မန္တလေးတိုင်း၊ မိုးကုတ်မြို့နယ်အရှေ့ပိုင်းက အထက်ညောင်ကုန်းရပ်ကွက်အနီးကို အောက်တိုဘာ ၁၆ ရက် ဒီနေ့မနက်ပိုင်းမှာ စစ်ကောင်စီတပ်ကလေကြောင်းကနေ ဗုံးကြဲခဲ့တာကြောင့် အရပ်သား ၃ ယောက် ဒဏ်ရာရသွားတယ်လို့ မြို့ခံတွေက ပြောပါတယ်။
ဂျက်ဖိုက်တာနဲ့ လေကြောင်းကနေ ဗုံးကြဲခဲ့တာကြောင့် နေအိမ် ၁၀ လုံးထက်မနည်း ပျက်စီးကာ ဒေသခံအမျိုးသား ၃ ယောက် ဒဏ်ရာရခဲ့တယ်လို့ ဆိုပါတယ်။
စစ်ကောင်စီတပ်ဟာ တိုက်ပွဲဖြစ်ပွားနေတာမရှိတဲ့ မိုးကုတ်မြို့ကို နေ့စဉ်လိုလို ဗုံးကြဲနေတယ်လို့ ဒေသခံတယောက်က DVB ကို ပြောပါတယ်။
"မနက်က နားစည်တောင်ကွဲမတတ်ပဲ အသံကတော်တော်ကျယ်တာပါ။ စျေးသွားဈေးလာ လူတွေရော၊ မနက်စာစားနေတဲ့ သူတွေရော အကုန်ထွက်ပြေးကြတာ။ ဒဏ်ရာရတဲ့ ၃ ယောက်ကတော့ ကံကောင်းတယ်ပြောရမယ်။ ကြီးကြီးမားမား ဒဏ်ရာမရလို့။"
ထိခိုက်ဒဏ်ရရရတဲ့ ဒေသခံအမျိုးသား ၃ ယောက်ဟာ အသက် ၃၀ ကျော်အရွယ်တွေဖြစ်ပြီး သူတို့ကို ဆေးကုသမှု ပေးနေတယ်လို့ ဆိုပါတယ်။
ပြီးခဲ့တဲ့ အောက်တ်ုဘာ ၁၄ ရက်ကလည်း နမ့်ဆန်မြို့နယ်၊ အုမ်းစွမ်ရွာကို ဂျက်ဖိုက်တာနဲ့ စစ်ကောင်စီ လေကြောင်းပစ်ခတ်ခဲ့တာကြောင့် အမျိုးသမီးတယောက် သေဆုံးကာ ၅ ယောက် ဒဏ်ရာရခဲ့ပါတယ်။
မိုးကုတ်မြို့ကို တအာင်းအမျိုးသားလွတ်မြောက်ရေးတပ်မတော်(TNLA) သိမ်းပိုက်ထိန်းချုပ်ထားပြီးနောက်ပိုင်း စစ်ကောင်စီတပ်က လေကြောင်းကနေ ဗုံးကြဲနေတာကြောင့် ဒေသခံ အရပ်သား ၁၀၀ နီးပါး သေဆုံးကာ ၈၀ ကျော် ဒဏ်ရာရခဲ့တယ်လို့ မြေပြင်မှာ ကူညီနေသူတွေက ပြောပါတယ်။
