မွန်ပြည်နယ်၊ ရေးမြို့နယ်၊ ကျောင်းရွာကျေးရွာအခြေစိုက် စစ်ကောင်စီတပ်ရဲ့ ခမရ ၅၉၁ ကနေ ဈေးထွက်ဝယ်တဲ့ တပ်ရေးဗိုလ်ကြီးနဲ့ မိသားစုဝင်တွေ ပစ်ခတ်ခံရတယ်လို့ စစ်တပ်နဲ့ နီးစပ်သူတွေဆီကနေ သိရပါတယ်။
မနေ့ စက်တင်ဘာ ၁၇ ရက် မနက် ၈ နာရီကျော်မှာ ခမရ ၅၉၁ တပ်ဝင်းထဲကနေ အသက် ၄၀ အရွယ်ရှိ တပ်ရေးဗိုလ်ကြီး၊ ဇနီးနဲ့ ကလေးငယ် အပါအဝင် မိသားစုဝင် ၃ ယောက်ဟာ ကျေးရွာထဲမှာ ဈေးဝယ်ဖို့ ကားနဲ့ထွက်လာချိန် ကျေးရွာအနီးအရောက်မှာ လက်နက်ကိုင်ဆောင်ထားသူတွေက ပစ်ခတ်ခဲ့တာလို့ သိရပါတယ်။
စစ်တပ်နဲ့နီးစပ်သူတယောက်က “ပစ်ခတ်ခံရတာကြောင့် တပ်ရေးဗိုလ်ကြီးနဲ့ ဇနီးဖြစ်သူတို့ ကျည်ထိဒဏ်ရာတွေ ရသွားတယ်။ သူတို့ကလေးကတော့ ထိခိုက်တာမရှိဘူး။ လင်မယားနှစ်ယောက်လုံး ဆေးကုသမှု ခံယူနေရတယ်” လို့ ပြောပါတယ်။
အဲဒီ တပ်ရေးဗိုလ်ကြီးမိသားစု ပစ်ခတ်ခံရမှုဖြစ်ပွားတဲ့ နေရာဟာ ခမရ ၅၉၁ တပ်ရင်းနဲ့ နီးနေတာကြောင့် ပစ်ခတ်သွားသူတွေကို ဖမ်းဆီးရမိရေး ဗိုလ်ကြီးအမိန့်နဲ့ ခမရ ၅၉၁ တပ်ကနေ ကျေးရွာအနီး လမ်းပေါ်နဲ့ ကျေးရွာထဲ ဝင်ရောက်ရှာဖွေတာတွေ လုပ်နေတယ်လို့ သိရပါတယ်။
ပစ်ခတ်ခံရတဲ့ ဗိုလ်ကြီးမိသားစုနဲ့ နီးစပ်သူတယောက်က “စစ်ဆေးရှာဖွေတာတွေ လုပ်နေတယ်။ ဖမ်းမိတာတော့ မကြားမိသေးပါဘူး။ ဘယ်လက်နက်ကိုင်အဖွဲ့က ပစ်ခတ်တယ်ဆိုတာ လောလောဆယ် မသိရသေးဘူး။ ဗိုလ်ကြီးနဲ့ မိသားစုက တပ်ထဲမှာပဲ ဆေးကုသနေတယ်လို့ သိရတယ်” လို့ ပြောပါတယ်။
ဩဂုတ် ၂၃ ရက်ကလည်း စစ်ကောင်စီရဲ့ ရေးမြို့နယ်က ခမရ ၅၉၁ တပ်ကို တော်လှန်ရေးမဟာမိတ် ပူးပေါင်းတပ်တွေက တပ်အပြင်ဘက်ကနေ လက်နက်ကြီးနဲ့ ပစ်ခတ်တိုက်ခိုက်ခဲ့သေးတယ်လို့ သိရပါတယ်။
သြဂုတ် ၂၈ ရက်ကလည်း ရေးမြို့နယ် ခမရ ၅၉၁ တပ်ရင်းက ကင်းလှည့်ဖို့ ထွက်လာတဲ့ စစ်သားတွေကို ရေးမြို့နယ်အတွင်း အခြေပြုလှုပ်ရှားနေတဲ့ ရေးဘီလူးအဖွဲ့က ကြားဖြတ်တိုက်ခိုက်ခဲ့မှုကြောင့် စစ်သား ၅ ယောက် သေဆုံးခဲ့တယ်လို့ အဲဒီအဖွဲ့က သတင်းထုတ်ပြန်ချက်တွေအရ သိရပါတယ်။
စက်တင်ဘာ ၁၄ ရက်ကလည်း မွန်ပြည်နယ်၊ ရေးမြို့နယ်ထဲက ကျေးရွာအုပ်ချုပ်ရေးမှူးတယောက်နဲ့ ရာအိမ်မှူးတယောက်တို့ အမည်မသိ လက်နက်ကိုင်ထားသူတွေရဲ့ ပစ်သတ်ခံခဲ့ရသေးတယ်လို့ သိရပါတယ်။
