အင်အားပြင်း မြေငလျင်ဒဏ်ခံခဲ့ရတဲ့ မန္တလေးမြို့ပေါ်မှာ ရွေ့လျားမီးပွိုင့်တွေ စတင်အသုံးပြုနေပြီလို့ မြို့ခံတွေထံက သိရပါတယ်။
ငလျင်ကြောင့် မြို့တွင်းကမီးပွိုင့်တွေ ပျက်စီးမှုရှိခဲ့တာနဲ့ လျှပ်စစ်မီး ပြတ်တောက်ချိန်မှာ ယာယီအသုံးပြုနိုင်ဖို့ မန္တလေး မြို့တော်စည်ပင်သာယာရေးကော်မတီက ဒီဇိုင်းရေးဆွဲ စမ်းသပ်ခဲ့တာလို့လည်း သိရပါတယ်။
ဒီရွေ့လျားမီးပွိုင့်တွေကို မန္တလေးမြို့ရဲ့ အဓိကလမ်းမကြီးတွေပေါ်က ယာဉ်ကြောပိတ်ဆို့တတ်တဲ့ မီးပွိုင့်တွေမှာ ကနဦး စတင်အသုံးပြုမှာဖြစ်တယ်လို့ မန္တလေး မြို့တော်စည်ပင်သာယာရေး ကော်မတီက အသိပေးထားပါတယ်။
ဒါပေမဲ့ မန္တလေးမြို့ခံတွေအနေနဲ့ ယာဉ်ကြောပိတ်ဆို့မှုကို နားလည်မှုနဲ့သာ ဖြေရှင်းကြတာဖြစ်လို့ ဒီလို ရွေ့လျားမီးပွိုင့် အသုံးပြုမှုဟာလည်း ထူးခြားတဲ့ ဖြေရှင်းမှုတခု ဖြစ်လာမှာမဟုတ်ဘူးလို့ မန္တလေးမြို့ခံတယောက်က ပြောပါတယ်။
“မန္တလေးက မုန့်ဟင်းခါး အဆစ်တောင်းသလို မီးပွိုင့်လည်း အဆစ်တောင်းတယ်။ နီနေလည်း နောက်က ၅ စီးလောက်က လိုက်ဖြတ်တာပဲ။ သူ့ဟာနဲ့သူ ပြီးမှ ပြန်တည့်သွားတာ။ အဲဒါပဲ၊ ခုနက ရွေ့လျားမီးပွိုင့်လုပ်လည်း ၇၈၊ သိပ္ပံပွိုင့်လောက်ကလွဲလို့ ကျန်တဲ့ဟာတွေက ဘာမှထူးခြားမှု မရှိဘူး။ အဲဒီနားကတော့ ထူးခြားနိုင်တယ်။”
ရွေ့လျားမီးပွိုင့်တွေကို အနိမ့်၊ အမြင့်နဲ့ အလယ်အလတ် ဆိုပြီး အမျိုးအစား ၃ မျိုး စီစဉ်ထားကာ အဓိက ယာဉ်ကြောပိတ်ဆို့မှုဖြစ်တဲ့ သိပ္ပံလမ်းနဲ့ ၆၆ လမ်း လမ်းဆုံမှာ စတင်အသုံးပြုမယ်လို့ မန္တလေး မြို့တော်စည်ပင်သာယာရေးကော်မတီ တာဝန်ရှိသူတယောက်က ပြီးခဲ့တဲ့ ဇူလိုင်လတုန်းက ပြောထားပါတယ်။
မန္တလေးမြို့မှာ ယာဉ်ကြောပိတ်ဆို့မှု အဖြစ်ဆုံးနေရာဟာ ကုန်းလမ်းပို့ဆောင်ရေးညွှန်ကြားမှု ဦးစီးဌာနရုံးရှိတဲ့ သိပ္ပံလမ်းနဲ့ ၇၈ လမ်း မီးပွိုင့်မှာ အကြီးမားဆုံးဖြစ်ပြီး ကျန်နေရာတွေမှာ နားလည်မှုနဲ့ပဲ ဖြေရှင်းကြတယ်လို့ မြို့ခံတွေက ဆိုပါတယ်။
မန္တလေးမြို့ခံတယောက်က “ကညနရုံးက ညာဘက်မှာ ကားတန်းစီတဲ့ လမ်းကြောတကြောက ယူထားတော့ မီးပျက်ပြီဆိုတာနဲ့ အရှေ့ဘက်ကနေ ၇၈ ဘက် ထွက်တဲ့ဟာတွေက အကုန် အဲဒီမှာသွားဆို့တာ။ ပြီးတော့ ၇၈ ပွိုင့်ကြီးကလည်း မီးပျက်ပြီဆိုရင် အကုန်လုံး မန္တလေးမြို့မှာ အဲဒီကောင်က ယာဉ်ကြောပိတ်တာ အဲဒီနေရာပဲ။ ကျန်တဲ့နေရာက မဖြစ်ဘူး။ ကျန်တဲ့နေရာက နားလည်မှုနဲ့သွားကြတာ” လို့ ပြောပါတယ်။
မန္တလေးမြို့တော်စည်ပင်သာယာရေးကော်မတီကတော့ အခုလို လုပ်ဆောင်တာဟာ မြို့တွင်းက ယာဉ်ကြောကျပ်တည်းတာတွေကို ယာယီဖြေရှင်းဖို့နဲ့ ပြည်သူတွေ ယာဉ်အန္တရာယ်ကင်းအောင် လုပ်ဆောင်တာ ဖြစ်တယ်လို့ ဆိုပါတယ်။
ပြီးခဲ့တဲ့ မတ်လ ၂၈ ရက်က လှုပ်ခတ်ခဲ့တဲ့ အင်အားပြင်း စစ်ကိုင်းငလျင်ကြောင့် ငလျင်ဗဟိုချက်နဲ့ အနီးဆုံးဖြစ်တဲ့ မန္တလေးမြို့ပေါ်မှာ တိုက်တာအဆောက်အအုံတွေ၊ သာသနိကအအောက်အအုံနဲ့ စေတီပုထိုးတွေအပြင် မီးပွိုင့်အများအပြားလည်း ထိခိုက်ပျက်စီးခဲ့တာ ဖြစ်ပါတယ်။
