မွန်ပြည်နယ်၊ သံဖြူဇရပ်မြို့နယ်၊ သံဖြူဇရပ်-ရေး အမှတ် ၈ ပြည်ထောင်စုလမ်းပေါ်မှာ ဖမ်းဆီးခဲ့တဲ့ Non-CDM ကျောင်းဆရာမ ၄ ယောက်ကို သြဂုတ် ၁၅ ရက်နေ့ ညနေပိုင်းမှာ ပြန်လွှတ်လိုက်ပြီလို့ မွန်ပြည်တော်လှန်ရေးတပ် (MSRF)ဆီက သိရပါတယ်။
ဩဂုတ် ၁၄ ရက် မနက် ၇ နာရီလောက်က ရေး ပြည်သူ့ကာကွယ်ရေးတပ် YPDF နဲ့ မွန်ပြည်တော်လှန်ရေးတပ် MSRF တို့က ခရီးသွားပြည်သူလုံခြုံရေးအတွက် မော်လမြိုင်-ရေး ပြည်ထောင်စုလမ်းမကို စစ်ဆေးရေးလုပ်နေတုန်း စစ်တပ်ကလုပ်မယ့်ရွေးကောက်ပွဲအတွက် သင်တန်းသွားတက်ကြမယ့် လမိုင်း၊ မော့ကနင်၊ နှစ်ကရင်၊ ဘေးလမိုင်းက Non CDM ဆရာမ ၄ ယောက်ကို သံဖြူဇရပ်မြို့နယ်၊ ဝဲခမီကျေးရွာအနီးမှာ ဖမ်းဆီးခဲ့တယ်လို့ တော်လှန်ရေးအဖွဲ့တွေဆီက သိရပါတယ်။
ကျောင်းဆရာမ ၄ ယောက်ကို မွန်ပြည်တော်လှန်ရေးတပ် (MSRF) နဲ့ ရေး ပြည်သူ့ကာကွယ်ရေးတပ် (YPDF) တို့က ဖမ်းဆီးပြီး ၂၄ နာရီကြာလောက် ထိန်းသိမ်းစစ်ဆေးပြီးနောက် ရွေးကောက်ပွဲမှာ ဆက်လက်ပါဝင်ပတ်သက်တာမျိုး မပြုလုပ်ဖို့ ခံဝန်ကတိ လက်မှတ်ထိုး ပြန်လွှတ်ပေးခဲ့တယ်လို့ MSRF ရဲ့ ပြောရေးဆိုခွင့်ရှိ သူ မိတလဉာဏ်က DVB ကိုပြောပါတယ်။
“စစ်ကော်မရှင်ရဲ့ ရွေးကောက်ပွဲ ဖြစ်မြောက်ဖို့အတွက် အုပ်ချုပ်ရေးမှူးတွေ Non-CDM ဝန်ထမ်းတွေအနေနဲ့ အာဏာပိုင်တွေနဲ့သွားလာတာ၊ သင်တန်းတွေတက်တာအပြင် လုပ်ငန်းအကောင်အထည်ဖော်တာတွေကို ပူးပေါင်းဆောင်ရွက်မှုမပြုလုပ်ဖို့အတွက် သတိပေးထားပြီးသားပါ။ ဒီအပေါ်မှာ ကျမတို့ ဆက်လက်ပြီးတော့ အရေးယူဆောင်ရွက် ရခြင်းဖြစ်ပါတယ်”
ရေးမြို့နယ်အတွင်း ရွေးကောက်ပွဲမှာ ပါဝင်ဆောင်ရွက်ကြမယ့် Non CDM ဝန်ထမ်းတွေရဲ့ စာရင်းတွေကိုလည်း ရရှိထားတယ်လို့ မွန်ပြည်တော်လှန်ရေးတပ် (MSRF)ဆီက သိရပါတယ်။
