပိုင်ဗီးက ပြောပါတယ်။
ပိုက်ခ်ဟာ ၁၉၉၅ ခုနှစ်က သူ့ချစ်သူ ကောင်လေးနဲ့အတူ အသက် ၁၉ နှစ်အရွယ် ကိုလင်း စလမ်မာ ဆိုသူ မိန်းကလေးကို ညှဉ်းပန်းနှိပ်စက် သတ်ဖြတ်ခဲ့မှုအတွက် သေဒဏ်ချမှတ်ခံခဲ့ရတာ ဖြစ်ပါတယ်။
စက်တင်ဘာ ၃၀ ရက်က နက်ရှ်ဗီးလ်မြို့ အကျဉ်းထောင်မှာ သူ့ကို သေဒဏ်စီရင်ဖို့ ပန်တိုဘာဘီတယ်ဆေး နှစ်ကြိမ်ထိုးခဲ့ပေမဲ့ မသေဆုံးတာကြောင့် ဆေးရုံကို ပို့ခဲ့ရပါတယ်။
ပိုက်ခ်ဟာ ရက်အတော်ကြာ သတိလစ်နေခဲ့ပြီး ဦးနှောက်လုပ်ဆောင်မှု လုံးဝရပ်တန့်သွားပြီလို့ ရှေ့နေတွေက ယူဆခဲ့ကြပေမဲ့ အောက်တိုဘာ ၆ ရက်မှာတော့ မမျှော်လင့်ဘဲ သတိပြန်ရလာပြီး စကားစပြောနိုင်ခဲ့ပါတယ်။
ဒါပေမဲ့ သူ့လက်နှစ်ဖက် အလွန်အမင်း ရောင်ရမ်းနေပြီး သွေးခဲတာ၊ အဆုတ်ရောင်တာနဲ့ အစာမျိုချလို့ မရတာတွေကြောင့် ဆေးကုသမှု ဆက်လက်ခံယူနေရပါတယ်။
ပိုက်ခ်ဟာ အမေရိကန်မှာ သေဒဏ်စီရင်ဖို့ ဆေးထိုးတဲ့လုပ်ငန်းစဉ် ပြီးဆုံးသွားပေမဲ့ အသက်ရှင်ကျန်ရစ်ခဲ့တဲ့ ပထမဆုံးပုဂ္ဂိုလ် ဖြစ်တယ်လို့ ရှေ့နေတွေက ဆိုပါတယ်။
အောက်တိုဘာ ၇ ရက်မှာတော့ တရားရုံးက သေဒဏ်စီရင်မှု မအောင်မြင်ခဲ့တဲ့ ဖြစ်စဉ်နဲ့ ပတ်သက်ပြီး ဆေးထိုးအပ်တွေ၊ ဆေးပစ္စည်းတွေနဲ့ သက်သေအထောက်အထား အားလုံးကို ထိန်းသိမ်းထားဖို့ တင်နက်ဆီပြည်နယ် အာဏာပိုင်တွေကို အမိန့်ချမှတ်ခဲ့ပါတယ်။
တင်နက်ဆီပြည်နယ် အုပ်ချုပ်ရေးမှူး ဘီလ်လီကလည်း ဒီနှစ်ကုန်အထိ သေဒဏ်စီရင်မှုအားလုံးကို ရပ်ဆိုင်းထားပြီး ဘာတွေမှားယွင်းခဲ့သလဲဆိုတာ စုံစမ်းစစ်ဆေးဖို့ ညွှန်ကြားထားပါတယ်။
