ပြည်တွင်းထုတ် စီးကရက်ဘူးတွေမှာ နာမည်ကုန်အမှတ်တံဆိပ် သုံးခွင့်မပေးတာ့ဘဲ တပြေးညီ ပုံစံတမျိုးတည်း ထုတ်သွားရဖို့ရှိတယ်လို့ အဲဒီလုပ်ငန်းနဲ့ နီးစပ်သူတွေဆီက သိရပါတယ်။
စီးကရက်ဘူးခွံပေါ်မှာ ကျန်းမာရေးသတိပေးတဲ့စာသား၊ ဆေးလိပ်သောက်လို့ဖြစ်ရတဲ့ ပညာပေးပုံနဲ့ စီးကရက်အမည် ပုံမှန်စာသားကိုသာ သုံးခွင့်ပေးတော့မယ်လို့ ဆိုပါတယ်။
အဲဒီလို ဘူးခွံပုံစံကို စစ်တပ်ကထုတ်တဲ့ Red Ruby စီးကရက်က စတင်ပြောင်းလဲထားပြီး ကျန်စီးကရက်ဘူးတွေလည်း ပြောင်းသွားဖို့ရှိနေတာလို့ အရောင်းကိုယ်စားလှယ် ရယူထားသူ တယောက်က ပြောပါတယ်။
“အကုန်ပြောင်းရမှာလို့ ပြောတယ်။ Red Ruby ကတော့ ပုံစံအသစ် စပြောင်းနေပြီ။ Mevius လည်း ရှေ့လလောက်မှာ ပြောင်းမှာလို့ ပစ္စည်းလာချတဲ့သူက ပြောသွားတယ်။”
ဘာကြောင့် ကုန်အမှတ်တံဆိပ် အသုံးပြုခွင့် မပေးတော့တာကို မသိရသလို တရားဝင် ထုတ်ပြန်ထားတာ မတွေ့ရဘူးလို့ စီးကရက် လက်လီလက်ကားရောင်းနေသူတွေက ဆိုပါတယ်။
သင်္ဃန်းကျွန်းမြို့နယ်မှာ ကုန်စုံဆိုင်ဖွင့်ထားသူတယောက်က “စစ်တပ်ကထုတ်တဲ့ Red Ruby က ဈေးကွက်ကျလာလို့ တခြားထုတ်ကုန်တွေနဲ့ ထင်ယောင်ထင်မှားဖြစ်အောင် လုပ်တာလားလို့တော့ တွေးမိတယ်” လို့ ပြောပါတယ်။
Red Ruby စီးကရက်မှာ ၂၀၂၁ အာဏာမသိမ်းခင်က ပြည်တွင်းဈေးကွက်ဝေစု အများဆုံး ရရှိထားခဲ့ပြီး စစ်တပ်ပိုင် မြန်မာ့စီးပွားရေး ဦးပိုင်လီမိတက်နဲ့ စင်ကာပူအခြေစိုက် Rothmans Myanmar Holdings Singapore (RMHS) တို့ ဖက်စပ်လုပ်ကိုင်တာ ဖြစ်ပါတယ်။
အာဏာသိမ်းပြီးနောက် Red Ruby ကို ပြည်သူတွေက သပိတ်မှောက်ခဲ့တာကြောင့် ရောင်းအားကျဆင်းခဲ့သလို RMHS ကလည်း အကျိုးတူလုပ်ကိုင်တာကို ရပ်နားသွားခဲ့တယ်လို့ ထုတ်ပြန်ချက်တွေအရ သိရပါတယ်။
