Gucci၊ Chloe နဲ့ Loewe ကုန်အမှတ်တံဆိပ်တွေဟာ စျေးကွက်ပြိုင်ဆိုင်မှုကို ဆန့်ကျင်ပြီး လက်လီဆိုင်တွေ ပြန်ရောင်းမယ့် စျေးနှုန်းတွေကို သတ်မှတ်ပြင်ဆင်ပေးမှုအတွက် ဥရောပသမဂ္ဂ (EU) ရဲ့ အယုံအကြည်ပျက်မှု စောင့်ကြည့်ရေးအဖွဲ့က စုစုပေါင်း ယူရို ၁၅၇ သန်း (ဒေါ်လာ ၁၈၂ သန်း) ဒဏ်ရိုက်တာကို ခံခဲ့ရပါတယ်။
Gucci ပိုင်ရှင် ခဲရင်းကုမ္ပဏီက ဒဏ်ငွေ ယူရို ၁၁၉ ဒသမ ၇ သန်း၊ Chloe က ၁၉ ဒသမ ၇ သန်းနဲ့ Loewe က ၁၈ သန်း အသီးသီး ဒဏ်ရိုက်ခံရပြီး ဇိမ်ခံပစ္စည်းအုပ်စုတွေအတွက် စည်းမျဥ်းစည်းကမ်း တွေ တိုးလာနေတာကို မီးမောင်းထိုးပြခဲ့ပါတယ်။
အကြံပြုထားတဲ့ လက်လီဈေးနှုန်းတွေ၊ အမြင့်ဆုံးလျှော့ဈေးတွေနဲ့ အရောင်းအတွက် သတ်မှတ်ထားတဲ့ ကာလတွေလို ကန့်သတ်ချက်တွေကို ချမှတ်ခြင်းအားဖြင့် ဖက်ရှင်ကုမ္ပဏီ ၃ ခုဟာ သူတို့ရဲ့ လက်လီရောင်းချသူတွေရဲ့ စီးပွားဖြစ်ဗျူဟာတွေကို ဝင်ရောက် စွက်ဖက်ခဲ့တယ်လို့ ဥရောပကော်မရှင်က အောက်တိုဘာ ၁၄ ရက်မှာ သတင်းထုတ်ပြန်ခဲ့ပါတယ်။
Gucci နဲ့ ပူးပေါင်းဆောင်ရွက်မှု လုပ်ထုံးလုပ်နည်းတခုပြီးတဲ့နောက် EU ရဲ့ စုံစမ်းစစ်ဆေးမှုကို ဖြေရှင်းပြီးပြီလို့ ခဲရင်းက ပြောခဲ့ပြီး ၂၀၂၅ ပထမနှစ်ဝက်ရလဒ်တွေမှာ ဘဏ္ဍာရေးဆိုင်ရာ ထိခိုက်နစ်နာမှုတွေကို စီမံဆောင်ရွက်ပေးခဲ့တယ်လို့ ပြောပါတယ်။
LVMH ရဲ့ Loewe ကတော့ EUနဲ့ သဘောတူညီချက်ကို အတည်ပြုခဲ့ပြီး ဥပဒေတွေကို တင်းတင်းကျပ်ကျပ် လိုက်နာဆောင်ရွက်သွားမယ်လို့ ကတိပြုခဲ့ပါတယ်။
LVMH ဟာ တတိယသုံးလပတ် ရောင်းအားကို နောက်ပိုင်းမှာ အစီရင်ခံဖို့ ရှိနေပါတယ်။ Chloe ကို ပိုင်တဲ့ Richemont က ဒီကိစ္စကို အလွန်အမင်း အလေးအနက်ထားတယ်လို့ ပြောခဲ့ပြီး ၂၀၂၃ ခုနှစ်မှာစတဲ့ စုံစမ်းစစ်ဆေးမှုတွေက စပြီး ယှဉ်ပြိုင်မှုဥပဒေကို လိုက်နာစေရေး အစီအမံတွေကို အရှိန်မြှင့်လုပ်ဆောင်ခဲ့ပါတယ်။
ဒီအလေ့အကျင့်တွေဟာ လက်လီရောင်းချ သူတွေအတွက် ယှဉ်ပြိုင်မှုကနေ အမှတ်တံဆိပ်တွေရဲ့ ကိုယ်ပိုင်အရောင်း လမ်းကြောင်းတွေကို ကာကွယ်ရင်း ပြိုင်ဆိုင်မှု လျော့ကျစေပြီး စျေးနှုန်းလွတ်လပ်မှုကို ဆုံးရှုံးစေတယ်လို့ ကော်မရှင်က ပြောခဲ့ပါတယ်။
Armani၊ Dior၊ Loro Piana နဲ့ Tod's အပါအဝင် ကုန်အမှတ်တံဆိပ်တွေဟာ ထောက်ပံ့ရေး ကွင်းဆက်တွေမှာ အလုပ်သမား တွေကို အလွဲသုံးစားလုပ်နေတယ်လို့ မကြာသေးမီက စွပ်စွဲခံရတာနဲ့ ပတ်သက်ပြီး အီတလီ အာဏာပိုင်တွေဆီက ဖိအားပေးတာကို ခံနေရပါတယ်။
တချိန်တည်းမှာ၊ တချို့ကုမ္ပဏီတွေမှာ အကာအကွယ်ပေးထားတဲ့ သုံးစွဲသူဒေတာတွေကို မကြာသေးမီက ချိုးဖောက်မှုတွေကြောင့် ဒီကဏ္ဍဟာ စည်းမျဉ်းစည်းကမ်း ပြဿနာတွေကို ပိုတိုးပြီး ရင်ဆိုင်နေရပါတယ်။
Source: Reuters
