ပိုင်ရှင်အသစ်ပြောင်းသွားပြီဖြစ်တဲ့ Ooredoo Myanmar (အူရီဒူးမြန်မာ) ကုမ္ပဏီအနေနဲ့ U9 အမည်ကို ပြောင်းလဲသွားမယ်လို့ အူရီဒူးမြန်မာက စက်တင်ဘာ ၁၁ ရက် ဒီနေ့ ထုတ်ပြန်ပါတယ်။
စက်တင်ဘာ ၂၀ ရက်ကစပြီး U9 အမည်သစ် တရားဝင် ကူးပြောင်းမှာဖြစ်ပြီး လက်ရှိဖုန်းနံပါတ်တွေနဲ့ ဆင်းမ်ကတ်တွေ တစုံတရာ ပြောင်းလဲမှုရှိမှာ မဟုတ်ကြောင်း၊ အသုံးပြုနေတဲ့ အစီအစဉ်တွေ၊ လက်ကျန်ငွေတွေနဲ့ ဝယ်ယူထားတဲ့ ဝန်ဆောင်မှုအစီအစဉ်တွေ အရင်အတိုင်း ဆက်လက်အလုပ်လုပ်နေမှာ ဖြစ်ကြောင်း၊ သုံးစွဲသူတွေအနေနဲ့ လက်ရှိဝန်ဆောင်မှုတွေ ဆက်လက်ရရှိဖို့အတွက် ဘယ်လိုဆောင်ရွက်မှုမျိုးမှ လုပ်ဖို့မလိုကြောင်း၊ သုံးစွဲသူဝန်ဆောင်မှုစင်တာ ဖုန်းနံပါတ်တွေနဲ့ ဆိုင်လိပ်စာတွေ အားလုံးလည်း အရင်အတိုင်း ဆက်လက်ရှိနေမယ်လို့ ဆိုပါတယ်။
အူရီဒူးမြန်မာ တာဝန်ရှိသူတယောက်က “ဝန်ဆောင်မှုတွေကတော့ ပုံမှန်အတိုင်းပါပဲ။ နာမည်လေးပဲ ပြောင်းလိုက်တာပေါ့။ ပိုင်ရှင်ပြောင်းသွားတယ်။ ဝန်ထမ်းတွေကလည်း ပုံမှန်ရာထူးအတိုင်းပါပဲ” လို့ ပြောပါတယ်။
အဆိုပါ U9 အက်ပလီကေးရှင်းအသစ်ကို Apple App Store နဲ့ Google Play တို့မှာ ရယူနိုင်ပြီး သုံးစွဲသူတွေအနေနဲ့ အူရီဒူးမြန်မာ App အသုံးပြုစဉ်က အကောင့်အချက်အလက်တွေအတိုင်း ပြန်လည်အသုံးပြုကာ ဝင်ရောက်နိုင်တယ်လို့ သိရပါတယ်။
အူရီဒူးမြန်မာကို ကာတာနိုင်ငံအခြေစိုက် မိခင်ကုမ္ပဏီ အူရီဒူးက Nine Communications ကုမ္ပဏီထံ ၂၀၂၂ ခုနှစ် စက်တင်ဘာလအတွင်း အမေရိကန်ဒေါ်လာ ၅၇၆ သန်းနဲ့ ရောင်းချခဲ့တာ ဖြစ်ပါတယ်။
