အာဏာသိမ်းစစ်တပ်က ကျင်းပမယ့် ရွေးကောက်ပွဲမှာ ပါဝင်ရင် အဆိပ်ပင်ရေလောင်းတဲ့တရားခံ ဖြစ်နိုင်တယ်လို့ ပြောဆိုခဲ့တဲ့ ကရင်အမျိုးသားအစည်းအရုံး (KNU) ဥက္ကဋ္ဌ ပဒိုစောကွယ်ထူးဝင်း အပါအဝင် ခေါင်းဆောင်များကို စစ်ကောင်စီက ရွေးကောက်ပွဲဥပဒေနဲ့ အမှုဖွင့်လိုက်ပါတယ်။
ရွေးကောက်ပွဲကိုလက်မခံဘဲ ဆန့်ကျင်ပြီး ပျက်လိုပျက်စီး လုပ်တယ်ဆိုတဲ့စွပ်စွဲချက်နဲ့ KNU တာဝန်ရှိသူတွေကို လှိုင်းဘွဲမြို့မရဲစခန်းမှာ (ပ)အမှတ် ၁၃ /၂၀၂၅၊ ပုဒ်မ ၂၃ (က)၊ (ပ)၁၄/ ၂၀၂၅၊ ပုဒ်မ ၂၃ (က)၊ ပုဒ်မ ၂၄ (ခ)နဲ့ အမှုဖွင့်ထားတာလို့ စတယ်။
သြဂုတ် ၂၆ ရက်မှာ KNU က အာဏာသိမ်းစစ်တပ် ပြုလုပ်မယ့် ရွေးကောက်ပွဲဟာ ဥပဒေအရ တရားမဝင်သလို ပြည်သူအားလုံး ပါဝင်နိုင်တဲ့ အခြေအနေမရှိဘဲ လိုသလို အဖြေထုတ်နိုင်တဲ့ ရွေးကောက်ပွဲဖြစ်ကြောင်း အချက် ၇ ချက်နဲ့ ကန့်ကွက်ခဲ့ပြီးနောက် အမှုဖွင့်ခဲ့တာပါ။
အမှုဖွင့်ခံရသူတွေကတော့ KNU ဥက္ကဋ္ဌ ပဒိုစောကွယ်ထူးဝင်း၊ KNU ခေါင်းဆောင်ပိုင်းတွေဖြစ်တဲ့ ပဒိုစောဆဲဂေ၊ ပဒိုတာဒိုမူး၊ ပဒိုစောသောသီဘွဲ၊ ပဒိုစောလှထွန်း၊ စောဂျော်နီ၊ စောတာမလာသော၊ ပဒိုစောလော်အယ်မူး၊ ပဒိုစောအယ်ကလူစေး၊ ပဒိုနော်ဒါးဒါး၊ ပဒိုစောတောနီးနဲ့ စောဆာပုလဲဒီဝမ်း စသူတွေ ပါဝင် ပါတယ်။
စစ်တပ်ကကျင်းပမယ့် ရွေးကောက်ပွဲကို KNU က ကန့်ကွက်ခဲ့ပြီးနောက် သြဂုတ် ၂၈ ရက်မှာ စစ်ကောင်စီက ကရင်အမျိုးသားအစည်းအရုံး (KNU) ကို မတရားအသင်းနဲ့ အကြမ်းဖက်အဖွဲ့ အစည်းအဖြစ်လည်း ကြေညာခဲ့ပါတယ်။
အလားတူ ရွေးကောက်ပွဲကို ဆန့်ကျင်ကန့်ကွက်ခဲ့တဲ့ ချင်းပြည်နယ် (Chinland) အစိုးရအဖွဲ့မှ ဦးပါထန်း၊ ဒေါက်တာရွှေခါရ်း၊ ဦးထောင်ဇလျန်း၊ ဦးရိုဘင်အပါအဝင် ၁၇ ယောက်ကိုလည်း ရွေးကာဥပဒေနဲ့ ဟားခါးမြို့မရဲစခန်းမှာ စက်တင်ဘာ ၄ ရက်က အမှုဖွင့်ထားပါတယ်။
ဒါ့အပြင် ရန်ကုန်၊ လွိုင်ကော်နဲ့ တောင်ကြီးက အရပ်သား ၁၀ ယောက်လောက်ကိုလည်း ရွေးကောက်ပွဲ ဥပဒေနဲ့ အမှုဖွင့် အရေးယူထားပါတယ်။
ရွေးကာဥပဒေလို့ခေါ်တဲ့ “ပါတီစုံဒီမိုကရေစီ အထွေထွေရွေးကောက်ပွဲများကို နှောင့်ယှက်ဟန့်တား ဖျက်ဆီးခြင်းမှ ကာကွယ်ပေးရေးဥပဒေ” မှာ အခန်း ၈ ခန်းနဲ့ ပုဒ်မ ၃၂ ခုရှိပြီး ထောင်ဒဏ် ၃ နှစ်ကနေ သေဒဏ်အထိ ချမှတ်နိုင်တဲ့ ပြစ်ဒဏ်တွေ ပါပါတယ်။
